Colosenses 1:1-29

  • Napaykuy (1, 2)

  • Iñiq kasqankumanta agradecekusqanku (3-8)

  • Allin cristiano kanankupaq mañakusqankumanta (9-12)

  • Imatachus Cristo ruwaran chaymanta (13-23)

  • Diospa llaqtanrayku Pabloq tukuy imaymana ruwasqanmanta (24-29)

1  Diospa munayninpi Cristo Jesuspa apostolnin noqa Pablon iñiqmasinchis Timoteopiwan kay cartata apachimushaykichis  qankuna Colosas llaqtapi kaq junt’aq iñiqmasikunaman, arí, qankuna Cristowan jujllachasqa kaqkunaman: Qankunawan kachun Yayanchis Diospa ancha sumaq sonqo kaynin thaj kayninpas.  Qankunapaq mañakuspaykuqa “gracias” nillaykupunin Señorninchis Jesucristoq Yayan Diostaqa,  Cristo Jesuspi iñisqaykichismanta, llapa iñiqmasikunatapas mayta munakusqaykichismantawan yachaspayku.  Janaq pachapi suyakuyniykichis waqaychasqa kasqanraykupunichá chaytaqa ruwashankichis. Chay suyakuymantaqa cheqaq willakuyta, arí, allin willakuykunata uyarisqaykichispin yacharankichis ¿riki?  Chay uyarisqaykichis allin willakuykunaqa allintan rurushan, pachantinmantaqmi chayashanpas. Chhaynallataqchá qankuna ukhupipas pasashan Diospa ancha sumaq sonqo kaynin imaynapunichus kasqanta uyarispa allinta yachasqaykichis p’unchaymantapacha.  Chaytaqa ancha munasqa kamachimasiyku Epafras-si yachachisqasunkichis, payqa Cristoq junt’aq kamachinmi, rantiykupitaqmi qankunataqa yanapashasunkichispas.  Paymi willawanku Diospa espiritunman jina munakuq kasqaykichistapas.  Chhayna kasqaykichista yachasqayku p’unchaymantapachan Diosmanta mañakushallaykupuni qankunapaq, chhaynapi tukuy yachaywan santo espirituq entiendechisqanwan ima paypa munayninmanta allinta yachanaykichispaq. 10  Mañakullaykutaqmi Jehová Diospaq jina kausanaykichispaq, chhaynapi tukuy allin kaqkunata ruwaspa, paymanta cheqaq kaqta astawan yachaspa ima sonqonpaq jinapuni kanaykichispaq. 11  Mañakullaykutaqmi jatun atiyninman jina necesitasqaykichis atiywan kallpachasqa kanaykichispaq, chhaynapi pacienciawan kusikuywan ima tukuy imatapas aguantanaykichispaq, 12  Yayaman graciasta qonaykichispaqwan; paymi yanaparasunkichis k’anchaypi kashaq runakunaq herencia chaskiqmasin kanaykichispaq. 13  Paymi laqhayaqpa atiyninmanta kacharichiwaspanchis munakusqan Churinpa gobiernonman churawaranchis, 14  chay Churinwanmi preciowan kacharichisqa karanchis, arí, juchanchismantan perdonasqa karanchis. 15  Payqa mana rikuna Diospa rijch’ayninmi, tukuy imamantapas paymi ñaupaqta kamasqa karan. 16  Paywanmi janaq pachapi tukuy ima kaqkuna, kay pachapi tukuy ima kaqkunapas kamasqa karan: rikuna kaqkuna, mana rikuna kaqkuna, kamachikuqkuna, munayniyoqkuna, gobiernokuna, autoridadkunapas. Arí, paywanmi tukuy imapas kamasqa karan, paypaqtaqmi karanpas. 17  Chhaynaqa, paymi tukuy imamantapas ñaupaqta karan, paywantaqmi tukuy imapas kamasqa karan. 18  Paymi cuerpoq umanqa, arí, paymi iñiq t’aqaq umanqa. Paywanmi tukuy imapas qallariran, wañupuqkunamantapas paymi ñaupaqta kausarimpuran, chhaynapi pay tukuy imaymanaq qallariynin kananpaq. 19  Tukuy imapas paypi junt’asqa kanantan Diosqa munan. 20  Chaymantapas ñak’arina k’aspipi Cristoq jich’asqan yawarninwan kay pachapi kaqkunata janaq pachapi kaqkunatapas pay kikinwan allipunachiytan payqa munan. 21  Ñaupaqpiqa karupin Diosmanta kasharankichis, paypa enemigontaqmi karankichispas millay ruwaykunapi yuyayniykichista churasqaykichisrayku, 22  kunanmi ichaqa pay kikinwan allipunachisunkichis wañuyman entregakuqpa cuerponwan, chhaynapi paypa ñaupanpi ch’uya, mana imanasqa, mana juchachana ima kanaykichispaq. 23  Chaypaqqa iñishanallaykichismi, imapichus iñiyninchis saphichasqa kashan chaypipas mana kuyurispan allinta tajanaykichis, uyarisqaykichis allin willakuykunapi suyakuymantapas manan karunchakunaykichischu; chay allin willakuykunataqa pachantinpiñan predicakun, noqa Pablotaqmi chay willakuykunata willanaypaq churasqa karani. 24  Qankunarayku ñak’arisqaywanmi kusisqa kashani, chaywanpas manaraqmi lliutachu Cristoq cuerponrayku ñak’arishani, chay cuerpoqa iñiq t’aqan. 25  Diospa llank’ana qowasqanman jinan noqaqa chay iñiq t’aqata servinaypaq churasqa karani, chhaynapi qankunarayku paypa siminta tukuy sonqo willanaypaq. 26  Arí, Diospa pakasqa yachayninta willanaypaq, chay yachaytaqa manan yacharankuchu ñaupa tiempopi runakunaqa, kunanmi ichaqa chay yachayta ch’uya kamachinkunaman reqsichishan. 27  Diosqa munayninman jinan chay ch’uya kamachinkunawan ancha valorniyoq pakasqa yachayninta kay pacha runakunaman reqsichishan. Chay pakasqa yachayqa Cristowan jujllachasqa kasqaykichismi, arí, paywan kuska jatunchasqa kanaykichispaq suyakuyniykichismi. 28  Paymantan noqanchisqa willashanchis llapa runakunata anyaspa, tukuy yachaywan yachachispa ima, chhaynapi llapa runakunata tukuy imaymanapi Cristowan jujllachasqata Diosman pusananchispaq. 29  Chaypaqmi noqaqa tukuy atisqayta llank’ashani paypa kallpa qowasqanwan kallpachakuspa.

Uraypi willakuykuna