Apocalipsis 21:1-27

  • Mosoq cielomanta mosoq allpa pachamantawan (1-8)

    • Manan wañuy kanqañachu (4)

    • Tukuy iman mosoq kanqa (5)

  • Mosoq Jerusalén llaqtamanta (9-27)

21  Chayllamanmi rikullanitaq mosoq cielota mosoq allpa pachatawan, ñaupaq kaq cielopas ñaupaq kaq allpa pachapas manañan kasqachu, lamar-qochapas manañan kapusqachu.  Chaypin rikullanitaq juj ch’uya llaqtata, arí, mosoq Jerusalén llaqtata, chay llaqtan janaq pachamanta Diosmantapacha uraykamushasqa, qosanpaq allin adornasqa novia jina.  Chayllamanmi uyarini tronomantapacha juj fuerte kunkata: “Diospa karpanqa runakuna ukhupin kashanqa, paymi runakunawan kuska tiyanqa, paykunan llaqtan kanqa. Dios kikinmi paykunawan kashanqa,  paymi ñawinkumanta tukuy weqeta pichanqa, manan wañuypas kanqañachu, manañataqmi llakikuypas, waqaypas, ni nanaypas kanqañachu. Arí, ñaupaq kaqkunaqa manañan kanqachu”, nispa nimuqta.  Tronopi tiyaqpas: “Tukuy imatan mosoqta ruwasaq”, nispan nimun. Chaymantan nimullantaq: “Kaykunata qelqay, kay simikunaqa confianapaq jinan cheqaqtaqmi kanpas”, nispa.  Chaymantataq niwan: “¡Ñan junt’akunña! Noqan kani alfapas omegapas,* arí, noqan kani qallariypas tukukuypas. Pipas ch’akichikuqmanqa kausay puju unutan gratislla qosaq.  Pipas venceqqa lliu kaykunatan herenciapaq chaskinqa, noqan Diosnin kasaq, paytaq waway kanqa.  Manchapakuqkuna, mana iñiqkuna, millakunapaq kaqkunata ruwaq qhelli runakuna, runa wañuchiqkuna, qhelli juchapi puriqkuna, layqa ruwaypi* puriqkuna, ídolo adoraqkuna, llullakuna iman ichaqa azufreyoq nina qochaman wijch’uykusqa kanqaku. Chayqa iskay kaq wañuytan representan”, nispa.  Chaymantataq tukukuy qanchis plagakunawan junt’a kaq qanchis pocillokunata jap’iq qanchis angelkunamanta jujnin jamuspa niwan: “Jamuy, corderoq novianta, arí, paypa esposanta rikuchimusayki”, nispa. 10  Jinan payqa espirituq atiyninwan juj jatunkaray alto orqoman apawaspa rikuchiwan ch’uya Jerusalén llaqtata, chay llaqtan janaq pachamanta Diosmantapacha uraykamushasqa, 11  Diospa lliflli kayninwantaqmi junt’a kasqapas. Ancha sumaq qespi rumi jinaraqmi k’ancharisqapas, arí, jaspe rumi jinan waputapuni k’ancharisqa. 12  Perqankunapas jatunkaray altollañan kasqa, punkunkunataq chunka iskayniyoq kasqa, sapanka punkupitaq juj ángel kashasqa, chaymantapas Israel llaqtaq chunka iskayniyoq ayllukunaq sutinmi punkunkunapi qelqasqa kasqa. 13  Inti lloqsimuy ladopin kasqa kinsa punkukuna, kaq wichay ladopipas kinsa punkukunan kasqa, uray ladopipas kinsa punkukunallataqmi kasqa, inti jaykuy ladopipas kinsa punkukunan kallasqataq. 14  Chay llaqta muyuriq perqaq cimientonpin kasqa chunka iskayniyoq cimiento rumikuna, chaykunapin qelqasqa kasqa corderoq chunka iskayniyoq apostolninkunaq sutin. 15  Chay noqawan rimaq angelqa medinapaq qori soqostan jap’isqa, chaywan chay llaqtata, punkunkunata, perqankunatawan medinanpaq. 16  Chay llaqtaqa cuadradon kasqa, largonpas anchon jina jatunllañan kasqa. Jinan chay angelqa jap’isqan soqoswan chay llaqtata mediran, chay llaqtan kasqa chunka iskayniyoq waranqa estadiokuna* sayay; largonpas, anchonpas, sayayninpas kaqllan kasqa. 17  Chaymantataq perqankunata mediran, runaq medida churasqanman jinaqa pachaj tawa chunka tawayoq codotan* medisqa chay perqaqa, chay medidallawantaqmi chay angelpas mediran. 18  Chaymantapas chay llaqtaq perqankunaqa jaspe rumimantan kasqa, lliu llaqtataq vidrio jina k’anchashaq ch’uya qorimanta kasqa. 19  Chay llaqta muyuriq perqaq cimientonkunataq imaymana sumaq qespi rumikunamanta kasqa: Ñaupaq kaq cimienton kasqa jaspe rumimanta, iskay kaqtaq kasqa zafiro rumimanta, kinsa kaqtaq kasqa calcedonia rumimanta, tawa kaqtaq kasqa esmeralda rumimanta, 20  pisqa kaqtaq kasqa sardónica rumimanta, soqta kaqtaq kasqa sardio rumimanta, qanchis kaqtaq kasqa crisólito rumimanta, pusaq kaqtaq kasqa berilo rumimanta, isqon kaqtaq kasqa topacio rumimanta, chunka kaqtaq kasqa crisoprasa rumimanta, chunka jujniyoqtaq kasqa jacinto rumimanta, chunka iskayniyoqtaq amatista rumimanta kasqa. 21  Chay chunka iskayniyoq punkukunaqa chunka iskayniyoq perlakunan kasqa, sapanka punkun juj perlamanta kasqa. Llaqtapi jatun kaq callepas ch’uya qorimantan kasqa, vidrio jinataqmi kasqapas. 22  Chaypiqa manan ima templopas kasqachu, tukuy atiyniyoq Jehová Dioswan corderowan iman temploqa kasqaku. 23  Chay llaqtaqa manan necesitasqachu intiq k’anchaynintapas ni killaq k’anchaynintapas, Diospa lliflli kayninmi chay llaqtataqa k’anchaykusqa, corderopas k’anchaymi* kasqa. 24  Chay k’anchaywanmi llapa nacionkunaqa purinqaku, allpa pacha reykunapas chaymanmi lliflli kayninkuta apanqaku. 25  Punkunkunapas manan jayk’aqpas wisq’akunqachu, chaypiqa p’unchayllan kanqa manan tutaqa kanqachu. 26  Chay llaqtamanmi apasqa kanqa nacionkunaq lliflli kaynin jatunchasqa kayninpas. 27  Ichaqa manapunin ima qhelli kaqpas, ni ima millakunapaq kaqta ruwaqpas, ni engañaspa puriqpas chay llaqtamanqa jaykunqachu. Aswanpas pikunaq sutinchus corderoq kausay qelqa k’uyunpi qelqasqa kashan, chaykunallan chaymanqa jaykunqaku.

Uraypi willakuykuna

Alfaqa griego rimaypi qallariy letran karan, omegataq último letra karan.
Qhaway “explicasqa simikuna” nisqapi “layqa ruwaykuna” nisqata.
Chayqa karan 2.220 kilómetro jinan. Juj “estadio” nisqaqa karan 185 metron.
Chayqa 64 metro jinan karan.
Chaypiqa “lamparan kasqa” nillanmantaqmi.