Colosenses 4:1-18

  • Patronkunapaq consejo (1)

  • ‘Mañakushanallamanta’ (2-4)

  • Jawapi kaqkunawan allin yuyaywan kausanamanta (5, 6)

  • Napaykuykuna (7-18)

4  Patronkuna, kamachiykichiskunapaq chanin kaqta ruwapuychis, amataq mayqenmanpas sayapakuychischu; yachasqaykichis jina, qankunaqpas patronniykichisqa kanmi, janaq pachapitaqmi kashanpas.  Diosmanta mañakushallaychispuni, amapuni chay ruwaytaqa qonqankichischu, graciastapas qoshallaychispuni.  Noqaykupaqpas Diosmanta mañapuwayku siminta willanaykupaq punkuta kicharipuwanankupaq, arí, Cristomanta pakasqa yachayta willanaykupaq, chay willakuyraykun presoraq kashanipas.  Mañapuwaychis imaynachus willanayta jinapuni willanaypaq.  Allin yuyaywanpuni kausaychis jawapi kaqkunawan kashaspaqa, amapuni tiempoykichistapas usuchiychischu.  Rimayniykichisqa sumaqpuni kachun, kachiwan kachichasqa jina, chhaynapin yachankichis imaynatachus pitapas rimapayayta.  Munakusqay wayqey Tiquicon lliuta willasunkichis imaynachus kashani chayta, payqa Señorpa junt’aq serviqninmi kamachimasiytaqmi kanpas.  Paytan kachamushani imaynachus kashayku chayta willanasuykichispaq, qankunata kallpachanasuykichispaqwan.  Qankunamanta jujniykichis munakusqay wayqey Onesimowan kuskan payqa jamushan, Onesimoqa junt’aq sonqo runan. Paykunan willasunkichis kaypi tukuy imapas imaynachus kashan chayta. 10  Presomasiy Aristarcon napaykuyta apachimushasunkichis, Bernabepa primon Marcospas napaykamullasunkichistaqmi (“jamuqtinqa sumaqta chaskinkichis” nispa kamachisharaykichis chay Marcosmi napaykamushasunkichis); 11  napaykamullasunkichistaqmi “Justo” nisqa Jesuspas, paykunaqa qhari kayninku qaracha kuchusqakunamantan kanku. Paykunallan kashanku Diospa gobiernonpaq llank’aqmasiykunaqa, paykunan noqapaqqa ancha jatun consuelo kanku. 12  Qankunamanta jamuq Cristo Jesuspa kamachin Epafraspas napaykamullasunkichistaqmi. Payqa tukuy sonqon mañakushallanpuni qankunapaq, chhaynapi tukukuypiqa allin poqosqa runakuna jinapuni qaqata sayanaykichispaq, imatachus Dios ruwanqa chaypipas tukuy sonqo iñinaykichispaqwan. 13  Noqa kikiymi paytaqa rikuni maytachus qankunarayku, Laodiceamanta kaqkunarayku, Hierápolis llaqtamanta kaqkunarayku ima llank’asqanta. 14  Munakusqay médico Lucaspas apachimusunkichismi napaykuyninta, napaykamullasunkichistaqmi Demaspas. 15  Napaykapuwaychis Laodicea llaqtamanta wayqe-panakunata, Ninfata, jinallataq paypa wasinpi juñukuq iñiq t’aqatapas. 16  Kay cartata leespaykichisqa apachinkichis Laodiceapi kaq iñiq t’aqaman, chhaynapi chaypipas leekunanpaq; paykunaman apachisqay cartatapas qochikunkichis chayta qankuna ukhupipas leekunanpaq. 17  Arquipota niychis: “Señormanta chaskisqayki llank’anaman yuyayta churay, chhaynapi chayta allinta junt’anaykipaq”, nispa. 18  Noqa Pablopas napaykamushaykichismi, noqa kikiytaqmi qelqamushanipas. Amayá qonqankichischu preso kashasqaytaqa. Qankunawan kachun Diospa ancha sumaq sonqo kaynin.

Uraypi willakuykuna