Apocalipsis 19:1-21

  • Imaynachus juzgasqanrayku Jehová Dios alabasqa kananmanta (1-10)

    • Corderoq casarakusqan (7-9)

  • Yuraq caballopi sillakuqmanta (11-16)

  • Diospa jatun cenanmanta (17, 18)

  • Manchay phiña animal vencesqa kasqanmanta (19-21)

19  Chaykuna qhepatataq janaq pachamanta uyarini juj fuerte kunkata, ancha askha runakunaq kunkanpas kanman jinata, chay kunkan nimushasqa: “¡Alabasqa kachun Jehová Diosqa!* Diosninchispan salvacionpas, jatunchaypas, atiypas.  Cheqaqmi chaninmi paypa juicionkunaqa, chaymi allpa pachata qhelli jucha ruwaywan qhellichaq qhelli kausaypi puriq atiyniyoq warmitapas castigan, arí, kamachinkunata wañuchiqmantan payqa vengakun”, nispa.  Chayllamanmi wajmanta nimullantaq: “¡Alabasqa kachun Jehová Diosqa!* Chay Babilonia llaqtamantaqa wiñay-wiñaypaqmi q’osñi lloqsimushallanqa”, nispa.  Chay iskay chunka tawayoq kuraq runakunataq tawa kausashaqkunapiwan k’umuykuspa tronopi tiyashaq Diosta adoraranku, jinaspa niranku: “¡Amén! ¡Alabasqa kachun Jehová Diosqa!”,* nispa.  Tronomantan juj kunka nimullantaq: “Diosninchista alabaychis, qankuna payta manchakuq llapa kamachinkuna, juch’uyña jatunña kankichis chaypas”, nispa.  Chayllamanmi uyarillanitaq ancha askha runakunaq kunkanta jina, askha unuq suenasqan suenayta jina, fuerte rayo t’ojaykunata jina, chaykunan nimushasqa: “¡Alabasqa kachun Jehová Diosqa!* ¡Tukuy atiyniyoq Jehová Diosninchisñan kunanqa kamachishan!  Ñan corderoq casarakunan tiempopas chayamunña, novianpas listoñan kashan paywan casarakunanpaq, chayrayku ancha kusikuywan Diosta jatunchasun.  Corderoq novianmanmi qosqa karan sumaq k’anchashaq limpio lino p’acha, chaywan churakunanpaq; chay sumaq lino p’achaqa ch’uya runakunaq allinkuna ruwasqantan representan”, nispa.  Chay angelmi niwallantaq: “‘Kusisqa kachunku corderoq casarakuynin jatun mijuyman invitasqa kaqkunaqa’ nispa qelqay”, nispa. Chaymantan niwallantaq: “Kay simikunaqa Diospa rimasqan cheqaq simikunan”, nispa. 10  Chaymi noqaqa paypa ñaupanman pampakama k’umuykuni adoranaypaq, jinan payqa niwan: “¡Imatan ruwashanki! ¡Ama chayta ruwaychu! ¡Diosllatan adoranayki! Noqaqa kamachimasillaykin kani, Jesusmanta willanankupaq churasqa wayqeykikunaq kamachimasillantaqmi kanipas. Profeciakunaqa Jesusmanta cheqaq kaqta willanapaqmi”, nispa. 11  Chayllamanmi janaq pachata rikuruni kicharayashaqta, chaymantan lloqsimushasqa juj yuraq caballo, chay caballopi sillakuqpa sutinmi kasqa “junt’aq kaq, cheqaq kaq” nisqa; payqa chanin kayman jinan juzganpas guerratapas ruwan. 12  Ñawinmi kasqa nina rauray jina, umanpitaq askha coronakuna kasqa, chaymantapas paypin mana piqpa reqsisqan suti qelqasqa kasqa, payllan chay sutitaqa reqsisqa. 13  Jawa p’achanpas yawarwan yawarchasqan kasqa,* sutintaq “Diospa simin” nisqa kasqa. 14  Qhepantan yuraq caballokunapi jamushasqaku janaq pacha ejercitokuna, paykunan p’achasqa kasqaku limpiollaña sumaq lino yuraq p’achawan. 15  Siminmantataq juj filollaña jatun espada lloqsimushasqa, chaywan nacionkunata k’irinanpaq, fierro varawantaqmi paykunataqa michinqapas. Paymi sarunqa tukuy atiyniyoq Diospa manchay phiñakuynin uvas sarunatapas. 16  Jawa p’acha chakanpitaq qelqasqa kasqa “reykunaq reynin, señorkunaq Señornin” nisqa suti. 17  Chayllamanmi rikurullanitaq juj angelta intipi sayashaqta, paymi llapa alton phawaq animalkunata fuerteta wajashasqa: “Jamuychis Diospa jatun cenanman juñukamuychis, 18  chaypin mijunkichis reykunaq aychanta, ejercitopi comandantekunaq aychanta, kallpasapa runakunaq aychanta, caballokunaq aychanta, chaypi sillakuqkunaq aychanta, jinallataq libre kaqkunaq, kamachikunaq, juch’uykunaq, jatunkunaq aychantawan, arí, lliupa aychanta”, nispa. 19  Chaymantan rikullanitaq manchay phiña animaltapas, allpa pacha reykunatapas, ejercitonkunatapas; paykunan juñukusqaku caballopi sillakuqwan ejercitonwan ima guerrata ruwanankupaq. 20  Jinan chay manchay phiña animalqa llulla profetawan kuska jap’isqa karan, chay llulla profetan chay manchay animalpa ñaupanpi imaymana señalkunata ruwaran, chaywantaq chay animalpa marcanta chaskiqkunata, chay animalpa rijch’ayninta adoraqkunatawan pantachiran. Iskayninkun kausashaqlla wijch’uykusqa karanku azufreyoq nina qochaman. 21  Wakintaq caballopi sillakuqpa siminmanta lloqsimuq jatun espadawan wañuchisqa karanku. Jinan alton phawaq animalkunaqa paykunaq aychanta sajsanankukama mijuranku.

Uraypi willakuykuna

Chaypiqa “¡aleluya!” nillanmantaqmi, chayqa “alabasqa kachun Jah” ninantan nin. “Jah” nisqaqa pisi letrakunallapi “Jehová” ninantan nishan.
Chaypiqa “¡aleluya!” nillanmantaqmi, chayqa “alabasqa kachun Jah” ninantan nin. “Jah” nisqaqa pisi letrakunallapi “Jehová” ninantan nishan.
Chaypiqa “¡aleluya!” nillanmantaqmi, chayqa “alabasqa kachun Jah” ninantan nin. “Jah” nisqaqa pisi letrakunallapi “Jehová” ninantan nishan.
Chaypiqa “¡aleluya!” nillanmantaqmi, chayqa “alabasqa kachun Jah” ninantan nin. “Jah” nisqaqa pisi letrakunallapi “Jehová” ninantan nishan.
Chaytaqa “yawarwan ch’aqchusqan kasqa” nispapas t’ijrakullanmantaqmi.