Apocalipsis 3:1-22

  • Sardisman (1-6), Filadelfiaman (7-13), Laodiceamanwan (14-22) willakuy apachikusqanmanta

3  ”Sardis iñiq t’aqapi kaq angelmanpas qelqallaytaq: Khaynatan nin pichus Diospa qanchis espiritunkunata jap’ishan chay, arí, pichus qanchis ch’askakunata jap’ishan chay: ‘Yachanin imachus ruwasqaykita. Jujkunaq rikunanpaqqa kausashankipaschá, ichaqa wañusqan qanqa kashanki.  Chayrayku rijch’ariy, jinaspa pikunachus wañuy patapiña kasharanku chaykunata kallpachay; manan qanqa allintachu junt’ashanki Diosniypa munayninta.  Chayrayku yuyariy imatachus chaskiranki imatachus uyariranki chayta, jinaspa chayman k’askakuy, pesapakuytaq mana allin ruwasqaykimantapas. Manachus rijch’arinki chayqa, suwa jinan qonqaylla jamusaq, manataqmi yachankichu imay horastachus jamusayki chaytapas.  ”’Chaykunaña kashan chaypas, qankuna ukhupiqa kashanmi p’achankuta mana qhellichaq wakin runakuna, paykunan yuraq p’achawan churaykusqakama noqawan kuska purinqaku, chaypaq jina kasqankurayku.  Pipas atipaqqa chhayna yuraq p’achawan p’achachisqan kanqa, sutintapas manan jayk’aqpas kausay libromanta borrasaqchu, aswanmi paytaqa reqsikapusaq Yayaypa ñaupanpi angelkunaq ñaupanpipas.  Pipas ninriyoqqa uyarichun imatachus santo espíritu iñiq t’aqakunata nishan chayta’, nispayki.  ”Filadelfia iñiq t’aqapi kaq angelmanpas qelqallaytaq: Khaynatan nin pichus ch’uya, pichus cheqaq kaq, pichus Davidpa llaventa jap’ishan chay, arí, pichus mana wisq’ay atiyta kichan, mana kichay atiytataq wisq’anpas chay:  ‘Yachanin imachus ruwasqaykita, chaymi ñaupaykiman punkuta kicharparini, chaytaqa manan pipas wisq’ayta atinmanchu. Yachallanitaqmi juj chikan atiyniyoq kasqaykita, simiy waqaychasqaykita, noqapaq* junt’aq sonqo kasqaykitapas.  Mana judío kashaspa llullakuspa “judion kani” niqkunaqa Satanaspa sinagoganmi kanku, paykunatan ñaupaykiman qonqorichisaq, chhaynapin rikuchisaq noqaqa qanta munakusqayta. 10  Noqa jina aguantaq kasqaykiraykun waqaychasayki pruebapi tarikuqtiyki, chay pruebaqa llapa kay pachamanmi jamunqa, chhaynapi llapa runakuna pruebaman churasqa kananpaq. 11  Noqaqa yaqañan jamusaq, chayrayku allinta jap’ishay imatachus jap’ishanki chayta; chayta ruwanki chayqa, manan pipas qechusunkichu coronaykita. 12  ”’Pipas atipaqtaqa Diosniypa adorana wasinpi columna kananpaqmi churasaq, manan jayk’aqpas chaymantaqa lloqsinqachu, paypin qelqasaq Diosniypa sutinta, Diosniypa llaqtanpa sutinta, arí, Diosniymantapacha janaq pachamanta uraykamuq mosoq Jerusalenpa sutinta, mosoq sutiyta ima. 13  Pipas ninriyoqqa uyarichun imatachus santo espíritu iñiq t’aqakunata nishan chayta’, nispayki. 14  ”Laodicea iñiq t’aqapi kaq angelmanpas qelqallaytaq: Khaynatan nin pitachus ‘amén’ nikun chay; pichus cheqaq, junt’aq testigo chay; pitachus ñaupaqta Dios kamaran chay: 15  ‘Yachanin imachus ruwasqaykita, yachanin mana ruphachu ni chirichu kasqaykitapas. Maytan munayman ruphapas chiripas kanaykita. 16  Tibiollachus kanki, manataq ruphachu ni chiripaschu chayqa, simiymantan aqturparisayki. 17  Qanqa: “Qhapaqmi kani, askhan imaykunapas, manan imatapas munaniñachu”, ninkipaschá; ichaqa mana imayoq, khuyapayana, wajcha, ñausa, mana ima p’achayoq q’alan qanqa kanki. 18  Chayraykun niyki: Noqamanta rantikuway ninawan ch’uyayasqa qorita, chhaynapi qhapaq kanaykipaq; rantikuway yuraq p’achakunatapas, chhaynapi amaña p’enqaychu q’alalla purishanaykipaq, aswanpas p’achasqa kanaykipaq; rantikuway ñawi jampitapas, chhaynapi chayta ñawiykiman llusiykuspa rikunaykipaq. 19  ”’Noqaqa pitachus munakuni chaytan anyani, chaytan wanachinipas. Chayrayku juchaykikunamanta pesapakuspa tukuy sonqoykiwan Diosta serviy. 20  Noqaqa wasi punkupin kashani punkuta takaspa, pipas uyarimuwaspa punkunta kichamuwanqa chayqa, noqan chay wasiman jaykusaq, paywan kuskataq cenasaq, paytaq noqawan kuska cenanqa. 21  Pipas atipaqtaqa tronoypin noqawan kuskata tiyachisaq, imaynan Yayaypas atipasqayrayku trononpi paywan kuskata tiyachiwaran chhaynata. 22  Pipas ninriyoqqa uyarichun imatachus santo espíritu iñiq t’aqakunata nishan chayta’, nispayki”, nispa.

Uraypi willakuykuna

Griego rimaypiqa “sutiypaq” ninmi.