Apocalipsis 17:1-18

  • “Jatun Babilonia” juzgasqa kasqanmanta (1-18)

    • Qhelli kausaypi puriq warmi k’anchaq puka color manchay phiña animalpi sillaykun (1-3)

    • Chay “manchay phiña animalqa kaypin kasharan, kunanmi ichaqa mana kapunchu; ichaqa ñan lloqsimunqaña chinkay-chinkay ukhumanta” (8)

    • Chunka waqrakunan guerrata ruwanqaku corderowan (12-14)

    • Chunka waqrakunan cheqnikunqaku qhelli kausaypi puriq warmita (16, 17)

17  Chay qanchis pocillokunata jap’ishaq angelkunamanta jujnintaq jamuspa niwan: “Jamuy, kunanmi rikuchimusayki askha unukunapi tiyaq qhelli kausaypi puriq* atiyniyoq warmiq castigon imaynachus kanqa chayta.  Paywanmi allpa pachapi reykunaqa qhelli juchata ruwaranku, chaypi lliu tiyaqkunapas qhelli jucha ruway vinonwanmi macharanku”, nispa.  Chaymantan chay angelqa espirituq atiyninwan juj ch’inneqman apawan. Chaypin juj warmi kashasqa juj manchay phiña animalpi sillaykusqa, chay animalqa k’anchaq puka colormi kasqa, qanchis umayoq chunka waqrakunayoq iman kasqapas; chaymantapas chay animalqa Diosta k’amiq sutikunawanmi junt’a kasqa.  Chay warmitaq pukaniraq azul p’achawan, k’anchaq puka p’achawan p’achasqa kasqa; chaymantapas qoriwan, sumaq qespi rumikunawan, perlakunawan iman adornasqa kasqa, makinpitaq jap’isqa juj qori copata, chay copan sinchi millay ruwaykunawan, millay qhelli jucha ruwaykunawan ima junt’a kasqa.  Mat’inpitaq qelqasqa kasqa juj mana entiendey atina suti, chay sutin nisqa: “Jatun Babilonia, qhelli kausaypi puriqkunaq, allpa pachapipas sinchi millay ruwaykunaq maman”, nispa.  Chay warmiqa ch’uya runakunaq yawarninwan Jesuspa testigonkunaq yawarninwan iman machasqa kashasqa. Chay warmita rikuspaymi noqaqa ancha admirasqa kasharani.  Chaymi chay angelqa niwan: “¿Imaraykun admirasqa kashanki? Noqan willasayki chay warmimanta juj pakasqa yachayta, chay q’epiykuqnin qanchis umayoq chunka waqrayoq manchay phiña animalmanta pakasqa yachaytawan.  Chay rikusqayki manchay phiña animalqa kaypin kasharan, kunanmi ichaqa mana kapunchu; ichaqa ñan lloqsimunqaña chinkay-chinkay ukhumanta, chaymantataq wañuchisqa kanqa. Allpa pachapi llapa kausaqkunataq, pikunaq sutinchus runaq qallariyninmantapacha* kausay qelqa k’uyupi mana qelqasqachu kashan chaykuna, anchata admirakunqaku chay animal chinkasqa kasqanmanta kutimusqanta rikuspanku.  ”Kayta entiendenapaqqa allin yachayniyoqmi kana. Chay qanchis umakunaqa qanchis orqokunatan representan, chaykuna patapin chay warmiqa tiyashan. 10  Chaykunataq qanchis reykunata representan. Pisqaqa ñan urmapunkuña, jujtaq kunan actual kashan, jujnin kaqmi ichaqa mana chayamunraqchu, chay chayamunqa chayqa pisi tiempollan kanqa. 11  Chay kaypi kashaq jinaspa chinkapuq manchay phiña animalpas pusaq kaq reymi, paymi ichaqa qanchisnintin reykunamanta paqarimun, ichaqa chinkachisqan paypas kanqa. 12  Chay rikusqayki chunka waqrakunataq representan chunka reykunata, paykunaqa manan chaskinkuraqchu atiyta rey kanankupaq, ichaqa atiytan chaskinqaku manchay phiña animalwan kuska reykuna jina juj horata gobiernanankupaq. 13  Chay chunka reykunaqa llapankupas juj yuyayllayoqmi kanku, chaymi chay manchay phiña animalman atiyninkuta autoridadninkutawan qonku. 14  Paykunan guerrata ruwanqaku corderowan; corderon ichaqa paykunata vencenqa señorkunaq Señornin, reykunaq reynin kasqanrayku. Corderowan kaqkunapas vencenqakun, paykunaqa Diospa wajasqankuna, paypa ajllasqankuna, paypaq junt’aq sonqokuna iman kanku”, nispa. 15  Chaymantan niwallantaq: “Maypichus chay qhelli kausaypi puriq warmi tiyashan chay unukunaqa llaqtakunata, runakunata, nacionkunata, rimaykunata iman representan. 16  Chay rikusqayki chunka waqrakunan manchay phiña animalwan kuska chay qhelli kausaypi puriq warmita cheqnikunqaku, jinan payta lliuta ch’utinqaku, jinaspa q’alallata saqerparinqaku, aychantapas mijunqakun, chaymantataq ninawan lliuta kanaykapunqaku. 17  Diosmi sonqonkuman juj yuyayta churaran, chhaynapi paypa imachus piensasqanta ruwanankupaq, arí, paykunaq imachus piensasqankuta ruwanankupaq; chaytan ruwanqaku chay manchay phiña animalman gobierno atiyninkuta qospa, Diospa tukuy ima rimasqan junt’akunankamataqmi chayqa kanqapas. 18  Chay rikusqayki warmiqa allpa pacha reykunata kamachiq ancha jatun llaqtatan representan”, nispa.

Uraypi willakuykuna

Chaypiqa cuerponta vendeq warmimantan rimashan.
Chayqa rimashan Adán Evaq wawankunamantan.