Filipenses 3:1-21

  • Runaq imapichus confiasqanpi mana confianamanta (1-11)

    • Cristorayku tukuy imapas mana valeq kapusqanmanta (7-9)

  • Ñaupaqllaman phawashanamanta (12-21)

    • Janaq pachapi llaqtayoq kanamanta (20)

3  Chhaynaqa, wayqe-panaykuna, kusikushallaychis Señorwan jujllachasqa kasqaykichisrayku. Noqaqa manan sayk’usaqchu qankunaman kaqllamanta qelqamuspayqa, chaykuna allinniykichispaq kasqanrayku.  Cuidakuychis alqo jina kaq runakunamanta, sinchi mana allin ruwaq runakunamanta, qhari kay qaracha kuchuchikunaykichista munaq runakunamantapas.*  Noqanchismi cheqaq señalasqakunaqa* kanchis, arí, noqanchis Diospa espiritunpa yanapayninwan serviqkuna, noqanchis Cristo Jesusmanta alabakuqkuna, runaq imapichus confiasqanpi mana confiaqkuna.  Chaywanpas noqaqa razonllawanmi chaykunapi confiayman. Arí, lliu runamantapas aswan razonwanraqmi noqaqa confiayman runaq imapichus confiasqanpiqa.  Noqaqa pusaq p’unchayniypin qhari kayniy qaracha kuchusqa karani, Israel llaqtamantan kani, Benjamín ayllumanta, hebreo runakunaq wawan; kamachikuy simi waqaychaypitaq fariseo karani.  Chaymantapas sinchitapunin noqaqa iñiq t’aqata qatikachaq kani, kamachikuy simiq nisqanman jinaqa lliu imatapas chanintan ruwaq kani.  Kunanmi ichaqa imachus noqapaq ancha allin karan chaykunataqa Cristorayku mana valeqpaq qhawaripuni.  Arí, Señorniy Cristo Jesusmanta yachay tukuy imamantapas aswan allin kasqanraykun lliuta mana valorniyoqpaq qhawaripuni. Payraykun lliuta saqempuni, mana valeq q’opata jinataqmi chaykunataqa qhawaripunipas, chhaynapi paywan jujllachasqa kanaypaq,  paywan jujllachasqa kasqaypas sut’i rikuy kananpaqwan. Chayqa kanqa manan kamachikuy simiq nisqanman jina chanin kasqayraykuchu, aswanpas Cristopi iñisqaywan chanin kasqayraykun; Diosqa iñiqkunatan chaninpaq jap’in. 10  Tukuy chaykunataqa ruwarani payta reqsinaypaq, kausarimpuy atiyninta reqsinaypaq, pay jina ñak’arinaypaq, pay jina wañunaypaqwanmi, 11  chhaynapi imaynallamantapas ñaupaq kaq kausarimpuypi kausarimpunaypaq. 12  Manan chaytaqa chaskiniraqchu nitaqmi maymanchus chayanaymanqa chayanipasraqchu, aswanmi noqaqa kallpachakushallani imapaqchus Cristo Jesús ajllawaran chayta imaynallapipas chaskinaypaq. 13  Wayqe-panaykuna, noqaqa manan chay premiota chaskinaypaq jinaraqchu qhawarikuni, ichaqa tukuy imaymanata qhepapi qonqampuspaymi imakunachus ñaupaqpi kashan chayman phawashani. 14  Arí, ñaupaqllamanmi phawashani, chhaynapi Cristo Jesusrayku Diospa qosqan janaq pacha premioman aypanaypaq. 15  Chhaynaqa, chay nisqaykunaman jinayá piensasunchis noqanchis iñiypi allin poqosqa kaqkunaqa, ichaqa manachus chayman jina piensankichis chayqa, Diosmi yanapasunkichis chayman jina piensanaykichispaq. 16  Chaywanpas, maykamachus iñiyninchispi wiñaranchis chayman jinapuni purisun. 17  Wayqe-panaykuna, llapallaykichis noqa jina kaychis, pikunachus noqaykuq ejemplo qosqaykuman jina purishanku chay runakunatapas qatikuychis. 18  Askhan Cristoq ñak’arina k’aspipi wañusqanta pisichaspa purishanku. Noqaqa rimallaqpunin kani paykunamantaqa ¿riki? Kunanmi ichaqa waqasparaq willamushaykichis. 19  Paykunaq diosninkuqa wijsankun, p’enqay ruwasqankumantan jatunchakunkupas, yuyayninkupas kay pacha kaqkunallapin kashan; paykunaqa wañuchisqapunin kanqaku. 20  Noqanchispan ichaqa janaq pachapi llaqtanchis kashan, chaymi tukuy sonqo suyakunanchis janaq pachamanta jamuspa Señor Jesucristo salvawananchista. 21  Paymi jatun atiyninwan kay pisi kallpa cuerponchista cuerpon jina k’anchashaqman tukuchinqa, chay atiywanmi payqa lliu imatapas munaychakun.

Uraypi willakuykuna

Chaypiqa “aycha kuchuq runakunamantapas” nillanmantaqmi.
Chay señalachikuyqa qhari kay qarachata kuchuchikuymantan rimashan.