2 Corintios 12:1-21

  • Pabloman Señorpa rikuchisqan rijuriymanta (1-7a)

  • Pablopi kiska kasqanmanta (7b-10)

  • Pabloqa apostolpaq creekuqkunamanta mana menoschu kasqanmanta (11-13)

  • Pablo Corinto llaqta iñiqkunapi interesakusqanmanta (14-21)

12  Alabakunaymi kashan. Chay ruway manaña allinchu chaypas, Señorpa rikuchiwasqan rijuriykunamanta imakunatachus willawasqanmantawanmi rimasaq.  Reqsinin Cristowan jujllachasqa juj runata, paymi chunka tawayoq wataña kinsa kaq cieloman oqarparisqa karan, ichaqa aycha cuerpopichus kasharan icha manachus chaytaqa manan yachanichu, Dioschá yachan.  Arí, reqsinin chay runataqa, paraisomanmi oqarparisqa karan, ichaqa aycha cuerpopichus kasharan icha manachus chaytaqa manan yachanichu, Dioschá yachan.  Chay paraisopi kashaspan payqa uyariran mana rimay atina simikunata, arí, mana willana simikunata.  Chay runamantan alabakusaq, manan noqamantachu; ichaqa alabakunay kaqtinqa pisi kallpa kasqallaymantan alabakusaq.  Alabakuymanña chaypas, cheqaqllatan imatapas niyman, chaymi alabakuspaqa mana mana yuyayniyoqchu kashayman. Ichaqa manan chaytaqa ruwasaqchu, chhaynapi ama pipas sinchi allinpaq qhawariwashananpaq, aswanqa imatachus noqapi rikun imatachus noqamanta uyarin chayman jinalla qhawariwananpaq,  manataq ancha allin rijuriykuna rikusqayman jinachu qhawariwananpaq. Ama sinchi jatunpaq qhawarikunaypaqmi sinchi nanay noqapi kashan kiska jina, chay kiskaqa Satanaspa angelninpas ch’aqlakachawashanman jinan, chhaynapi ama sinchi jatunpaq qhawarikunaypaq.  Chaymi noqaqa kinsa kutita Señorta rogakurani chay kiskata noqamanta orqonanpaq,  paymi ichaqa niwan: “Ñamá riki rikuchishaykiña ancha sumaq sonqo kayniytaqa. Pisi kallpa kasqaykipin astawanraq atiyniyqa rikukunqa”, nispa. Chaymi noqaqa pisi kallpa kasqaymanta kusisqa alabakusaq, chhaynapi Cristoq atiynin noqapaq karpa jina kananpaq. 10  Chaymi kusikuni Cristorayku pisi kallpa kaspa, k’amisqa kaspa, pisichikuyta pasaspa, qatikachasqa kaspa, imaymana sasachakuykunapi tarikuspa ima. Pisi kallpa kaspan noqaqa atiyniyoq kani. 11  Qankunaq causaykichispin mana yuyayniyoq jina rimamushani. Noqaman sayapakuspa noqamanta allinta rimawaqchis karan chayqa, manan chhaynatachu rimamushayman karan. Manaña imachu kani chaypas, noqaqa manan imapipas pisichu kani chay sumaq apostolniykichiskunamantaqa. 12  Imaymanakuna ruwasqaywanmi qankunamanqa rikuchiraykichis apóstol kasqayta, imaymanata aguantaspa, señalkunata ruwaspa, admirakunapaq kaqkunata ruwaspa, milagrokunata* ruwaspa ima. 13  Qankunataqa manan imapipas gastachiraykichischu, chayllapin wakin iñiq t’aqakunawanqa mana igualchu kankichis. Icha, ¿mana allintachu ruwarani qankunata mana gastachispay? Chhayna kaqtinqa disculpaykuwaychis. 14  Kaywanqa ñan kinsa kutitaña jamusaq nishani, jamuspayqa manapunin kay kutipipas gastachisaykichischu. Noqaqa manan kaqniykichiskunatachu munani, aswanpas qankunatan munaykichis; yachasqaykichis jina, manan wawakunachu tayta-mamankupaqqa juñunanku aswanpas tayta-mamakunan wawankupaq juñunanku. 15  Noqaqa ancha kusisqan tukuy imaytapas qankunarayku* gastasaq, tukuy kallpaytawanraqmi tukusaqpas. ¿Mayta qankunata munakushaqtiychu qankuna pisita munakuwanaykichis? 16  Imaynaña kaqtinpas, ¿acaso noqari jayk’aqpas qankunata gastachiraykichischu, chaytaq qankunari niwashankichis: “Yuyaysapa kaspanmi engañollawan q’otuwanku”, nispaykichis? 17  Icha, ¿mayqen kachamusqay iñiqmasikunawanchu imatapas qechuchiraykichis? 18  Titota juj iñiqmasitawan kachamushaqtiypas, ¿Titoqa imallatapas qechurasunkichischu? ¿Manachu aswan juj sonqolla imatapas ruwarayku? ¿Manachu aswan juj yuyaylla tukuy imatapas ruwarayku? 19  Qankunaqa ñaupaykichispi defiendekunaykupaqpaschá piensashankichis, ichaqa manan chhaynachu; aswanpas Cristoq discipulon kaspan noqaykuqa Diospa ñaupanpi cheqaqta imatapas rimashayku. Munasqa wayqe-panaykuna, noqaykuqa qankunata kallpachanaykupaqmi tukuy imatapas ruwayku. 20  Ichaqa manchakushanin chayamuspay mana munasqayman jinachu qankunata tarinaymanta, noqapas mana munasqaykichisman jinachu kanaymantawan; chaymantapas manchakushanin qankuna ukhupi churanakuykuna, envidianakuykuna, k’araq phiñachinakuykuna, discutiykuna, millay k’aminakuykuna, cuento q’epi kaykuna, sinchi jatunchakuykuna, ch’aqwaykuna ima kashananmanta. 21  Manchakushallanitaqmi, chayamuqtiy Diosniy qankuna ukhupi p’enqachiwananmanta, chhayna kaqtinqa khuyaytachá llakikuyman chay askha iñiqkuna millakunapaq kaqkuna ruwasqankumanta, qhelli jucha* ruwasqankumanta, mana p’enqarikuspa juchallikusqankumantawan mana pesapakusqankurayku.

Uraypi willakuykuna

Griego rimaypiqa “atiywan ruwaykunata” ninmi.
Chaypiqa “almaykichisrayku” nillanmantaqmi.
Qhaway “explicasqa simikuna” nisqapi “qhelli jucha” nisqata.