Apocalipsis 13:1-18

  • Qanchis umayoq manchay phiña animal lamar-qochamanta lloqsimun (1-10)

  • Iskay waqrayoq manchay phiña animal allpamanta lloqsimun (11-13)

  • Qanchis umayoq manchay phiña animalpa rijch’aynin (14, 15)

  • Manchay phiña animalpa marcanmanta numeronmantawan (16-18)

13  Chaymantataq chay dragonqa lamar-qocha aqo patapi sayaykuran. Chayllamanmi rikuruni juj manchay phiña animal lamar-qochamanta lloqsimushaqta, chay animalqa qanchis umayoq, chunka waqrakunayoq iman kasqa, sapanka waqranpitaq juj corona kasqa, sapanka umanpin Diosta k’amiq sutikunapas kasqa.  Chay rikusqay manchay phiña animalqa leopardo* jinan kasqa, chakinkunan ichaqa osoq chakinkuna jina kasqa, simintaq leonpa simin jina kasqa. Chay dragontaq chay manchay animalman qoran atiyninta, trononta, jatun autoridadtawan.  Chay manchay phiña animalpa jujnin umanmi wañuqpaq k’irisqapas kanman karan jina kasqa, ichaqa thanipusqañan chay k’irinqa, lliu kay pacha runakunataq admirasqa chay manchay animalta qatikuranku.  Jinaspa chay dragonta adoraranku chay manchay phiña animalman atiyta qosqanmanta, adorarankun chay manchay animaltapas: “¿Pitaq kay manchay phiña animal jina kanman? ¿Pitaq paywan maqanakuytapas atinman?”, nispanku.  Chay manchay animalmanmi simi qosqa karan jatunchakuspa rimananpaq, imaymana pisichaq simikunata rimananpaqwan; atiytapas chaskiranmi tawa chunka iskayniyoq killa imaymanakunata ruwananpaq.  Jinan chay animalqa siminta kicharispa Dios contra rimayta qallariran; pisicharanmi Diospa sutinta, maypichus tiyasqanta, janaq pachapi kaqkunatapas.  Paymanmi permiso qosqa karan ch’uya runakunawan guerrata ruwananpaq paykunata vencenanpaqwan; chaymantapas atiytan chaskiran llapa ayllukunata, llaqtakunata, rimaykunata, nacionkunatawan gobiernananpaq.  Allpa pachapi llapa tiyaqkunan adoranqaku paytaqa. Chay adoraqkunaq sutinqa runakuna mirayta qallarisqanmantapachan* mana qelqasqachu karan nak’asqa corderoq kausay qelqa k’uyunpi.  Pipas ninriyoqqa uyarichun. 10  Pipas preso apanapaq kaqqa preso apasqapunin kanqa, pipas espadawan wañuchiqqa espadawan wañuchisqallataqmi kanqa. Chayraykun ch’uya runakunaqa allinta aguantananku kanqa, iñiyninkupipas qaqata sayananku kanqa. 11  Chayllamanmi rikurullanitaq waj manchay phiña animalta, chay animalqa allpamantan lloqsimushasqa, iskay waqrayoqtaqmi kasqapas, chay waqrankunaqa corderoq waqran jinan kasqa, ichaqa dragón jinan rimayta qallariran. 12  Chay manchay animalqa ñaupaq kaq manchay phiña animalpa lliu atiyninwanmi pay rikushaqtin tukuy imatapas ruwaran. Chaymantapas chay ñaupaq kaq manchay animaltan, arí, wañuqpaq k’irisqa kasqanmanta allinyasqa manchay phiña animaltan allpa pachawan, llapa chaypi tiyaqkunawan ima adorachiran. 13  Chaymantapas jatun señalkunatan ruwaran, ninataraqmi lliu runa rikushaqtin cielomanta allpa pachaman uraykachiran. 14  Ñaupaq kaq manchay animalpa ñaupanpi chhayna señalkuna ruwasqanwantaq chay iskay kaq manchay animalqa allpa pachapi kausaqkunata pantachiran, jinaspa paykunata kamachiran espadawan k’irisqa kasqanmanta jatarimuq manchay phiña animalpa rijch’ayninta ruwanankupaq. 15  Chaymantapas chay iskay kaq manchay animalqa chay ñaupaq kaq manchay phiña animalpa rijch’ayninman kausayta phukuykunanpaqmi permiso qosqa karan, jinan chay ñaupaq kaq manchay animalpa rijch’ayninqa rimayta qallariran, kamachikurantaq pipas payta mana adoraqkuna llapanku wañuchisqa kanankupaq. 16  Chaymantapas chay ñaupaq kaq animalpa rijch’ayninqa llapa runatan obligaran juch’uyta, jatunta, qhapaqta, wajchata, libre kaqta, kamachita ima paña makinkupi otaq mat’inkupi marcasqa kanankupaq, 17  chhaynapi marcasqa kaqkunalla rantinankupaq vendenankupaqpas. Chay marcaqa manchay phiña animalpa sutinmi, otaq sutinpa numeron. 18  Pipas allin yuyayniyoq kaqqa allinta tanteachun chay manchay phiña animalpa numeronta, chay numeroqa runaq numeronmi, 666 numerotaqmi kanpas. Pichus yachayniyoq kaqllan chaytaqa entiendenqa.

Uraypi willakuykuna

Leopardoqa puma jinan, ichaqa ch’eqchin.
Chaypiqa rimashan Adán Evaq wawankunamantan.