Gálatas 1:1-24

  • Napaykuy (1-5)

  • Jujlla allin willakuyqa kasqanmanta (6-9)

  • Pabloq willasqan allin willakuykunaqa Diosmantan jamun (10-12)

  • Pabloq cristianoman tukupusqanmanta, predicayta qallarisqanmantawan (13-24)

1  Noqa apóstol Pablon qelqamushaykichis. Apóstol kanaypaqqa manan runachu kamachiwaran ni pichu churawaran, aswanpas Jesucriston, payta kausarichiq Yayanchis Diospiwan.  Arí, noqa Pablon noqawan kashaq llapa iñiqmasikunapiwan qankuna Galacia provinciapi iñiq t’aqakunaman qelqamushaykichis:  Qankunawan kachun Yayanchis Diospa, jinallataq Señor Jesucristoq ancha sumaq sonqo kaynin thaj kayninpas.  Jesusmi Diosninchis Yayaq munayninman jina juchanchiskunarayku wañuran, chhaynapi kay tiempopi millay kausaymanta librawananchispaq.  Wiñay-wiñaypaq Diosqa jatunchasqa kachun. Amén.  Maytan admirakuni waj willakuyta allin willakuykunata jina chaskispaykichis Cristoq ancha sumaq sonqo kayninwan wajasuqniykichis Diosta manaraq imapi saqerparishasqaykichismanta.  Ichaqa manan kanchu waj allin willakuykunaqa, aswanmi jujkuna pantachiyta munashasunkichis Cristomanta allin willakuykunata q’ewispa.  Chayrayku, noqaykumanta mayqenña otaq janaq pachamanta angelña noqaykuq willasqayku allin willakuykunamanta waj willakuyta allin willakuykunata jina willasunkichis chayqa, ñakasqa kachun.  Jujtawan nimusaykichis: Pipas chaskisqaykichis allin willakuykunamanta waj willakuyta allin willakuykunata jina willasunkichis chayqa, piña kachun chaypas ñakasqa kachun. 10  Noqaqa manan runakunaq allin qhawariwanantachu munani, aswanpas Diospa allin qhawariwanantan, arí, noqaqa manan runatachu kusichiyta munani; runakunata kusichispallaraqchus kashayman chayqa, manachá Cristoq kamachinchu kayman. 11  Wayqe-panaykuna, kaytan yachanaykichista munani: Qankunaman willasqay allin willakuykunaqa manan runamantachu jamun. 12  Arí, chay willakuytaqa manan pi runachu willawaran ni yachachiwaranpas, aswanmi llapa chaykunataqa kikin Jesucristo willawaran. 13  Qankunaq yachasqaykichis jina, judío religionpi kashaspayqa nishutan qatikachaq kani Diospa iñiq t’aqanta, imaymana mana allinkunatan paykunata ruwaq kani. 14  Chaymantapas chay religionpi kashaspayqa nacionniypi wiñaymasiykunamantapas aswan allintaraqmi ñauparisharani may tukuy sonqoywanpuni ñaupa taytaykunaq costumbrenkunata junt’aspa. 15  Ichaqa, nacechiwaqniy jinallataq ancha sumaq sonqo kayninpi wajawaqniy Diosqa allinpaqmi qhawariran 16  Churinmanta allin willakuykunata nacionkunaman willanayta, chhaynapi chay nacionkuna Churinta reqsinankupaq. Chayta ruwanaypaq ajllawashaqtinqa manan noqaqa pi runamanchu phawarani imatapas imayna ruwanaypaq tapukuq, 17  nitaq Jerusalén llaqtamanchu wicharani noqamanta ñaupaqtaña apóstol kaqkunawan tupaq, aswanmi Arabia ladoman rirani, chaymantataq Damasco llaqtaman kutirani. 18  Kinsa wata qhepamanñan Jerusalén llaqtataqa wicharani Cefaswan* tupaq, chaypin paywan qhepakurani chunka pisqayoq p’unchay. 19  Ichaqa manan wakin apostolkunawanqa tupanichu, Señorpa wayqen Santiagollawanmi tupani. 20  Kay qelqamusqaykunaqa cheqaqmi, kaytaqa Diospa ñaupanpin mana llullakuspa nimushaykichis. 21  Chaykuna qhepatataq Siria, Cilicia ladokunaman rirani. 22  Judea provinciapi Cristoq iñiq t’aqankunapiqa manaraqmi mayqenpipas reqsisqachu karani. 23  Paykunaqa: “Ñaupaqpi qatikachawaqninchis runan kunanqa chinkachiy munasqan iñiymanta allin willakuykunata willaspa purishan”, nispa rimaqllatan noqamantaqa uyarisqaku. 24  Jinan paykunaqa noqa jawa Diosta jatuncharanku.

Uraypi willakuykuna

Chayqa apóstol Pedroq jujnin sutinmi.