Filipenses 4:1-23

  • Jujlla kanamanta, kusisqa kanamanta, allin kaqkunapi piensanamantawan (1-9)

    • Ama imamantapas llakipakunamanta (6, 7)

  • Filipospi iñiqkunata Pabloq agradecekusqanmanta (10-20)

  • Napaykuykuna (21-23)

4  Chhaynaqa, munasqa wayqe-panaykuna, ñaupaqpi nimusqayman jina, Señorwan jujllachasqallapuni qaqata sayashaychis. Noqaqa munakuykichismi, maytan qankunawan tupaytapas munashani, qankunaqa anchatan kusichiwankichis, premioytaqmi kankichispas.*  Evodiata Sintiquetawanmi kallpachani Señorta juj yuyaylla servinankupaq.  Qantapas, cheqaq llank’aqmasíy, valekuykin chay pananchiskunata yanapashanallaykipaq, paykunaqa Clementewan wakin llank’aqmasiykunawan iman tukuy atisqankuta noqawan kuska llank’aranku allin willakuykuna willaypi; paykunaq sutinkuqa kausay libropin qelqasqa kashan.  Señorninchisrayku kusikullaychispuni. Wajmantan nillaykichistaq: ¡Kusikuychis!, nispa.  Lliu runakuna yachachunku allin yuyaywanpuni imatapas ruwaq kasqaykichista.* Señorqa qayllaykichispin kashan.  Ama imamantapas llakipakuychischu, aswanpas mañakuspa, rogakuspa, graciasta qospa ima Diosman willakuychis imachus necesitasqaykichista.  Jinan Diosqa runaq mana entiendey atisqan thaj kayta qosunkichis, chhaynapin sonqoykichista yuyayniykichista ima Cristo Jesuswan waqaychanqa.  Chhaynaqa, wayqe-panaykuna, piensashallaychis tukuy cheqaq kaqpi, tukuy respetanapaq kaqpi, tukuy chanin kaqpi, tukuy ch’uya kaqpi, tukuy munakuyman apaq kaqpi, tukuy allin qhawarisqa kayman apaq kaqpi, tukuy allin kaqkunapi, lliu imapas jatunchanapaq jina kaqkunapi ima.  Imakunatachus noqamanta yacharankichis, chaskikurankichis, uyarirankichis, rikurankichispas, chaykunata ruwashallaychis; chhaynapin thaj kayta qoq Diosqa qankunawan kashanqa. 10  Señorninchisraykun anchatapuni kusikuni wajmanta noqapi piensasqaykichismanta. Ñaupaqqa piensaqpunichá kankichis noqapi, ichaqa manapaschá atisharankichischu imaynapi chayta rikuchiyta. 11  Kaytaqa manan imapas faltawasqanraykuchu nimushaykichis, ñan yachasqaña kani imaynapiña tarikushaspapas imaychus kan chayllawan contentakuyta. 12  Yachanin wajcha jina kausayta, yachallanitaqmi qhapaq jina kausaytapas, arí, imaymana kausaymanmi noqaqa yachasqaña kani, yachanin sajsa kayta yarqasqa kaytapas, yachanin imaymanayoq kayta mana imayoq kaytapas, chhayna kausaymanqa manan llapa runachu yachasqa kanku. 13  Tukuy imapaqmi kallpa qowaqniyqa kallpata qowan. 14  Chaywanpas, qankunaqa allintan ruwarankichis sasachakuyniypi yanapawaspaykichisqa. 15  Yachasqaykichis jina, chayllaraq allin willakuykunamanta yachashaqtiykichis Macedoniamanta ripushaqtiyqa manan mayqen iñiq t’aqapas yanapawaranchu, ni noqaq yanapayniytapas chaskikuwarankuchu, aswanpas qankuna Filipos llaqtamanta kaqkunallan; 16  Tesalónica llaqtapi kashaqtiypas qankunan imachus necesitasqaytaqa apachimuwarankichis, iskay kutitaraqmi apachimuwarankichispas. 17  Chaytaqa nishaykichis manan ima regalotapas qowanaykichista munaspachu, aswanmi noqaqa munani allinkuna ruwasqaykichiswan qhapaq kayniykichis askhayananta. 18  Junt’asqan lliu imaypas kashan, necesitasqaymantapas masraqmi kashan. Epafroditoman apachimuwasqaykichiswanmi tukuy imaypas junt’asqa kashan, chay apachimuwasqaykichisqa sumaq q’apaq, Diospa sonqonman chayaq sacrificio jinan. 19  Chayraykun tukuy imaymana kaqniyoq Diosniyqa tukuy ima necesitasqaykichista Cristo Jesuswan qosunkichis. 20  Yayanchis Diosqa wiñay-wiñaypaq jatunchasqa kachun. Amén. 21  Napaykapuwaychis Cristo Jesusta qatikuq lliu iñiqmasikunata.* Noqawan kashaq iñiqmasikunapas napaykuytan apachimushasunkichis. 22  Arí, lliu iñiqmasikunan napaykuyta apachimushasunkichis, astawanqa Roma reypa* wasinpi kaqkunan. 23  Señor Jesucristoq ancha sumaq sonqo kaynin imayna yuyayniyoqchus kasqaykichiswan kachun.

Uraypi willakuykuna

Griego rimaypiqa “coronaytaqmi kankichispas” ninmi.
Chaypiqa “mana tercochu kasqaykichista” nillanmantaqmi.
Griego rimaypiqa “ch’uyakunata” otaq “santokunata” ninmi.
Griego rimaypiqa “Cesarpa” ninmi. Chhaynatan sutichaqku Roma llaqtapi wakin reykunata.