Apocalipsis 14:1-20

  • Corderomanta, 144.000 runakunamantawan (1-5)

  • Kinsantin angelkunaq willasqanmanta (6-12)

    • Altonta volashaq ángel allin willakuykunata willan (6, 7)

  • Kusisqa kachunku Cristowan jujllachasqa wañuqkunaqa (13)

  • Allpa pachapi iskay cosecha kasqanmanta (14-20)

14  Chayllamanmi rikuruni corderota Sión orqopi sayashaqta, paywan kuskan kashasqaku 144.000 runakunapas, paykunaq mat’inpin qelqasqa kasqa corderoq sutin Yayanpa sutin ima.  Chayllamanmi uyarini janaq pachamanta juj suenayta, unuq rimarisqan jina suenayta, rayoq t’ojasqan jina suenayta; chay uyarisqay suenayqa arpawan compañachikuspa takiqkuna jinan kasqa.  Paykunaqa juj mosoq takita jinan takishasqaku tronoq ñaupanpi, tawa kausashaqkunaq ñaupanpi, kuraq runakunaq ñaupanpi ima; manan pipas chay takitaqa takiyta atiranchu, aswanpas allpa pachamanta rantisqa chay 144.000 runakunallan takiranku.  Paykunaqa manan warmikunawan qhellichakurankuchu, manataqmi piwanpas puñurankuchu.* Paykunaqa corderoq qhepallantan purinku, maytaña riqtinpas qhepallantapunin rishanku. Chaymantapas paykunaqa runakuna ukhumantan rantisqa karanku, Diospaq corderopaqwan ñaupaq ruru jina kanankupaq.  Paykunaq siminpiqa manan ima engañopas tarikuranchu, mana ima k’iñayoqtaqmi kashankupas.  Chayllamanmi rikuruni juj angelta altonta volashaqta, paymi wiñaypaq allin willakuykunata willanan kasqa allpa pachapi llapa tiyaqkunaman, llapa nacionkunaman, ayllukunaman, rimaykunaman, llaqtakunamanwan.  Paymi fuerteta nishasqa: “Diosta manchakuychis, payta jatunchaychis, juzganan horan chayaramunña, chayrayku payta adoraychis, paymi cielota, allpa pachata, lamar-qochata, pujukunatawan kamaqqa”, nispa.  Chayllamanmi rijurimullarantaq iskay kaq ángel, paymi nishasqa: “¡Urmaykapunñan! Arí, ¡urmaykapunñan jatun Babiloniaqa! Paymi llapa nacionkunaman vinonta ujachiqqa, chay vinoqa qhelli jucha ruwayta sinchita munapayasqanmi”, nispa.  Chayllamanmi kinsa kaq angelñataq rijurimuran, paymi fuerteta nishasqa: “Pipas chay manchay animalta rijch’aynintawan adoraqqa, jinallataq mat’inpipas otaq makinpipas marcasqa kaqqa, 10  Diospa phiñakusqan vinotan ujallanqataq, chay vinoqa mana imawan chaqrusqan Diospa colerasqan copaman jich’asqa karan; chaymantapas ch’uya angelkunaq ñaupanpi corderoq ñaupanpi iman chhayna runakunaqa ninawan azufrewan ima ñak’arichisqa kanqaku. 11  Ñak’arisqanku q’osñipas wiñay-wiñaypaqmi q’osñishallanqa, tuta-p’unchaymi mana samanqakupaschu, arí, chhaynan kanqa chay manchay phiña animalta rijch’aynintawan adoraqkunawanqa, sutinpa marcanta chaskiqkunawanpas. 12  Chayraykun ch’uya kaqkunaqa aguantananku kanqa, paykunan Diospa kamachikuyninkunata kasukuqkunaqa kanku, paykunan Jesuspi iñiqkunapas kanku”,* nispa. 13  Chayllamanmi uyarini janaq pachamanta juj kunkata, chay kunkan nimushasqa: “Kayta qelqay: Kusisqa kachunku kunanmantapacha Señorwan jujllachasqa wañuqkunaqa. Espirituq nisqan jina, llank’anankumanta samachunku paykunaqa, imachus ruwasqankuqa paykunawan kuskan rinqa”, nispa. 14  Chayllamanmi rikuruni juj yuraq phuyuta, chay phuyupin pichá tiyashasqapas, payqa runaq Churin jinan kasqa, umanpin kasqa juj qori corona, makinpitaq juj filo ichhuna. 15  Chaymantan templomanta* juj ángel lloqsimullarantaq, paymi fuerteta wajaran chay phuyu patapi tiyashaqta: “Ichhunaykita jap’ispa cosechamuy, ñan cosechana horaña kashan, allpa pachapi cosechaqa ñan allin poqosqaña kashan”, nispa. 16  Jinan phuyu patapi tiyashaqqa allpa pachata ichhunanwan ichhuran, chhaynapin allpa pachamanta llapa cosecha oqarisqa kapuran. 17  Juj angelmi lloqsimullarantaq janaq pachapi kashaq templomanta, paypas juj filollaña ichhunantinmi jamushallasqataq. 18  Chaymantan altarmantañataq juj ángel lloqsimullarantaq, payqa ninata kamachinanpaq atiyniyoqmi kasqa. Jinan payqa fuerteta wajaran filollaña ichhunayoq angelta: “Chay ichhunaykita jap’ispa allpa pachapi uvas ch’ampakunata rutumuy, chay uvaskunaqa ñan poqosqaña kashan”, nispa. 19  Jinan chay angelqa ichhunanwan ichhuran allpa pachapi uvas sach’ata, chaytataq wijch’uykuran jatunkaray uvas sarunaman, chay uvas sarunaqa Diospa phiñakuynintan representan. 20  Chay uvasqa llaqta jawapin sarusqa karan, chay uvas sarunamantataq askha yawar lloqsimuran caballokunaq siminkamaraq, chaymantapas waranqa soqta pachaj estadiokuna* sayaytaraqmi mast’arikuran chay yawarqa.

Uraypi willakuykuna

Griego rimaypiqa “paykunaqa virgenkunan kanku” ninmi.
Griego rimaypiqa “Jesuspa iñiyninman jap’ipakuqkunapas kanku” ninmi.
Chaypiqa ch’uyay-ch’uya partemantan rimashan.
Chayqa karan 300 kilómetro jinan. Juj “estadio” nisqaqa karan 185 metron.