Colosenses 2:1-23

  • Diospa pakasqa yachaynin Cristo kasqanmanta (1-5)

  • Engañaqkunamantan cuidakuna (6-15)

  • Llanthuqqa Cristo kasqanmanta (16-23)

2  Maytan yachanaykichista munayman may tukuytachus qankunarayku, Laodicea llaqtapi iñiqmasikunarayku, noqata llapa mana reqsiwaqkunarayku ima kallpachakusqayta,  chhaynapi sonqoykichis kallpachasqa kananpaq, llapaykichis munakuypi jujllachasqa kanaykichispaq ima; chhaynapin qhapaq kankichis, chay qhapaq kayqa Diospa pakasqa yachayninmanta allinta yachaymi allinta entiendey iman, chay pakasqa yachayqa Criston karan.  Paypin pakasqa kashan ancha valorniyoq yachaypas entiendeypas.  Chaytaqa nishaykichis ama pipas engañollawan pantachinasuykichispaqmi.  Manaña qankunawanchu kashani chaypas, yuyayniyqa qankunawanmi kashan,* imatapas allinta ruwasqaykichismanta kusikuspa Cristopi allinta iñisqaykichismanta kusikuspa ima.  Chhaynaqa, imaynan Señor Cristo Jesusta chaskirankichis, chhaynallatapuni payman jujllachasqa purishaychis.  Imaynan yachachisqa karankichis chayman jina Jesuspi allin saphichasqa allin perqasqa ima kaychis, iñiyniykichispipas qaqata sayaychis, Diosmanpas graciasta qollaychispuni.  Allinta cuidakuychis, paqtataq pipas runaq piensayninman jina yachaykunawan yanqa engañokunawan presota jina apasunkichisman, chaykunaqa runaq costumbrenkunaman jinallan kashan, kay pachaq kaqninkunaman jinataqmi kashanpas, manataqmi Cristoq yachachikuyninman jinachu.  Cristopin junt’a kashan Diospa imaynachus kasqanqa; 10  payraykun qankunamanqa mana imapas faltasunkichischu, paymi llapa gobiernoq umanqa llapa autoridadpa umanpas. 11  Paywan jujllachasqa kasqaykichisraykun señalasqa* karankichis, ichaqa manan imaynan runakuna señalanku jinatachu señalachikurankichisqa, aswanpas aycha cuerpoykichista ch’utikuspan; chhayna señalasqan kananku Cristota qatikuqkunaqa. 12  Qankunaqa paywan kuskan p’ampasqa karankichis pay jina bautizasqa kasqaykichisrayku; paywan jujllachasqa kasqaykichisraykutaq paywan kuska kausarichisqa karankichis, payta kausarichiq Diospa atiyninpi iñisqaykichisrayku. 13  Qankunaqa juchaykichisraykun wañusqa kasharankichis, qhari kayniykichis qarachapas manan kuchusqachu kasharan, chaywanpas Diosmi kausarichirasunkichis Cristowan jujllachasqa kanaykichispaq. Sumaq sonqo kayninpin payqa llapa juchanchiskunata perdonapuwaranchis, 14  llapa kamachikuy simitataqmi chinkachipuranpas, chay kamachikuy simiqa noqanchispa contranchispin kasharan, chaytan payqa chinkachipuran ñak’arina k’aspiman clavaspa. 15  Paymi ñak’arina k’aspipi Cristoq wañusqanwan gobiernokunata autoridadkunatapas q’alata ch’utiran, jinaspa lliuman rikuchiran guerrapi vencesqakunata jina, presochasqatataq apapuranpas. 16  Chhaynaqa, manan pipas juzganasuykichischu imachus mijusqaykichismanta, ujasqaykichismanta, fiesta p’unchaykunamanta, mosoq killa fiestamanta, ni sábado waqaychaymantapas. 17  Chaykunaqa imakunachus jamunan karan chaykunaq llanthullanmi karan, chay llanthuqmi ichaqa Cristo karan. 18  Cuidakuychis runaq rikunallanpaq k’umuykukuq kaqkunamanta angelkuna adoraqkunamantapas,* mana chayqa premio chaskinaykichistan jark’asunkichisman. Chay runakunaqa rikusqallankumanmi jap’ipakunku, yanqa piensasqankuwantaq jatunchakunku. 19  Paykunaqa manan umalliqtapas kasunkuchu; chay umalliqmi llapa cuerpota kausachiqqa, moqochunkunawan jank’unkunawan imataq llapa miembrokunata jujllachasqata jap’in, jinaspa Diospa munayninman jina wiñachin. 20  Cristo Jesuswan kuskataq kay pacha kaqkunapaqqa wañupurankichis chayqa, ¿imaynapitaq qankunari kay pachamantaraqpas kawaqchis jinaraq kasukushallankichis: 21  “Aman llaminkichu, aman malliykunkichu, aman tupaykunkipaschu”, nisqa kamachikuykunata? 22  Chaykunaqa mijusqa kaspa ujasqa kaspa iman tukukapun, chay kamachikuykunapas yachachikuykunapas runallamantan jamun. 23  Chay kamachikuykunaqa allin yuyaywan qosqa jinapaschá kanman, ichaqa manan valenchu aychaq munayninta vencenapaq, chhayna adorayqa runaq munayninman jinalla kasqanrayku, chaymantapas chhayna adoraqkunaqa ñak’arinkun, chaymi chhayna adorayta ajllakunku runakuna k’umuykukuqpaq piensanankuta munaspanku.

Uraypi willakuykuna

Griego rimaypiqa “espiritupiqa qankunawanmi kashani” ninmi.
Chay señalachikuyqa qhari kay qarachata kuchuchikuymantan rimashan.
Chaypiqa “angelkuna jina adoraqkunamantapas” nillanmantaqmi.