2 Corintios 9:1-15

  • Imaraykuchus qoykukuq kanamanta (1-15)

    • Diosqa kusisqa qoqtan munakun (7)

9  Iñiqmasikunapaq* yanapayta juñuymantaqa manan qelqamunayraqchu.  Noqaqa allintan yachani qankunaqa yanapakunaykichispaq listo kashasqaykichista, chhayna kasqaykichismantan noqaqa alabakuni Macedoniapi kaqkunaman, imaynas qankuna Acaya provinciapi kaqkunaqa juj wataña listo kashankichis yanapakuyta apachinaykichispaq chaymanta; chhayna tukuy sonqowan jujkunata yanapasqaykichismi yaqa llapankuta kallpachan.  Ichaqa wakin iñiqmasikunatan kachamushani, chhaynapi qoykukuq sonqo kasqaykichismanta alabakusqaykuqa mana yanqapaqchu kananpaq, aswanpas qankunamanta rimasqayman jina listo kashanaykichispaq.  Mana chayqa paqtapas Macedoniamanta wakin iñiqmasikuna noqawan kuska jamunkuman, jinaspa mana alistasqata jap’isunkichisman, chhayna kanman chayqa, p’enqaypichá qhepaykuman qankunapi confiasqaykumanta; qankunapas p’enqaypichá qhepawaqchis.  Chayraykun noqaqa chay iñiqmasikunata ñaupachimushani, chhaynapi mana mich’akuspa qonaykichispaq prometekusqaykichis yanapaykunata ñaupaqmantapacha alistashanankupaq; chhaynapin chayamunaykupaqqa listoña kashanqa qoykukuq sonqowan qosqa jina, manataq qechusqa jinachu.  Yachasqaykichis jina, pipas pisita t’akaqqa pisitan cosechanqa, askhata t’akaqmi ichaqa askhallatataq cosechanqa.  Chayrayku, sapanka imaynatachus sonqonpi yuyaykusqanman jina qochun, ama mala voluntadwanchu nitaq obligasqa jinapaschu, Diosqa kusisqa qoqtan munakun.  Chaymantapas, Diosqa atiyniyoqmi ancha sumaq sonqo kayninta astawanraq qankunaman rikuchinanpaq, chhaynapi mana jayk’aqpas imapas pisinasuykichispaq, aswanpas tukuy imaykichispas junt’asqalla kananpaq, chhaynapitaq tukuy allin ruwaykunata ruwanaykichispaq.  (Qelqapipas ninmi: “Payqa askhatan qon, wajchakunamanpas qonmi. Chanin kayninqa wiñaypaqmi kanqa”, nispa. 10  T’akaqman askha mujuta qoqqa mijunapaqpas t’antata qoqqa, askhatan mujuta qosunkichis t’akanaykichispaq, chanin kaqta ruwasqaykichismanta cosechasqaykichistapas askhayachinqan.) 11  Qankunaqa imaymanapin qhapaqyachisqa kashankichis, chhaynapi qankunapas imaymanapi qoykukuq kanaykichispaq; chay qosqaykichista jujkunaman rakiqtiykun paykunaqa Diosta “gracias” ninqaku. 12  Jujkunaq allinninpaq chay yanapay qoyqa manan iñiqmasikunata pisichikuyninkupi yanapanallapaqchu, aswanpas chay yanapayrayku Diosman askha runa graciasta qonankupaqwanmi. 13  Chay yanapayta qospaykichisqa imayna runachus kasqaykichistan rikuchinkichis, paykunataq Diosta jatunchanqaku Cristomanta allin willakuykuna willasqaykichisman jina ruwasqaykichisrayku, jinallataq paykunapaq lliu runapaqpas qoykukuq sonqo kasqaykichisrayku ima. 14  Chaymantapas paykunaqa munakusunkichismi, Diosmantapas rogapusunkichismi, paypa ancha sumaq sonqo kaynin qankunapi kasqanrayku. 15  Diosman gracias kachun ancha sumaq regalonmanta.

Uraypi willakuykuna

Griego rimaypiqa “ch’uyakunapaq” otaq “santokunapaq” ninmi.