Efesios 1:1-23

  • Napaykuy (1, 2)

  • Diospa bendicionninmanta (3-7)

  • Tukuy imapas Cristopi juñusqa kasqanmanta (8-14)

    • Señalasqa tiempopin juj ruway aparikushan (10)

    • Santo espiritun herenciata chaskinapaq garantiaqa (13, 14)

  • Allin iñiq kasqankumanta Pabloq Diosta agradecekusqanmanta, paykunapaq mañapusqanmantawan (15-23)

1  Diospa munayninpi Cristo Jesuspa apostolnin noqa Pablon qankuna Éfeso llaqtapi kaq iñiqmasikunaman* qelqamushaykichis, arí, qankuna Cristo Jesuspa junt’aq discipulonkunaman:  Qankunawan kachun Yayanchis Diospa, jinallataq Señor Jesucristoq ancha sumaq sonqo kaynin thaj kayninpas.  Jatunchasqa kachun Señorninchis Jesucristoq Yayan Diosqa; paymi santo espiritunwan janaq pachapi bendeciwanchis, Cristowan jujllachasqa kasqanchisrayku.  Manaraq runakuna mirayta qallarishaqtinmi* payqa Cristowan jujllachasqa kananchispaq ajllawaranchis, chhaynapi munakuyta rikuchinanchispaq, paypa ñaupanpi ch’uya mana juchachana kananchispaqwan.  Payqa sonqonpaq jina munayninman jina kasqanraykun ñaupaqmantaña ajllawaranchis Jesucristowan adoptasqa wawankuna kananchispaq.  Chaytaqa ruwaran munakusqan Churinwan ancha sumaq sonqo kayninta rikuchiwasqanchisrayku alabasqa kananpaqmi.  Chay munakusqan Churinmi libre kananchispaq yawarninwan rantikapuwaranchis, chhaynapi Diospa ancha sumaq sonqo kayninrayku juchanchiskunamanta perdonasqa kananchispaq.  Payqa yachayta allin entiendeq kaytawan qowaspanchismi rikuchiwallaranchistaq ancha sumaq sonqo kasqanta,  chaymantapas munayninmanta pakasqa yachaytan reqsichiwaranchis, chay pakasqa yachayqa paypa munasqanman jina imachus piensasqanman jinan karan. 10  Chay yachay ukhupin willakushan señalasqa tiempo junt’akuqtin juj ruway imayna aparikunanmanta, chhaynapi janaq pachapi kaqkunapas, kay pachapi kaqkunapas Cristopi juñusqa kananpaq. Arí, paywanmi tukuy imaymana juñusqa kanqa, 11  paywan jujllachasqan noqaykupas kashayku, paywan kuskataqmi herenciatapas chaskisaqku; chhayna kananpaqqa Diosmi imachus piensasqanman jina ñaupaqmantaña ajllawaranku, payqa tukuy imatapas munasqanman jinapunin ruwan. 12  Chhaynapi noqayku Cristopi ñaupaqta suyakuqkunawan Diosqa alabasqa jatunchasqa ima kananpaq. 13  Qankunapas salvasqa kanaykichispaq cheqaq allin willakuykunata uyarispan paypi suyakushankichis ¿riki? Paypi iñiqtiykichisñan Diosqa prometesqan santo espirituwan sellarasunkichis, Cristowantaqmi chaytaqa ruwaranpas, 14  (chay espiritun garantía jina karan herenciata chaskinanchispaq), Diosqa chayta ruwaran juj preciota pagaspa llaqtanta librananpaqmi, chhaynapitaq pay alabasqa kananpaq. 15  Chaymi noqapas Señor Jesuspi iñisqaykichista yachaspay, llapa iñiqmasikunata munakusqaykichistawan yachaspay 16  Diosman graciasta qollanipuni. Arí, Diosmanta mañakuspayqa yuyarillaykichispunin qankunataqa, 17  chhaynapi yachayta qonasuykichispaq, paymanta willasqa kaqkunata entiendechinasuykichispaqwan. Payqa Señorninchis Jesucristoq Diosnin qhapaq atiyniyoq Yayan. 18  Paymi sonqoykichista kichariran rikunaykichispaq, chhaynapi qosqasuykichis suyakuymanta yachanaykichispaq, iñiqkunaman ancha sumaq qhapaq herencia qonanmanta yachanaykichispaq, 19  paypi iñiqkunaman ancha jatun atiynin rikuchisqanta yachanaykichispaqwan. Chay jatun atiynintaqa rikuchiran 20  Cristota wañusqanmanta jatarichimuspa janaq pachapi paypa paña ladonpi tiyaykachispan. 21  Paytan churaran kunan tiempopipas jamuq tiempopipas llapa gobiernokunamanta, autoridadkunamanta, atiyniyoq kaqkunamanta, munayniyoqkunamanta, jinallataq tukuy imamantapas aswan atiyniyoq kananpaq; 22  chaymantapas Diosqa tukuy imatan chaki sarunanman churaran, iñiq t’aqapipas tukuy imapi uma kananpaqmi churaran, 23  chay iñiq t’aqaqa cuerponmi, paywanmi chay iñiq t’aqaqa junt’a kashan, jinallataq lliu imapas tukuypi paywan junt’a kashan.

Uraypi willakuykuna

Griego rimaypiqa “ch’uyakunaman” otaq “santokunaman” ninmi.
Chayqa rimashan Adán Evaq wawankunamantan.