Gálatas 4:1-31

  • Kamachi kanankumantaqa Diospa wawankunaña kasqankumanta (1-7)

  • Galacia llaqta iñiqkunapi Pabloq interesakusqanmanta (8-20)

  • Agarwan Sarawan iskay rimanakuyta representasqankumanta (21-31)

    • Wichaypi kaq mamanchis Jerusalenqa libren (26)

4  Herencia chaskiqchus wawallaraq kanman chayqa, manan wasipi kamachimantaqa imapipas maschu kanman paypaña tukuy ima kanman chaypas ¿riki?  Aswanmi payqa taytanpa señalasqan p’unchaykama cuidaqkunaq, mayordomokunaq makillanpiraq kashan.  Chhaynallataqmi ñoqanchiswanpas karan, wawa jinallaraq kashaspanchisqa kay pachaq ruwasqanman jina piensasqanman jinan kausaq kanchis.  Ichaqa tiempo junt’akuqtinmi Diosqa Churinta kachamuran. Payqa juj warmimantan naceran, kamachikuy simiq nisqanman jinataqmi kausaranpas,  chhaynapi kamachikuy simiman jina kausaqkunata rantispa librananpaq; chhaynapitaq Diospa adoptasqan wawakuna kananchispaq.  Wawankunaña kasqaykichisraykun Diosqa Churinman qosqan santo espirituta noqanchispa sonqonchismanpas churan, chay espiritun rimachiwanchis “¡Abba,* papáy!” nispa.  Chhaynaqa manañan kamachiñachu kankichis aswanpas Diospa wawanñan. Wawanñataq kankichis chayqa, qankunapas payraykun herenciata chaskinkichis.  Manaraq Diosta reqsishaspan ichaqa yanqa dioskunaq kamachin karankichis.  Kunanqa ñataq Diosta reqsinkichisña, otaq nisunman ñataq paypa reqsisqanña kankichis chayqa, ¿imaynapitaq qankunari mana valeq yanqa ruwaykunaman kutirishankichis? ¿Wajmantachu chaykunaq kamachin kayta munashankichis? 10  ¿Imaynapitaq qankunari wajmanta waqaychashankichis wakin p’unchaykunata, mosoq killakunata, fiestakunata, jatun watakunatapas? 11  Yanqapaqchus jina kallpachakurani qankunata yanapanaypaqqa. 12  Wayqe-panaykuna, imaynan kunan kashankichis chhaynan noqapas ñaupaqqa karani, ichaqa cambiapuranin, chayraykun valekuykichis qankunapas noqa jina cambiapunaykichispaq. Ñaupaqqa manamá riki qankunaqa millaytachu tratawarankichis. 13  Yachasqaykichis jina, onqosqayraykun ñaupaqpiqa allin willakuykunata willaraykichis. 14  Sasa aguantayña qankunapaq onqoyniy karan chaypas, manamá riki pisichawarankichischu ni millakuwarankichispaschu;* aswanpas Diospa angelninpas kayman karan, Cristo Jesuspas kayman karan jinataraqmá riki sumaqta chaskiwarankichis. 15  ¿Maytaq chhayna kusisqa chaskiwasqaykichisri? Chay tiempopiqa, atiwaqchis karan chayqa, ñawiykichista orqorukusparaqchá noqaman qowankichisman karan. 16  ¿Enemigoykichista jinachu qhawariwankichis cheqaqllata imatapas nisqayrayku? 17  Chay runakunaqa tukuy atisqankutan ruwanku sonqoykichista suwanasuykichispaq, ichaqa manan allinniykichista munaspachu; aswanpas noqamantan t’aqayta munashasunkichis, chhaynapi paykunaman k’askakunaykichispaq. 18  Ichaqa pipas allinniykichista munaspa tukuy tiempo qankunapi interesakun, manataq noqa qankunawan kashallaqtiychu interesakun chayqa, allinmi. 19  Wawallaykuna, qankunaraykun onqokushaq warmi jinaraq wajmanta sinchi nanaypi kashani, chhayna nanayllapichá riki kashasaq Cristo jina kanaykichiskama. 20  Maytan munayman kunanpacha qankunawan chaypi kashayta, chhaynapi qankunata munayllata rimapayashanaypaq. Manan allintachu entiendeshani imapunichus pasashasunkichis chayta. 21  Yau kamachikuy simita kasukuy munaqkuna, ¿manachu yachankichis kamachikuy simiq imachus nisqanta? 22  ¿Manachu chaypi willashan Abrahanqa iskay wawayoq kasqanmanta? Jujninmi naceran kamachi warmimanta jujnintaq libre kaq warmimanta. 23  Kamachi warmimanta naceq wawanqa lliu runakuna jinallan naceran,* libre kaq warmimanta naceqmi ichaqa Diospa promesanman jina naceran. 24  Chay pasasqanmi rikuchiran imachus qhepaman pasanan karan chayta. Chay warmikunan representan iskay acuerdo ruwakusqanta, jujninmi representan Sinaí orqopi acuerdo ruwakusqanta, payqa Agarmi, paymi kamachi kanankupaq wawakunata onqokun. 25  Chhaynaqa, Agarqa Arabia ladopi Sinaí orqotan representan, kunan tiempotaq representan Jerusalén llaqtata, chay llaqta llapa wawakunantin kamachi kasqanrayku. 26  Wichaypi kaq Jerusalenmi ichaqa libre, paymi noqanchispa mamanchisqa. 27  Diospa simin qelqapipunin nishan: “Kusikuy mana wijsallikuyta atiq warmi, ancha kusikuymanta qapariy onqokuy nanayta mana sienteq warmi, mana wijsallikuyta atiq warmin askha wawakunayoq kapun qosayoq warmimantaqa”, nispa. 28  Chhaynaqa, wayqe-panaykuna, qankunaqa Diospa prometesqanman jina wawakunan kankichis, imaynan Isaacpas karan chhayna. 29  Ichaqa imaynan lliu runakunaq nacesqanman jinalla naceq wawaqa* espirituman jina naceq wawata qatikacharan, chhaynallataqmi kunanpas kashan. 30  Ichaqa, ¿ima nishanmi Diospa simin qelqapiqa? “Chay kamachi warmita wawantawan qarqoy, manan kamachi warmiq wawanqa libre kaq warmiq wawanpa herencianta chaskiysikunqachu” nispan nishan ¿riki? 31  Chhaynan, wayqe-panaykuna, noqanchisqa manan kamachi warmiq wawankunachu kanchis, aswanpas libre kaq warmiq wawankunan kanchis.

Uraypi willakuykuna

“Abba” nisqa simiqa arameo rimaymantan jamun, chayqa “papáy” ninantan nin. Chhaynatan wawakuna munakuywan respetowan papankuta niqku.
Chaypiqa “ni thoqaykuwarankichispaschu” nillanmantaqmi.
Griego rimaypiqa “aychaman jinallan naceran” ninmi.
Griego rimaypiqa “aychaman jinalla naceq wawaqa” ninmi.