Efesios 3:1-21

  • Diospa pakasqa yachayninpi waj nación runakunapas kasqanmanta (1-13)

    • Waj nación runakuna Cristoq herencia chaskiqmasin kapunku (6)

    • Diospa wiñay munaynin (11)

  • Allin yuyayniyoq kanankupaq Pabloq mañapusqanmanta (14-21)

3  Noqa Pablon presochasqa kashani Cristo Jesusrayku, qankuna waj nacionkunamanta kaqkunarayku ima.  Yachasqaykichis jina, Diosmi qankunaq allinniykichispaq juj jatun llank’anata qowaran, chhaynapi paypa ancha sumaq sonqo kayninta qankunaman reqsichinaypaq.  Arí, Diosmi pakasqa yachayninta reqsichiwaran, chaymanta wakintaqa ñan qelqamuraykichisña kanpas.  Chhaynaqa, kay qelqamusqayta leespaykichisqa reparankichischá may tukuytachus Cristomanta pakasqa yachayta entiendeni chayta.  Ñaupa tiempopiqa manan pimanpas Diosqa chay pakasqa yachayta allintaqa reqsichiranchu, kunanmi ichaqa santo espiritunwan allinta reqsichishan ajllasqa* apostolkunaman profetakunaman ima.  Chay pakasqa yachayqa kaymi: Waj nacionkunamanta runakunan Cristowan jujllachasqa kasqankurayku allin willakuykunarayku ima paypa herencia chaskiqmasinkuna kanqaku, juj t’aqallataqmi kanqakupas.* Paykunaqa noqayku jinallataqmi Diospa promesankunatapas chaskinqaku.  Diospa ancha sumaq sonqo kayninpin noqaqa chay pakasqa yachaymanta willaq kamachi kapurani, Diosqa atiyninta qowaspan chhayna sumaq kasqanta rikuchiwaran.  Arí, paymi ancha sumaq sonqo kayninta rikuchiwaran llapa iñiqmasinchiskunamanta* aswan juch’uyllaña kashaqtiypas waj nacionniyoq runakunaman Cristoq mana tukukuq qhapaq kayninkunamanta allin willakuykunata willanaypaq,  imaynatachus Diosqa chay pakasqa yachayman jina imatapas ruwashan chayta lliuman willanaypaqwan. Tukuy imaymanata kamaq Diosmi chay yachaytaqa ñaupa tiempomantapacha pakaran; 10  chayqa karan Diospa tukuy imaymanapi rikukuq yachaynin janaq pachapi gobiernokunaman autoridadkunamanpas iñiq t’aqawan kunan tiempo reqsichisqa kananpaqmi. 11  Chayqa wiñay munayninman jinan karan, chaytan payqa Señorninchis Cristo Jesuswan ruwaran. 12  Noqanchisqa paypi iñisqanchisraykun mana manchakuspa mana iskayaspa ima Diosman achhuykushanchis. 13  Chhaynaqa, wayqe-panaykuna, amapuni pisipaychischu qankunarayku imaymanapi ñak’arisqaywanqa, qankuna jatunchasqa kanaykichispaqmi noqaqa ñak’arishani. 14  Llapa chaykunaraykun noqaqa Yayaman qonqorikuni, 15  payraykun llapa familiakunaqa kan* janaq pachapi kaqkunapas kay pachapi kaqkunapas. 16  Payqa ancha qhapaq atiyniyoq Diosmi, chaymi paymanta mañakuni santo espiritunpa atiyninwan sonqoykichispi yuyayniykichispi ima kallpachanasuykichispaq, 17  iñisqaykichisrayku Cristopas munakuyniykichispi sonqoykichispi ima tiyananpaqwan. Chaymantapas iñiyniykichispi allin saphichasqa allin teqsichasqa ima kanaykichispaqmi mañakullanitaq, 18  chhaynapi qankunapas juj iñiqmasinchiskuna jina cheqaq kaqpa anchonta, largonta, altonta, ukhuntapas allintapuni entiendenaykichispaq. 19  Cristoq munakuyninqa tukuy yachaymantapas aswan jatunraqmi, chaymi Diosmanta mañakuni chay munakuyninta reqsinaykichispaq, chhaynapi Diospa imayna sumaq sonqochus kasqanwan junt’aykusqa kanaykichispaq. 20  Diosqa imaymanatan noqanchispi atiyninwan ruwan, imakunachus mañakusqanchismantapas piensasqanchismantapas aswantaraqmi payqa imatapas ruwanman. 21  Chayrayku payqa jatunchasqa kachun; arí, iñiq t’aqawan Cristo Jesuswan ima imaymanata ruwasqanrayku wiñay-wiñaypaq payqa jatunchasqa kachun. Amén.

Uraypi willakuykuna

Griego rimaypiqa “ch’uya” ninmi.
Chaypiqa “kaq cuerpoq partenkunallataqmi kanqakupas” nillanmantaqmi.
Griego rimaypiqa “llapa ch’uya kaqkunamanta” ninmi.
Chaypiqa “paymantan sutita chaskinku” nillanmantaqmi.