Apocalipsis 20:1-15

  • Satanás 1.000 watapaq watasqa kasqanmanta (1-3)

  • Cristowan kuska 1.000 wata gobiernaqkunamanta (4-6)

  • Satanás librasqa kasqanmanta, chinkachisqa kasqanmantawan (7-10)

  • Yuraq tronoq ñaupanpi wañusqakuna juzgasqa kasqankumanta (11-15)

20  Chayllamanmi rikuruni juj angelta chinkay-chinkay ukhuq llaven apariykusqa jatun cadena apariykusqa ima janaq pachamanta uraykamushaqta.  Jinan ñaupa mach’aqway nisqa dragonta jap’iran, paymi Saqraqa Satanaspas, jinaspa waranqa watapaq wataran.  Chaymantataq chinkay-chinkay ukhuman wijch’uykuran, chaypi wisq’aspataq juj sellota churaran, chhaynapi chay waranqa wata tukunankama amaña nacionkunata pantachinanpaq. Chay qhepamanmi ichaqa pisi tiempollapaq kacharisqa kanqa.  Chaymantataq rikuni tronokunata, chaypi tiyaqkunamanmi juzganankupaq atiy qosqa karan, arí, pikunachus Jesusmanta Diosmantawan willasqankurayku wañuchisqa karanku* chaykunatan rikuni;* paykunaqa manan manchay phiña animalta ni rijch’aynintapas adorarankuchu, nitaq mat’inkupipas ni makinkupipas chay manchay animalpa marcantaqa chaskirankuchu. Paykunan kausarimuspa Cristowan kuska waranqa watantin reykuna jina kamachinqaku.  Chaymi chay ñaupaq kaq kausarimpuyqa. (Wakin wañusqa kaqkunan ichaqa chay waranqa wata tukuytaña kausarimpunqaku.)  Kusisqa kachun pipas ñaupaq kaq kausarimpuypi kausarimuqqa. Paykunataqa manan imananqapaschu iskay kaq wañuyqa, aswanmi paykunaqa Diospa sacerdotenkuna Cristoq sacerdotenkuna ima kanqaku, waranqa watataqmi kamachinqakupas.  Chay waranqa wata tukuqtinmi Satanasqa maypichus preso kasqanmanta kacharisqa kanqa,  jinan lloqsimuspa allpa pachaq tawantin esquinakunapi kaq nacionkunata pantachinqa, arí, Gogta, Magogtawanmi pantachinqa, jinaspa guerrata ruwanankupaq juñunqa. Chay juñusqakunaqa lamar-qocha patapi aqo jinaraqmi kanqaku.  Chay nacionkunan allpa pachantinman ch’eqerispanku ch’uya runakunaq karpakusqankuta, munasqa llaqtata ima muyuykunqaku. Ichaqa janaq pachamantan nina lloqsimunqa jinaspa paykunata ruphapunqa. 10  Pantachiqninku Saqrataq azufreyoq nina qochaman wijch’uykusqa kanqa, chaypiñan kasharanku manchay phiña animalpas llulla profetapas; chaypin tuta-p’unchay wiñay-wiñaypaq ñak’arichisqa kanqaku. 11  Chaymantan rikullanitaq juj jatun yuraq tronota, chay tronopi tiyashaqtawan. Paypa ñaupanmantan allpa pachawan cielowan ima ayqekuranku, manañan tarisqachu karanku. 12  Chaymantan rikullanitaq wañusqakunata, juch’uykunata jatunkunatawan tronoq ñaupanpi sayashaqta, chaypin qelqa k’uyukuna kichasqa karan. Chaymantan waj qelqañataq kichasqa karan, chayqa kausay libron kasqa. Chay wañusqakunaqa imachus ruwasqankuman jina, qelqa k’uyukunapi imachus qelqasqa kasqanman jinan juzgasqa karanku. 13  Lamar-qochapas chaypi wañusqa kaqkunatan entregaran, wañuypas Sepulturapas chaypi wañusqakuna kaqtan entregaranku, jinan paykunaqa imachus ruwasqankuman jina sapankanku juzgasqa karanku. 14  Chaymantataq wañuypas Sepulturapas nina rauray qochaman wijch’uykusqa karanku, chay nina rauray qochaqa iskay kaq wañuytan representan. 15  Chaymantapas piqpa sutinchus mana kanchu kausay libropi qelqasqa chay runapas nina rauray qochamanmi wijch’uykusqa karan.

Uraypi willakuykuna

Griego rimaypiqa “hachawan wañuchisqa karanku” ninmi.
Chaypiqa “chaykunaq almantan rikuni” nillanmantaqmi.