1 Timoteo 5:1-25

  • Wayna-sipaskunata kuraqkunatapas imayna qhawarinamanta (1, 2)

  • Viudakunata yanapanamanta (3-16)

    • Mantenenan wasipi kaqkunataqa (8)

  • Allinta llank’aq umallikunata respetanamanta (17-25)

    • ‘Wijsa nanayniyki jawa juj chikan vinota ujay’ (23)

5  Aman kuraq runakunataqa mana respetowanqa rimapayankichu, aswanpas papaykita jinan sumaqta rimapayanki, waynakunatapas wayqeykita jinan sumaqta rimapayanki;  kuraq warmikunatapas mamaykita jinan sumaqta rimapayanki, sipaskunatapas panaykita jinan tukuy ch’uya sonqowan rimapayanki.  Mana piniyoq wajcha viudakunataqa sumaqtan qhawarinki.  Ichaqa pi viudaqpas kanman wawankuna nietonkuna chayqa, paykuna ñaupaqtaqa rikuchichunku Dios sonqo kasqankuta familiankuta cuidaspa; arí, paykunan tayta-mamankuman jatun mamankuman jatun papankumanpas qonanku imachus qopunankuta, chaytan Diosqa munan.  Wajcha viudan ichaqa mana piniyoq kaspa Diosllapiña suyakun, tuta-p’unchaytaqmi paymanta rogakuspa mañakuspa ima kan.  Cuerponpa munasqanman jina kausaq viudan ichaqa, kausashanña chaypas wañusqa kashan.  Chayrayku kay yachachikuykunataqa* yachachishallaypuni, chhaynapi mana juchachana kanankupaq.  Pipas cuidanan kaqkunaman mana qonchu imachus necesitasqankuta, astawanqa wasinpi kaqkunaman mana qonchu chayqa, iñiytan negashan, mana iñiqmantapas aswanraqmi kapun.  Listapiqa kananku soqta chunka watayoqmanta wichayman viudakunallan, ichaqa qhawarinaykin juj qhariq esposallanchus karan, 10  allin respetasqachus karan, allintachus wawankunatapas uywaran chayta, qhawarinallaykitaqmi jujkunatapas sumaqtachus chaskiq icha manachus, iñiqkunaq* chakintapas maqchiqchus icha manachus, llakisqakunatapas yanapaqchus icha manachus, allin kaqkunatapas ruwaqchus icha manachus chaykunatapas. 11  Sipasraq kaq viudakunatan ichaqa ama listaman churankichu, paqtapas cuerponkuwan vencechikuspa casarakuyta munankuman, jinaspa Cristomanta karunchakapunkuman. 12  Chhaynapitaq ñaupaq imachus ruway munasqankuta* saqesqankurayku juchachasqa kankuman. 13  Chaymantapas, paykunaqa qella kaytan yachankuman, jinaspa wasin-wasillantaña purinkuman, ichaqa manan qella kayllatachu yachankuman, yachallankumantaqmi cuento q’epi kayta, jujkunaq ruwanankuman chapukuytapas, chhaynapitaq mana rimanakunataraq rimankuman. 14  Chaymi noqaqa munayman sipasraq kaq viudakunaqa casarakunankuta, wawakunayoq kanankuta, wasinkupi kaqkunata allinta rikunankutawan; chhaynapi pipas contranchispi kaqqa ama noqanchismanta millayta rimananpaq. 15  Wakin viudakunaqa ñan allin ñanta saqespa Satanaspa qhepantaña purishankupas. 16  Mayqen iñiq warmiq familianpas viuda kanman chayqa, paymi yanapanan chay viudataqa, manan iñiq t’aqachu encargakunan, chhaynapi iñiq t’aqaqa mana piniyoq wajcha viudakunata yanapananpaq. 17  Umalliqkunaqa* allin respetasqan kananku allin umalliq kasqankurayku, astawanqa rimaspa yachachispa ima allinta llank’aqkunan chhayna respetasqaqa kananku. 18  Diospa simin qelqapas ninmi: “Aman torotaqa senq’apankichu erata sarushaqtinqa”, nispa; nillantaqmi: “Llank’aqmanqa qonapunin pagontaqa”, nispa. 19  Mayqen kuraq runatapas* juchachaqtinkuqa iskay otaq kinsa testigo kallaqtinmi uyarinki, mana chayqa aman uyarinkichu. 20  Lliupa ñaupanpin anyanki juchapi puriq runakunataqa, chhaynapi paykunapas manchakunankupaq. 21  Diospa ñaupanpi, Cristo Jesuspa ñaupanpi, ajllasqa angelkunaq ñaupanpi iman kamachiyki, allinta imatapas yachaspa ama pimanpas sayapakuspa kay kamachikuykunata junt’anaykipaq. 22  Aman piqpa umanmanpas apuraychu makiykitaqa churanki,* amallataq piqpa juchallikuqmasinpas kankichu; ch’uyatapunin kausanki. 23  Wijsa nanayniyki jawa, sapa kuti onqosqayki jawa ima amaña unutaqa ujaychu,* aswanpas juj chikan vinota ujay. 24  Wakin runakunaq juchanqa lliupa yachasqanmi, apurayllataqmi juchachasqapas kanku; wakin runakunaq juchanmi ichaqa chaymantaña yachakun. 25  Chhaynallataqmi allin ruwaykunawanpas, wakinqa lliupa yachasqanmi, wakintaq manaña yachakunchu chaypas, chaymantaqa yachakullan.

Uraypi willakuykuna

Chaypiqa “kay kamachikuykunataqa” nillanmantaqmi.
Griego rimaypiqa “ch’uyakunaq” otaq “santokunaq” ninmi.
Chaypiqa “ñaupaq promesankuta” nillanmantaqmi.
Qhaway “explicasqa simikuna” nisqapi “umalliq” nisqata.
Chaypiqa “mayqen umalliqtapas” nillanmantaqmi.
Chaypiqa “aman pitapas apurayqa nombrankichu” nillanmantaqmi.
Chaypiqa “ama unullataqa ujaychu” nillanmantaqmi.