Filipenses 1:1-30

  • Napaykuy (1, 2)

  • Pabloq Diosman gracias qosqanmanta, mañakusqanmantawan (3-11)

  • Imaña kaqtinpas allin willakuykunaq ñauparisqanmanta (12-20)

  • Pabloq “Cristopaqmi kausasaq, wañusaqchus chayqa, allinniypaqmi wañusaq” nisqanmanta (21-26)

  • Allin willakuykunaman jinapuni kausanamanta (27-30)

1  Noqayku Cristoq kamachinkuna Pablo Timoteo iman kay cartata apachimushayku, qankuna Filipos llaqtapi kaq Cristowan jujllachasqa llapa iñiqkunaman,* jinallataq iñiqkunata qhawariqkunaman, yanapakuq kamachikunaman ima:  Qankunawan kachun Yayanchis Diospa, jinallataq Señor Jesucristoq ancha sumaq sonqo kaynin thaj kayninpas.  Qankunamanta yuyarispayqa “gracias” nillanipunin Diosniyta,  chaytaqa ruwani qankunapaq sapa rogakusqaypin. Noqaqa sapa rogakuspaypas ancha kusikuywanmi rogakuni  qallariy p’unchaymantapacha hasta kunankama allin willakuykuna mast’arikunanpaq yanapakusqaykichisrayku.  Noqaqa allintan yachani qankunapi allin kaq ruwayta qallariqqa Cristo Jesuspa p’unchaynin chayamunanpaq lliuta chayta junt’ananta.  Qankunaqa sonqoypin kashankichis, chaymi qankunamanta chhayna piensasqayqa chanillanpuni kashan. Preso kashaqtiypas allintan qankunaqa yanapawarankichis, autoridadkunaq leyninman jina allin willakuykunata defiendeypipas tajachiypipas yanapaykuwarankichismi, chhaynapin qankunapas noqa jina Diospa ancha sumaq sonqo kayninta chaskikurankichis.  Diosqa allintan yachan maytapuni qankunawan tupay munashasqayta, Cristo Jesús jina tukuy sonqowan munakusqaytapas.  Noqaqa mañakushallanin munakuyniykichis k’apaj yachaywan allin reparaywan ima aswan-aswanta wiñashananpaq, 10  aswan allin kaqkunatapas allinta reparanaykichispaqwan; chhaynapi Cristoq p’unchayninkama ama ima mana allinpas qankunapi kananpaq, ama pitapas urmachinaykichispaqwan. 11  Chaymantapas mañakullanipunin Jesucristoq yanapayninwan allin kaqkunata aswantaraq ruruchinaykichispaq, chhaynapi Dios jatunchasqa alabasqa ima kananpaq. 12  Wayqe-panaykuna, kaytan yachanaykichista munani: Imakunachus pasawasqanqa allin willakuykuna astawan mast’arikunanpaqmi karan; 13  chaywanmi Roma reyta cuidaq soldadokunaqa juj runakunapas llapanku yacharanku Cristorayku preso kashasqayta. 14  Chaymantapas preso kasqayraykun Señorta serviq yaqa llapa iñiqmasikuna qaqata sayashanku, aswan kallpachasqataqmi Diospa simintapas mana manchakuspa willashanku. 15  Arí, wakinqa envidiakuq kaspanku, cheqnipakuq kaspanku iman Cristomanta willashanku, wakinmi ichaqa allin sonqowan willashanku. 16  Paykunaqa yachankun allin willakuykunata defiendenaypaq churasqa kasqayta, chaymi munakuywan Cristomanta willashanku. 17  Chay envidiakuqkunan ichaqa mana ch’uya sonqowanchu willashanku, aswanmi churapakuq kasqankurayku; chaywanmi paykunaqa preso kashaqtiy astawanraq llakichiyta munawashanku. 18  Ichaqa manan imananpaschu. Allin sonqowanña, mana allin sonqowanña Cristomanta willakushan chaypas, paymanta willakuyqa lliumanmi chayashan, chaymi noqataqa anchata kusichiwan; kusisqallataqmi kashasaqpas 19  llapa chaykuna, jinallataq noqapaq rogapuwasqaykichis Jesucristoq qosqan espirituq yanapayninpas salvasqa kanaypaq kasqanrayku. 20  Noqaqa allintan yachani mana imapipas p’enqachisqa kanayta, aswanpas imaynan ruwallanipuni jinata mana manchakuspa rimasqaywan Cristota jatunchanayta. Arí, paytan noqaqa jatunchasaq* wañusaqña kausasaqña chaypas. 21  Kausasaq chayqa, Cristopaqmi kausasaq; wañusaqchus chayqa, allinniypaqmi wañusaq. 22  Kay pachapi kausashallasaq chayqa, imaymana allinkunan kanqa llank’asqaymanta. Ichaqa kausaytachus wañuytachus ajllakusaq chaytaqa manan nisaqchu. 23  Chay iskayninmantaqa manan mayqentapas ajllakuyta atishanichu, aswanpas noqaqa munayman ripuspa Cristowanña kaytan, chaymi noqapaqqa aswan allin kanman. 24  Chaywanpas, qankunaraykun kay pachallapiraq kanay kashan. 25  Chaywanmi yachani manaraq wañunay kasqanta, arí, qankunawanraqmi kashasaq Dios serviyniykichispi wiñanaykichispaq, iñiyniykichispi kusikunaykichispaqwan; 26  chhaynapi qankunaman kutimuqtiy Cristo Jesuspa discipulon kasqaykichisrayku kusikuyniykichis astawan yapakunanpaq. 27  Cristomanta allin willakuykunaman jinapuni kausaychis, chhaynapin jamusaqña manaña jamusaqchu chaypas, qankunaqa qaqata sayankichis, juj yuyaylla* kankichis, juj nisqallataq* kankichispas, allin willakuykunapi iñishanallaykichispaqpas juj sonqolla llank’ankichis, 28  contraykichispi kaqkunatapas manapunin manchakunkichischu. Chaykunan sut’ita rikuchin paykuna ch’usaqyachisqa kanankuta, qankunataq salvasqa kanaykichista; Diosmi chaytaqa sut’ita rikuchishan. 29  Qankunaqa manan Cristopi iñiyllatachu ancha allinpaq qhawarinaykichis, payrayku ñak’ariytawanmi chhaynata qhawarinaykichis. 30  Qankunapas ñaupaqpi tarikusqay maqanakuyllapitaqmi kashankichis; yachasqaykichis jina, kunankamapas chhayna maqanakuyllapin noqaqa kashani.

Uraypi willakuykuna

Griego rimaypiqa “ch’uyakunaman” otaq “santokunaman” ninmi.
Griego rimaypiqa “cuerpoywanmi jatunchasaq” ninmi.
Griego rimaypiqa “juj espiritulla” ninmi.
Griego rimaypiqa “juj almallataq” ninmi.