Hebreos 13:1-25

  • Yuyaychaykunamanta napaykuykunamantawan (1-25)

    • Lliutapas sumaqtapuni chaskiychis (2)

    • Casado kausaytaqa lliulla ancha allinpaq jap’ichunku (4)

    • Umalliqkunata kasukuychis (7, 17)

    • Qollasunpuni Diosman jatunchay sacrificiota (15, 16)

13  Munanakushallaychispuni wayqe-panantin jina.  Lliutapas sumaqtapuni chaskiychis, chayta ruwaspan wakinqa mana yachaspa angelkunatawanraq chaskirankupas.  Yuyariychis carcelpi kaqkunata, paykunawan kuskapas preso kashawaqchis jinata; ñak’arichisqa kaqkunatapas yuyariychis, qankunapas kaq cuerpollapitaq kasqaykichisrayku.*  Casado kausaytaqa lliulla ancha allinpaq jap’ichunku, warmi-qhari puñuypas ama qhellichasqachu kachun; Diosqa juchachanqan qhelli juchapi puriqkunatapas jujwan pantaqkunatapas.  Aman qolqe sonqoqa kankichischu, aswanpas imaykichischus kan chayllawan contento kausaychis. Diosmi nin: “Manan jayk’aqpas saqesaykichu, manan jayk’aqpas qonqasaykichu”, nispa.  Chhaynaqa ama manchakuspa nisun: “Jehová Diosmi yanapawaqniyqa, manan manchakusaqchu. ¿Imanawanmantaq runari?”, nispa.  Yuyarillaychispuni pikunachus umallishasunkichis chaykunata, paykunamá riki willarasunkichis Diospa simintaqa. Chaymantapas allinta qhawariychis imayna kausasqankumanta imaynapichus tarikusqankuta, chhaynapi paykunaq iñiynin jina iñiyniykichis kananpaq.  Jesucristoqa kaqllapunin ñaupaqpas, kunanpas, wiñay-wiñaypaqpas.  Cuidakuychis imaymana waj yachachikuykunamanta, chaykunaqa pantachisunkichismanmi; Diospa ancha sumaq sonqo kayninwan sonqoykichistaqa kallpachaychis ama mijunawanchu, mijunaqa manan imapipas yanapanchu chayman sonqollikuqkunataqa. 10  Noqanchispa altarninchismantaqa manan mijuyta atinkumanchu Diospa karpanpi serviq runakunaqa. 11  Chay runakunaq jaywasqan animalkunaq cuerponqa karpa-karpa jawapin ruphachisqa kaq, yawarnintataq uma sacerdote ch’uyay-ch’uya parteman apaykuq jucha perdonasqa kananpaq. 12  Chhaynatan Jesuspas llaqta jawapi ñak’ariran, chhaynapi yawarninwan runakunata ch’uyanchananpaq. 13  Chhaynaqa, karpa-karpamanta lloqsispa payman risun, chhaynapi p’enqachisqa kayta pay jina aguantananchispaq. 14  Noqanchispaqa manan kaypiqa kanchu wiñaypaq kaq llaqtaqa, chaymi noqanchisqa qhepa tiempoman jamuq llaqtata tukuy sonqowan maskhashananchis. 15  Chayrayku, Jesuspa yanapayninwan qollasunpuni Diosmanqa jatunchay sacrificiota, chay sacrificioqa paypa sutinmanta siminchiswan lliu runaman willaymi. 16  Chaymantapas, aman qonqankichischu allin kaqkuna ruwaytaqa ni imachus kaqniykichiswan jujkunata yanapaytapas, chhayna sacrificiokunan Diostaqa anchata kusichin. 17  Kasukuychis pikunachus qankunata umallishasunkichis chaykunata, k’umuykukuywan kasukuychis paykunataqa. Paykunaqa qankunatan cuidashasunkichis,* chaymantan Diosmanpas cuentata qonqaku; chhaynata kasukunkichis chayqa kusisqan cuidasunkichis, manan llakisqachu; llakisqa kankuman chayqa manapunin allinniykichispaqchu kanman. 18  Noqaykuqa allintan yachayku ch’uya concienciayoq kasqaykuta, tukuy imapitaqmi honrado kaytapas munayku, chayrayku Diosmanta mañapuwashallayku. 19  Astawanqa noqapaq mañapuwaychis, chhaynapi pisi tiempollamanta qankunaman kutimunaypaq. 20  Thaj kayta qoq Diosmi Señorninchis Jesusta kausarichiran, paypin kasharan wiñay rimanakuyta valechiq yawarqa, chaymantapas payqa ovejakunata ancha allin michiqmi. Maytan munayman chay thaj kayta qoq Dios 21  paypa munayninta ruwanaykichispaq tukuy allin kaqkunawan junt’aykunasuykichista. Munallaymantaqmi imachus sonqonpaq jina kaqta ruwananchispaq Jesucristowan kallpachawananchistapas. Diosqa wiñay-wiñaypaq jatunchasqa kachun. Amén. 22  Wayqe-panaykuna, sumaqtayá chaskikuychis imata ruwanaykichispaqchus kallpachamushaykichis chay simikunataqa, chaymantapas pisillatamá kay cartataqa qelqamushaykichis. 23  Iñiqmasinchis Timoteoqa ñan libreña kashan. Pay apuray chayamunqa chayqa, paywan kuskan jamusaq qankunata watukuq. 24  Napaykapuwaychis pikunachus umallishasunkichis chaykunata llapa iñiqmasikunatawan. Kay Italia llaqtapi kaqkunapas apachimushasunkichismi napaykuyninkuta. 25  Diospa ancha sumaq sonqo kaynin llapa qankunawan kachun.

Uraypi willakuykuna

Chaytaqa “paykunawan kuskapas ñak’arishawaqchis jinata” nispapas t’ijrakullanmantaqmi.
Chaypiqa “almaykichistan cuidashanku” nillanmantaqmi.