Apocalipsis 8:1-13

  • Qanchis kaq sello kichasqa kasqanmanta (1-6)

  • Ñaupaq kaq trompeta waqasqanmanta (7-12)

  • Kinsa kutita “imaraqmi kanqa” nikusqanmanta (13)

8  Qanchis kaq sellota cordero kichaqtintaq janaq pachapi media hora jina ch’in karan.  Chayllamanmi rikuruni Diospa ñaupanpi sayashaq qanchis angelkunata, paykunamanmi qosqa karan qanchis trompetakuna.  Chayllamanmi chayaramun juj ángel incienso ruphachina qori p’uku apaykusqa, paymi sayaykuran altarpa ladonpi; paymanmi askha incienso qosqa karan ch’uya runakunaq mañakuyninta uyarikushanankama tronoq ñaupanpi kaq qori altarpi chayta ruphachinanpaq.  Chay angelpa ruphachisqan incienso q’osñitaq ch’uya runakunaq mañakuyninwan kuska Diospa ñaupanman chayaran.  Chayllamanmi chay angelqa incienso ruphachina p’ukuta altarpi kaq ninawan junt’achiran, chaytataq allpa pachaman jich’aykuran. Jinan rayokuna t’ojaran, kunkakunapas uyarikuran, rayokunapas lliphipipiran, terremotopas karan.  Chaymantataq qanchisnintin angelkunaqa alistakuranku trompetankuta tocanankupaq.  Ñaupaq kaq ángel trompetanta tocaqtinmi yawarwan chaqrusqa chijchi, nina ima allpa pachaman wijch’uykusqa karan, jinan allpa pachaq kinsa kaq parten ruphasqa kapuran, llapa sach’akunamantapas kinsa kaq parten ruphasqa kapuran, q’achukunapas llapanmi ruphasqa kapuran.  Iskay kaq ángel trompetanta tocaqtintaq, imachá kanpas lamar-qochaman wijch’uykusqa karan, chayqa jatunkaray orqo jinan kasqa, raurashasqataqmi kanpas. Jinan lamar-qochaq kinsa kaq partenqa yawarman tukupuran,  chaywanmi lamar-qochapi llapa kausaqkunamanta kinsa kaq parte wañupuran, llapa barcokunamantapas kinsa kaq parten ñut’usqa kapuran. 10  Kinsa kaq ángel trompetanta tocaqtintaq cielomanta juj jatun ch’aska urmaykuran mechero jina raurashaq; chay ch’askan urmaykuran mayukunaq kinsa kaq partenman, llapa pujukunamanwan. 11  Chay ch’askaq sutinmi kasqa “ajenjo”. Jinan unukunaq kinsa kaq parten ajenjo jina jayallaña kapuran, chaywanmi askha runakuna wañuranku chay unu jaya kasqanrayku. 12  Tawa kaq ángel trompetanta tocaqtintaq, intiq kinsa kaq parten, killaq kinsa kaq parten, ch’askakunaq kinsa kaq parten ima k’irisqa karan, chhaynapi llapa chaykunaq kinsa kaq parten tutayananpaq, p’unchaypa kinsa kaq partenpas ama k’anchananpaq, tutaq kinsa kaq partenpas ama k’anchananpaqwan. 13  Chayllamanmi rikuruni juj ankata sinchi altonta volashaqta, chay ankan fuerteta nishasqa: “¡Imaraqmi, imaraqmi, imaraqmi kanqa allpa pachapi tiyaqkunamanta! Kinsa angelkunaraqmi trompetankuta tocananku kashan, ñataqmi tocanqakuña kanpas”, nispa.

Uraypi willakuykuna