Efesios 2:1-22

  • Cristowan kausarichisqa kasqankumanta (1-10)

  • T’aqaq perqa thunisqa kasqanmanta (11-22)

2  Diosmi qankunata kausarichirasunkichis mana allinkuna ruwasqaykichis jawa juchaykichis jawa ima wañusqa kashaqtiykichis,  chay tiempopin qankunaqa chay mana allinkunapi purisharankichis kay pachaq imaynachus kausasqanman jina, jinallataq wayraq atiyninta kamachiqpa munayninman jina; chay wayraqa mana kasukuqkunata kallpachaq espiritun.  Ñaupa tiempopiqa llapanchispas paykuna jinan aychanchispa munasqanman jina puriq kanchis, arí, aychanchispa munasqanman jina, imachus piensasqanchisman jinan puriq kanchis; chaymantapas nacesqanchismantapachan lliu runakuna jina Diospa phiñakuyninta chaskinanchispaq jina kasharanchis.  Diosmi ichaqa ancha khuyapayakuq anchatataqmi munakuwanchispas,  chaymi juchanchis jawa wañusqa kashaqtinchis Cristowan jujllachawananchispaq kausarichiwaranchis (qankunaqa Dios ancha sumaq sonqo kasqanraykun salvasqa karankichis).  Chaymantapas Cristo Jesuswan kuskata jatarichiwaspanchismi paywan kuskata janaq pachapi tiyachiwaranchis, paywan jujllachasqa kasqanchisrayku.  Diosqa chayta ruwaran noqanchis Cristo Jesuswan jujllachasqa kaqkunaman khuyapayakuq kayninpi mana tukukuq ancha sumaq sonqo kasqanta jamuq tiempopi rikuchiwananchispaqmi.  Diospa chhayna ancha sumaq sonqo kayninpin qankunaqa iñisqaykichisrayku salvasqa karankichis. Chaytaqa manan imachus ruwasqaykichisraykuchu chaskirankichis, aswanpas Diospa regalonmi chayqa.  Arí, salvasqa kasqaykichisqa manan imachus ruwasqaykichisraykuchu, chhaynapi mana pipas imamantapas alabakunanpaq. 10  Noqanchisqa Diospa makinpa ruwasqanmi kanchis, paymi Cristo Jesuswan jujllachasqa kasqanchisrayku allin kaqkunata ruwananchispaq kamawaranchis, ñaupaqmantañan payqa piensaran chaykuna ruwananchista. 11  Chayrayku qankuna waj nacionkunamanta kaqkuna, yuyariychis imaynas “qhari kayninku qaracha kuchusqa” kaqkunaqa: “Qhari kayninku qaracha mana kuchusqa kaqkuna”, nispa niq kasunkichis chayta. 12  Chay tiempopiqa manan Cristota reqsirankichischu, Israel llaqtamantapas karupin kasharankichis, Diospa promesanrayku acuerdo ruwasqankunapas manan qankunapaqchu karan, kay pachapipas mana ima suyakuyniyoq mana Diosniyoq iman kasharankichis. 13  Arí, qankunaqa karupin Diosmanta kasharankichis, kunanmi ichaqa Cristo Jesuswan jujllachasqa kashankichis, paypa yawarninraykutaq Diospa qayllanpi kashankichis. 14  Paymi thaj kayta qowaranchis; iskay grupoman t’aqanasqa kashaqtinchismi t’aqawaqninchis perqata thunispa jujllaman tukuchiwaranchis. 15  Cuerponwanmi cheqninachiwaqninchis kamachikuy simita lliu kamachikuyninkunantinta chinkachipuran, chhaynapi iskaynin t’aqata jujllaman* tukuchipunanpaq, iskaynin t’aqata payman jujllachachispa allipunachipunanpaqwan. 16  Chaymantapas ñak’arina k’aspipi wañusqanwanmi iskaynin t’aqata Dioswan tukuypi allipunachiran, chhaynapi juj cuerpollaman tukuchipunanpaq, arí, cuerponwanmi cheqninakuyta chinkachipuran. 17  Paymi jamuspa qankuna Diosmanta karupi kashaqkunaman thaj kaymanta allin willakuykunata willarasunkichis, kaqllatataqmi ruwaran cercapi kashaqkunawanpas. 18  Payraykun iskaynin t’aqa runakuna kaq espiritullata chaskinchis, chhaynapi Yayaman achhuykunanchispaq.* 19  Chhaynaqa, qankunaqa manañan mana reqsisqa runakunañachu kankichis nitaq waj llaqtayoq runakunañachu kankichispas, aswanpas ch’uya kaqkunaq llaqtamasinñan kankichis, Diospa wasinmanta kaqkunataqmi kankichispas. 20  Chaymantapas qankunaqa apostolkuna profetakuna patamanmi perqasqa karankichis; chay perqaq cimientonpi esquina jap’iq rumiqa Cristo Jesusmi. 21  Paywan jujllachasqa kaspan wasiq llapa perqankunaqa allin k’askanasqa sayarishan Jehová Diospa ch’uya wasinman tukunankama. 22  Qankunapas Cristowan jujllachasqa kaspan jatarichisqa kashankichis, chhaynapi espiritunwan Diospa tiyanan wasi kanaykichispaq.

Uraypi willakuykuna

Griego rimaypiqa “juj mosoq runaman” ninmi.
“Achhuykuy” simitaqa “asuykuy, qayllaykuy otaq chimpaykuy” nillankutaqmi.