2 Timoteo 2:1-26

  • Allin willakuyta junt’aq sonqo runakunaman yachachinamanta (1-7)

  • Allin willakuykunarayku ñak’ariy kananmanta (8-13)

  • Diospa siminta allinta yachachinamanta (14-19)

  • Wayna-sipaskunaq munapayayninmanta ayqena (20-22)

  • Manan discutinachu contranchispi kaqkunawanqa (23-26)

2  Chhaynaqa, wawáy Timoteo, qanqa kallpachakushallay Cristo Jesuspa rikuchisqan ancha sumaq sonqo kaywan,  imakunatachus noqamanta uyariranki chaykunawan ima; chaykunamantaqa askha runakunan “chhaynapunin” nirankupas, chaykunata yachachiy junt’aq sonqo runakunaman, chhaynapin paykunapas allin preparasqa kanqaku jujkunata yachachinankupaq.  Cristo Jesuspa allin soldadontaq kanki chayqa, listo kashay imapipas ñak’arinaykipaq.  Yachasqayki jinapas, manan pipas soldado kashaspaqa negocio ruwaykunaman jaykunmanchu, mana chayqa soldado kananpaq wajaqninchá mana allinpaq qhawarinman.  Carrera phawaypipas* manachus pipas reglamentoq nisqanman jina phawanman chayqa, manan chaskinmanchu premiotaqa.*  Tukuy kallpanwan chajrata llank’aqpas payraqmi ñaupaqtaqa chajraq rurunta mijunan.  Allinta piensay imatachus nishayki chaykunapi; Señormi tukuy imatapas entiendechisunki.  Yuyariy Jesucristoqa wañusqamanta kausarichisqa kasqanta Davidpa mirayninmanta kasqantapas, chay allin willakuykunatan noqaqa willashani,  chayraykun ñak’arishanipas, chayraykutaqmi ima mana allintapas ruwayman karan jinaraq carcelpipas wisq’asqa kashani. Diospa siminmi ichaqa mana watasqachu kashan. 10  Chaymi ajllasqakunarayku tukuy imata aguantashani, chhaynapi paykunapas Cristo Jesuswan jujllachasqa kaspa salvasqa kanankupaq, wiñaypaq jatunchasqa kanankupaqwan. 11  Kay nisqayqa cheqaqpunin: Paywan kuskachus wañusun chayqa, paywan kuskallataqmi kausasun; 12  tukuy imatapas aguantasun chayqa, paywan kuskan rey kasun; payta negasun chayqa, paypas negawallasuntaqmi; 13  manaña paypa nisqanta junt’asunmanchu chaypas, payqa junt’anqapunin imachus rimasqantaqa; payqa manapunin imatapas pay kikinpa contranpiqa ruwanmanchu. 14  Yuyarichishallay chaykunata paykunaman, Diospa ñaupanpi yachachishallay ama ima yachachikuy jawapas jap’inakushanankupaq, chay ruwayqa manan imapaqpas valenmanchu, aswanmi uyariqkunaq mana allinninpaq kanman. 15  Tukuy atisqaykita ruway Diospa allin qhawarisqan kanaykipaq, mana imamanta p’enqakuspa allin llank’aq kanaykipaq, Diospa simintapas allinta yachachinaykipaqwan. 16  Ichaqa amapunin uyarinkichu Dios contra mana valeq yanqa rimaykunataqa, chaykunaqa Diosta mana respetaymanmi apan, 17  gangrena jinataqmi chay rimaykunaqa mast’arikunpas. Himeneowan Filetowanmi chay mast’ariqkunamanta wakin kashanku. 18  Chay runakunaqa cheqaq yachachikuytan saqepunku “kausarimpuyqa ñan pasarunña” nispanku, chhaynapitaq wakintapas iñiyninkupi urmachipushanku. 19  Chhaynaña kaqtinpas Diospa allin cimiento churasqanqa mana kuyurispan qaqata sayashan, chay cimientopin sellasqa kashan: “Jehová Diosqa reqsinmi paypa kaqkunataqa”, “pipas Jehová Diospa sutinta wajakuqqa saqepuchun mana allin ruwaykunata”, nisqa. 20  Yachasqayki jina, jatun wasipiqa manan qorimanta, qolqemanta serviciokunallachu kan, kallantaqmi k’ullumanta, t’urumanta serviciokunapas; wakinmi allin kaq ruwaykunapi utilizanapaq servin, wakintaq p’enqakunapaq jina ruwaykunapi utilizanapaq. 21  Pipas chay p’enqakunapaq jina ruwaykunapi utilizanapaq serviciokunamanta t’aqasqa kanqa chayqa, allin kaqkunata ruwanapaq servicio jinan kanqa; payqa ch’uyanchasqan kanqa, dueñonpaq allin servicio, tukuy allin kaqkunata ruwanapaq preparasqa ima. 22  Chayrayku ayqekuy qanqa wayna-sipaskunaq munapayayninmanta, aswanpas ch’uya sonqowan Señorta wajakuqkunawan kuska kallpachakuy chanin kanaykipaq, allin iñiq kanaykipaq, munakuq kanaykipaq, thaj kausaq kanaykipaqwan. 23  Chaymantapas, t’aqakuy mana valeq yanqa discutiykunamanta; yachasqayki jinapas, chaykunaqa maqanakuykunallatan jatarichin. 24  Señorpa kamachinqa manan imaraykupas maqanakunanchu, aswanmi payqa llapa runakunapaq llamp’u sonqo kanan; chaymantapas allin preparasqan kanan yachachinanpaq, imataña ruwaqtinkupas manan kutipakunanchu, 25  mana kasukuqkunatapas sumaq sonqowanmi yachachinan. Yaqapas Diosqa chay mana kasukuqkunata yanapanman juchankumanta pesapakunankupaq, chaymanta cheqaq kaqta allinta reqsinankupaq, 26  chhaynapi Saqraq jap’isqan kashasqankuta reparanankupaq, jinaspa yuyayninkuman kutispa chay Saqraq trampanmanta ayqenankupaq.

Uraypi willakuykuna

Griego rimaypiqa “pujllaykunapipas” ninmi, chayqa imaymana clase deporte ruwaymantan rimashan.
Griego rimaypiqa “coronataqa” ninmi.