2 Timoteo 3:1-17

  • Tukukuy p’unchaykunapi sasa tiempokuna kananmanta (1-7)

  • Pabloq ejemplonta allinta qatikunamanta (8-13)

  • ‘Qaqata sayay imatachus allinta yachachirasunkiku chaypi’ (14-17)

    • Diospa siminpi qelqasqa kaqkunaqa llapanmi Diospa yuyaychasqan (16)

3  Kayta allinta yachay: Tukukuy p’unchaykunataqa manchakuy sinchi sasa tiempokunan chayamunqa.  Runakunan kanqa paykuna kikinkuta munakuqkuna, qolqe sonqokuna, alabakuqkuna, jujkunata pisichaspa uma oqariqkuna, millayta k’amiqkuna, tayta-mamankuta mana kasukuqkuna, mana agradecekuqkuna, jujkunapaq mana junt’aq kaqkuna,*  runamasinkuta mana munakuqkuna, mana uyakuq k’ullukuna, yanqa tumpaqkuna, cuerponkuta mana kamachiqkuna, sinchi k’araq sonqokuna, allin kaqta mana munakuqkuna,  traicionerokuna, tercokuna, sinchita jatunchakuqkuna, Diosta munakunankumantaqa aycha kusichiyllapi puriyta munaqkuna;  Dios sonqo runamanmi rijch’akunqakupas, ichaqa manan chayman jinachu kausanqaku. Qanqa aman jayk’aqpas chhayna runakunawanqa juñukunkichu.  Chhayna runakuna ukhumantan lloqsimun engañaqkuna, paykunan pisi kallpayoq juchasapa warmikunaq wasinman engañollawan jaykuspa chay warmikunaq sonqonta suwanku; chay warmikunaqa sonqonkuq munapayasqanpa kamachinmi kanku.  Estudiashallankun kanpas, ichaqa manapunin entiendeyta atinkuchu cheqaq yachachikuytaqa.  Chay runakunaqa imaynan Janespas Jambrespas Moisés contra sayariranku chhaynatan cheqaq yachachikuypa contranpi sayarishanku. Chaymantapas, chay runakunaqa ismusqa yuyayniyoqmi kanku, manataqmi iñiyman jinachu kausanku, chaymi Diosqa mana paykunata chaskinchu.  Ichaqa lliumi reparanqaku chay runakunaq mana yuyaywan ruwasqankuta, imaynan chay iskay runakunaqtapas repararanku jinata, chaymi chay runakunaqa manaña imatawanpas ruwayta atinqakuchu. 10  Qanmi ichaqa tukuy yuyayta churashanki imachus yachachisqayman, imaynachus kausasqayman, imachus ruway munasqayman, imayna iñiqchus kasqayman, pacienciakuq kasqayman, munakuq kasqayman, aguantaq kasqaymanpas. 11  Chaymantapas, yachasqayki jina, Antioquía llaqtapi, Iconio llaqtapi, Listra llaqtapi iman noqaqa qatikachasqa ñak’arichisqa ima karani, Señortaqmi librawaran lliu chaykunamantaqa. 12  Pipas Cristo Jesuswan jujllachasqa kaspa Diosta serviqqa* qatikachasqallataqmi kanqa. 13  Sinchi millay runakunapas engañaq runakunapas aswan-aswan mana allinmanmi tukupunqaku, engañaspanku engañachikuspanku ima. 14  Qan ichaqa qaqata sayay imatachus allinta yachachirasunkiku, iñinaykipaqpas convencerasunkiku chaypi; chaymantapas, qanqa allintamá riki yachashanki pikunachus yachachirasunki chaytaqa. 15  Chaymantapas wawacha kasqaykimantapachan ch’uya qelqakunamantaqa yacharanki ¿riki? Chaykunan yanapasunki yachayniyoq kanaykipaq, chhaynapi Cristo Jesuspi iñispa salvasqa kanaykipaq. 16  Diospa simin qelqapi qelqasqa kaqqa llapanmi Diospa yuyaychasqan, chaymi chaykunaqa allinpuni yachachinapaq, anyanapaq, imatapas allinyachinapaq, chanin kaywan wanachinapaqpas; 17  chhaynapi Diosta serviq runaqa allin preparasqa kananpaq, arí, tukuy allin ruwaykunapaq allin-allin preparasqa kananpaq.

Uraypi willakuykuna

Chaypiqa “Diospaq mana junt’aq kaqkuna” nillanmantaqmi.
Chaypiqa “Dios sonqo kaqqa” nillanmantaqmi.