Apocalipsis 12:1-17

  • Juj warmimanta, juj qhari wawamanta, dragonmantawan (1-6)

  • Miguel guerrata ruwan dragonwan (7-12)

    • Dragonta allpa pachaman wijch’uykapun (9)

    • Saqraqa yachanmi pisillaña tiempon kasqanta (12)

  • Warmita dragón qatikachasqanmanta (13-17)

12  Chaymantataq janaq pachapi juj jatun señal karan: Chaypin juj warmi intiwan p’achasqa kashasqa, chakinpa uranpitaq killa kashasqa, umanpitaq chunka iskayniyoq ch’askakunayoq corona kashasqa,  chaymantapas onqoqmi payqa kasqa. Chaymi onqokunan patapiña kashaspa nanaywan ñak’arispa qapariykuran.  Kallarantaqmi juj señalpas: Chaypin sansa jina puka color juj jatunkaray dragón rijurimushasqa, chay dragonqa qanchis umayoq chunka waqrakunayoq iman kasqa, sapanka umanpitaq juj corona kasqa.  Chupanwanmi chay dragonqa llapa ch’askakunamanta kinsa kaq parteta aysaran, allpa pachamantaq wijch’uykuranpas. Chay dragonqa onqokunan patapiña kashaq warmiq ñaupanpin sayaykuran, chhaynapi chay warmi onqokuqtin wawanta mijurapunanpaq.  Chay warmin juj qhari wawata onqokuran, chay wawan llapa nacionkunata fierro varawan michinqa. Chay wawaqa usqhayllan apasqa karan trononpi tiyashaq Diosman.  Chay warmitaq ch’inneqman ayqekuran, maypichus Dios paypaq preparapuran chayman, chaypi 1.260 p’unchay mijuchisqa kananpaq.  Janaq pachapitaq juj guerra qallariran, Miguelmi* angelninkunapiwan dragonwan maqanakuran, dragontaq angelninkunapiwan paykunawan maqanakuran,  ichaqa vencesqan karanku,* chaymi janaq pachapi kanankupas manaña atikuranñachu.  Jinan chay dragonqa urayman wijch’uykusqa karan, paymi chay ñaupa mach’aqwayqa, “Saqra, Satanás” nisqaqa, allpa pacha runakunatapas pantachiqqa; arí, allpa pachamanmi payqa wijch’uykusqa kapun, angelninkunapas paywan kuskan wijch’uykusqa kapunku. 10  Chayllamanmi janaq pachamanta juj fuerte kunkata uyarini: “¡Ñan qallarinña Diosninchispa salvacionninpas, atiyninpas, gobiernonpas, Cristonpa atiyninpas; ñan wayqenchiskunata Diospa ñaupanpi tuta-p’unchay tumpaqqa urayman wijch’uykusqaña kapun! 11  Paykunaqa corderoq yawarninwan, imachus willasqankuwan iman payta venceranku. Wañuy patapiña kashaspapas manan vidanku chinkachiytapas paykunaqa manchakurankuchu. 12  Chayrayku, ¡kusikuychis janaq pachapi kaqkuna! Ichaqa, ¡imaraqchá kanqa allpa pachamanta, lamar-qochamantapas! Saqran sinchi phiñasqa qankunaman uraykamushan, yachanmi payqa tiempon pisillaña kasqantapas”, nispa nimuqta. 13  Chay dragontaq allpa pachaman wijch’uykusqa kaspa, chay qhari wawata onqokuq warmita qatikachayta qallariran. 14  Chay warmimanmi ichaqa juj jatun ankaq iskaynin rafran qosqa karan, chaywan ch’inneqman volananpaq, maypichus paypaq juj sitio preparasqa karan chayman rinanpaq; chaypin payqa mach’aqwaymanta karupi mijuchisqa kanan karan juj tiempo, iskay tiempo, kuskan tiempo ima. 15  Chay mach’aqwaymi ichaqa chay warmiq qhepanman unuta aqturimuran mayuta jinaraq, chhaynapi chay warmi unuwan jeq’epaspa wañunanpaq. 16  Jinan allpaqa warmita yanapaq jamuspa siminta kichariran, jinaspa chay dragonpa aqtusqan mayuta millp’upuran. 17  Chay dragontaq sinchita phiñakuran chay warmipaq, chaymi chay warmiq mirayninmanta qhepaqkunawan guerra ruwaq pasaran; paykunan Diospa kamachikuyninta kasukuspa kausanku, Jesusmanta willanankupaqtaqmi churasqapas karanku.

Uraypi willakuykuna

“Miguel” sutiqa “¿pitaq Dios jinari kanman?” ninantan nin.
Chaytaqa “pay [otaq dragón] vencesqa karan” nispapas t’ijrakullanmantaqmi.