Apocalipsis 9:1-21

  • Pisqa kaq trompeta (1-11)

  • Ñaupaq kaq “imaraqmi” nikuy pasasqanmanta, iskay “imaraqmi” nikuy jamunanmantawan (12)

  • Soqta kaq trompeta (13-21)

9  Pisqa kaq ángel trompetanta tocaqtintaq juj ch’askata rikuruni cielomanta allpa pachaman urmaykushaqta, chay ch’askamanmi qosqa karan chinkay-chinkay ukhu t’oqoq llaven.  Jinan payqa chay chinkay-chinkay ukhu t’oqota kicharan, chay t’oqomantan q’osñi lloqsirimuran jatun hornomantapas lloqsimushanman jinaraq, chay q’osñiqa intitawan wayratawanraqmi tutayachipuran.  Chay q’osñimantan allpa pachaman lloqsimuran saltamontekuna, paykunamanmi Dios atiyta qoran, chay atiyqa allpa pachapi alacrán kurukunaq atiynin jinan karan.  Paykunan kamachisqa karanku allpa pachapi ama ima qoratapas, ni ima q’omer plantatapas, ni ima sach’atapas dañota ruwanankupaq, aswanmi paykunaqa pikunachus Diospa sellonta mana mat’inkupi apankuchu chay runakunallata k’irinanku karan.  Ichaqa manan wañuchinankupaqchu chay saltamontekunamanqa atiyta qokuran, aswanpas pisqa killata ñak’arichinankupaqmi; chay runakunaq ñak’ariyninqa karan alacrán kuruq picasqan runaq ñak’ariynin jinan.  Chay p’unchaykunan runakunaqa wañuyta maskhanqaku, ichaqa manan tarinqakuchu; maytapunin wañuyta munanqaku, wañuymi ichaqa paykunamanta ayqerikunqa.  Chay saltamontekunaqa guerrapaq preparasqa caballokuna jinan kasqaku, chaymantapas umankupi qori coronayoq jinan kasqaku, uyankutaq runaq uyan jina kasqa,  chujchankun ichaqa warmiq chujchan jina kasqa, kirunkutaq leonpa kirunkuna jina kasqa,  qhasqo jark’anankutaq fierromanta ruwasqa qhasqo jark’ana jina kasqa. Rafrankuq rimarisqanpas guerraman phawashaq carretakunaq* rimarisqan jinaraqmi kasqa. 10  Chaymantapas paykunaq chupankuqa alacrán kurukunaq chupan jinan kasqa, chay chupankupin atiyninkuqa kasqa runakunata pisqa killa k’irinankupaq. 11  Paykunaq reyninqa kasqa chinkay-chinkay ukhumanta encargakuq angelmi, paypa sutinmi hebreo rimaypi kasqa Abadón,* griego rimaypitaq Apolión.* 12  Chhaynapin ñaupaq kaq “¡imaraqmi!” niyqa pasaran. Kunanqa iskay “¡imaraqmi!” niykunaraqmi jamunqa. 13  Soqta kaq ángel trompetanta tocaqtinmi Diospa ñaupanpi kaq qori altarpa esquinankunapi waqrakunamanta juj kunkata uyarini. 14  Chay kunkan chay soqta kaq angelta nimushasqa: “Éufrates mayuq ladonpi watasqa tawantin angelkunata paskamuy”, nispa. 15  Jinan chay angelkunaqa kacharisqa karanku llapa runakunamanta kinsa kaq parteta wañuchinankupaq. Paykunan preparasqa karanku chay horapaq, chay p’unchaypaq, chay killapaq, chay watapaqwan. 16  Chaymantataq uyarini caballopi sillakuq soldadokuna jayk’achus karanku chayta, paykunan kasqaku chunka waranqa kuti iskay chunka waranqa.* 17  Rikusqay caballokunapas, chay caballopi sillakuqkunapas khaynan kasqaku: Caballopi sillakuqkunaq qhasqo jark’anankun kasqa sansa jina puka colorniyoq, jacinto qespi rumi jina azul colorniyoq, azufre jina q’ello colorniyoq ima. Caballokunan kasqaku leonpa uman jina umayoq, siminkumantataq lloqsimusqa nina, q’osñi, azufre ima. 18  Llapa runakunamanta kinsa kaq partenmi wañuchisqa karan chay caballokunaq siminmanta lloqsimuq kinsa castigokunawan: ninawan, q’osñiwan, azufrewan ima. 19  Chay caballokunaq atiyninqa kasqa siminkupi chupankupi iman, chupankun kasqa mach’aqwaykuna jina, umayoqkamataqmi kasqakupas, chay umakunawanmi runakunataqa k’irinku. 20  Chay castigokunata mana chaskiq runakunan ichaqa mana pesapakurankuchu makinkuwan imachus ruwasqankumanta; manan saqerankuchu supaykuna adorayninkuta, ni qorimanta, qolqemanta, cobremanta, rumimanta, k’ullumantawan ruwasqa idolokuna adorayninkutapas; chay idolokunaqa manan rikunkuchu, ni uyarinkuchu, ni purinkupaschu. 21  Manataqmi pesapakurankuchu runakuna wañuchisqankumantapas, ni layqa ruwaykuna ruwasqankumantapas, ni qhelli juchapi purisqankumantapas, ni suwakusqankumantapas.

Uraypi willakuykuna

Chayqa caballokunaq aysasqan iskay ruedayoq carretan karan.
“Abadón” sutiqa “ch’usaqyachiy” ninantan nin.
“Apolión” sutiqa “ch’usaqyachiq” ninantan nin.
Chaypiqa 200 millón caballopi soldadokunamantan rimashan (10.000 x 20.000).