Efesios 4:1-32

  • Cristoq cuerponpi jujllachasqa kanamanta (1-16)

    • Regalokuna jina runakunamanta (8)

  • Mauk’a runa kayta saqespa mosoq runa kanamanta (17-32)

4  Señorninchisrayku preso kashaq noqa Pablon qankunata valekuykichis imapaqchus wajasqa karankichis chayman jina kausanaykichispaq,  jinallataq tukuy k’umuykukuywan, llamp’u sonqo kaywan, pacienciakuywan, munakuywan aguantanakuspa ima kausanaykichispaqwan.  Chaymantapas jujkuna-jujkunawan sumaqta kausaychis, tukuy atisqaykichistataq ruwaychis jujllachasqalla kashanaykichispaq, chay jujllachasqa kaytaqa santo espirituraykun chaskirankichis.  Imaynan wajasqa kasqaykichis suyakuyqa jujlla, chhaynallataqmi iñiq t’aqapas jujlla,* espiritupas jujllan,  Señorpas jujllan, iñiypas jujllan, bautismopas jujllan,  llapanchispa Yayanchis Diospas jujllataqmi, payqa lliutan kamachin, lliuwanmi imatapas ruwan, lliupitaqmi atiyninpas kashan.  Noqanchisqa sapankanchismi Diospa ancha sumaq sonqo kayninta chaskiranchis, Cristotaqmi chay regalotaqa sapankanchisman qowaranchis.  Chaymi Diospa simin qelqapiqa nishan: “Wichaymanmi riran presochasqakunata apaspa, jinaspa chay runakunata kachamuran regalokuna kanankupaq”, nispa.  ¿Imatan chaypi nishanman “wicharan” nisqanwan? Wichananpaqqa kay pachamanraqchá riki ñaupaqtaqa uraykamuran. 10  Chay kikin uraykamuqllataqmi lliu janaq pachaq jawankamaraq wicharan, chhaynapi tukuy imaymanata junt’achinanpaq. 11  Paymi kachamusqan runakunamanta wakinta churaran apóstol kanankupaq, wakinta profeta kanankupaq, wakinta allin willakuykunata willaq kanankupaq, wakinta michiq kanankupaq, wakintataq yachachiq kanankupaq; 12  chhaynapi iñiqkunata allin ñanllapi purichinankupaq, jujkunata servinankupaq, Cristoq cuerponta* wiñachinankupaqwan; 13  chaytaqa ruwanqaku iñiypi, Diospa Churinta allinta reqsiypipas jujllachasqa kananchiskaman, chhaynapi wiñay junt’asqa runa kananchispaq, arí, Cristoq junt’asqa sayaynin sayayniyoq kananchispaq. 14  Chhaynaqa, wayqe-panaykuna, amaña wawakuna jinachu kasun, amataq llullakuspa yachachiqkunatapas uyarisunchu, paykunaqa munayllatan jujkunata pantachinku; paykunatachus kasukusunman chayqa, lamar-qochapi wayraq apakachasqan bote jinan kasunman. 15  Aswanpas cheqaq kaqta rimasunchis, munakuqtaq kasunchispas, chhaynapin umalliqninchis Cristowan jujllachasqa kaspa tukuy imaymanapi wiñasunchis. 16  Payraykun cuerpoq llapa miembronkunaqa allin k’askanasqa kashan, allintataqmi yanapanakunkupas cuerpoq imachus necesitasqanman jina. Sapanka miembrochus ruwanankuta allinta junt’anku chayqa, llapa cuerpon allinta wiñan, chhaynapitaq cuerpoqa munakuypi qaqata sayan. 17  Chhaynaqa, Señorpa sutinpin valekuykichis: Amaña waj nacionkunamanta runakuna jinaqa puriychischu, paykunaqa mana valeq yuyayninkuman jinan kausashanku. 18  Arí, paykunaqa tutayasqa yuyayniyoqmi kashanku, karupitaqmi kashanku Diosmanta jamuq kausaymantapas; chhaynapiqa tarikunku Diosmanta mana yachayta munasqankurayku, sonqonku rumiyasqa kasqanrayku iman. 19  Chaymantapas paykunaqa manañan ima juchatapas mana allinpaqchu qhawarinku, chaymi mana p’enqarikuspa juchapakunku, tukuy millakuna kaqkunatapas sinchi munapayaywanmi ruwashallanku. 20  Ichaqa yachasqaykichis jina, Cristoqa manan chhaynachu. 21  Paytachus uyarirankichis paypa yachachisqantaqchus karankichispas chayqa, allintachá chaytaqa yachashankichis; Jesuspin cheqaq kaqqa kashan. 22  Qankunaqa allin yachachisqamá riki karankichis ñaupaqpi imayna runa kasqaykichista wijch’upunaykichispaqqa; chay mauk’a runaqa ñaupaqpi imaynachus purirankichis chayman jinan kashan, pantachisuqniykichis mana allin munapayaykunawantaqmi aswan mana allinmanraq tukupushanpas. 23  Chayrayku mosoqyachishallaychis imaynachus piensasqaykichista, 24  chaymantapas p’achakuychis mosoq runa kaywan; chayqa Diospa munayninman jinan kamasqa karan cheqaq chanin kaypi, junt’aq sonqo kaypi ima. 25  Chhaynaqa, ñataq llullakuyta wijch’upurankichisña chayqa, sapankaykichis cheqaq kaqta runamasiykichiswan rimaychis llapanchispas juj cuerpolla kasqanchisrayku. 26  Phiñakunkichischus chayqa, aman juchallikunkichischu; aman p’unchay ch’isiyaqqa phiñasqalla kankichischu, 27  aman Saqramanpas campotaqa qonkichischu. 28  Suwakuqpas amaña suwakuchunñachu, aswanpas honrado llank’anata maskhakuspa yachachun llank’ayta, chhaynapi pisichikuqkunaman imallatapas qoykunanpaq. 29  Amapunin simiykichismantaqa ima millay rimaypas lloqsinqachu; aswanpas necesitakusqanman jinan imachus allin jujkunata kallpachanapaq chayllata rimankichis, chhaynapin imapas rimasqaykichisqa uyariqniykichiskunaq allinninpaq kanqa. 30  Chaymantapas aman Diospa santo espirituntaqa llakichinkichischu, qankunaqa chay espirituwanmi sellasqa karankichis preciowan librasqa kanaykichis p’unchaypaq. 31  Chayrayku qankunamanta wijch’upuychis tukuy ima sintipakuq kayta, phiñasqa kayta, k’araq phiñakuyta, qaparkachayta, mana respetowan millay rimayta, tukuy ima k’araq simikunatawan. 32  Aswanpas jujkuna-jujkunawan sumaqta qhawarinakuychis, munakuywan khuyapayanakuychis, tukuy sonqowantaq perdonanakuychispas imaynan Diospas qankunata Cristorayku perdonarasunkichis chhaynata.

Uraypi willakuykuna

Griego rimaypiqa “cuerpopas jujlla” ninmi.
“Cristoq cuerpon” nispaqa iñiq t’aqamantan rimashan.