1 Tesalonicenses 2:1-20

  • Tesalónica llaqtapi Pabloq predicasqanmanta (1-12)

  • Tesalónica llaqtapi runakuna Diospa siminta chaskisqankumanta (13-16)

  • Paykunata Pablo maytapuni rikuyta munasqanmanta (17-20)

2  Wayqe-panaykuna, qankunaqa yachankichispunichá jamusqaykuqa mana yanqapaqchu kasqanta.  Yachasqaykichis jina, Filipos llaqtaman chayamuspayku ñak’ariraykuña k’amisqaña karayku chaypas, Diospa kallpachasqan kaspan paymanta allin willakuykunata mana manchakuspa qankunaman willaraykiku, may jark’asqaña kasharayku chaypas.  Imata ruwanaykichispaqpas nisqaykuqa manan ima pantasqa yachaymantachu jamun, ni ima millakunapaq kaqmantapaschu, nitaqmi engañowanchu chaytaqa rimayku.  Aswanmi noqaykutaqa Dios allinpaq qhawariwaspanku allin willakuykunata willanaykupaq churawaranku, chaymi noqaykuqa mana runata kusichinaykupaqchu willashayku, aswanpas sonqoykuta t’aqwiq Diosta kusichinaykupaqmi willashayku.  Yachasqaykichis jina, noqaykuqa manan jayk’aqpas pitapas llunk’upayaqchu kayku, nitaqmi imaykichista munapayaspachu imatapas iskay uya jina ruwaq kayku. ¡Diospas chaytaqa allintan yachan!  Chaymantapas manan noqaykuqa runaq jatunchaynintachu maskhaq kayku, arí, manan qankunaq jatunchayniykichistachu ni piqpa jatunchaynintachu maskhaq kayku. Cristoq apostolninkuna kasqaykurayku maytaña gastachiykikuman karan chaypas, manan chaytachu noqaykuqa ruwarayku.  Aswanmi noqaykuqa llamp’u sonqowan sumaqta qhawariq kaykiku, imaynan ñuñuq warmiqa sumaqta wawachankunata cuidan chhaynata.  Qankunataqa anchatapunin noqaykuqa munakuykiku, chaymi mana Diosmanta allin willakuykunallatachu willayta munaraykiku, aswanpas vidaykutaraqmi* qankunarayku qoyta munarayku.  Wayqe-panaykuna, qankunaqa yuyashankichischá may tukuytachus may kallpawanchus llank’asqaykuta. Arí, noqaykuqa tuta-p’unchaymi llank’aq kayku, chhaynapi qankunaman Diosmanta allin willakuykunata willashaspaykuqa mana gastochu qankunapaq kanaykupaq. 10  Qankunaqa allintan yachashankichis Diospas allintan yachan qankuna iñiqkunawanqa ch’uyata, chaninta, mana juchachanata kausasqaykuta. 11  Yachasqaykichis jina, noqaykuqa sumaqtan yuyaychaq, kallpachaq, yachachiq ima kaykiku, imaynan juj taytapas wawankunawan ruwan chhaynata, 12  chhaynapi gobiernonman lliflli kayninman ima wajasuqniykichis Diospaq jina kausanaykichispaq. 13  Chayraykun noqaykuqa Diosman graciasta qoykupuni. Noqaykumanta Diospa siminta chaskishaspaykichisqa manan runaq siminta jinachu chaskirankichis, aswanmi Diospa siminta jinapuni, chay simin qankuna iñiqkunataqa yanapashasunkichis. 14  Wayqe-panaykuna, llaqtamasiykichiskunaq ñak’arichisqan kaspaqa Judeapi kaq Diospa iñiq t’aqankunatan qatikushankichis, paykunapas Cristo Jesuswan jujllachasqa kasqankuraykun judiokunaq ñak’arichisqan kashanku. 15  Chay judiokunan Señor Jesustapas, profetakunatapas wañuchiranku, paykunan noqaykutapas qatikachawashanku. Paykunaqa manan Diospa sonqontaqa kusichinkuchu, lliu runaq contranpitaqmi kashankupas, 16  chaymi waj nacionkunamanta runakunaman willanaykuta jark’awanku, chhaynapitaq jark’akushanku chay runakuna salvasqa kanankuta. Chayta ruwaspankun paykunaqa astawanraq yapashanku juchankuta, ichaqa kaypiñan kashan paykunapaq Diospa phiñakuynin. 17  Wayqe-panaykuna, juj kutin qankunamanta t’aqasqa kashaspaykuqa maytapunin noqaykuqa munasharayku qankuna rikuyta (ichaqa manan sonqoykumantachu t’aqasqaqa karankichis), 18  chaymi jamuyta munasharayku; noqa Pabloqa iskay kutitaraqmi jamuyta munasharanipas, ichaqa Satanasmi jark’aramuwanku. 19  Señorninchis Jesuspa chayamunan tiempopiqa, ¿pikunataq paypa ñaupanpi kanqaku suyakuyniyku, q’ochukuyniyku, ancha kusikunayku coronapas? ¿Manachu qankuna kankichis? 20  Arí, qankunan kankichis q’ochukuyniykupas kusikuyniykupas.

Uraypi willakuykuna

Chaypiqa “almaykutaraqmi” nillanmantaqmi.