1 Tesalonicenses 1:1-10

  • Napaykuy (1)

  • Iñiq kasqankumanta agradecekusqanku (2-10)

1  Noqa Pablo, Silvano,* Timoteo iman kay cartata apachimushaykichis qankuna Tesalónica llaqtapi kaq iñiq t’aqaman, arí, qankuna Dios Yayawan, Señor Jesucristowan ima jujllachasqa kaqkunaman. Qankunawan kachun Diospa ancha sumaq sonqo kaynin, thaj kayninpas.  Mañakushaspayku llapa qankunata yuyarispaykuqa “gracias” nillaykupunin Diosta.  Yayanchis Diospa ñaupanpin noqaykuqa yuyarillaykupuni tukuy sonqowan llank’asqaykichista, munakuywan llank’asqaykichista, Señorninchis Jesucristopi suyakusqaykichisrayku tukuy ima aguantasqaykichistawan.  Diospa munakusqan wayqe-panaykuna, noqaykuqa yachaykun pay ajllakusqasuykichista.  Qankunaman chayachimusqayku allin willakuykunaqa manan simillawanchu willasqa karan, aswanmi atiywan, santo espirituq yanapayninwan, mana iskayaywan ima willasqa karan; chaymantapas allintamá qankunaqa yachashankichis qankunawan kashaspayku imaynatachus qankunarayku kausarayku chaytaqa.  Imaymana sasachakuykunaña kashaqtinpas santo espirituq qosqan ancha kusikuywanmi qankunaqa Diospa siminta chaskirankichis, chhaynapin yacharankichis Señorninchis jina kayta, noqayku jina kaytawan.  Chaywanmi qankunaqa allin ejemplo karankichis Macedonia provinciapi kaq iñiqkunapaq, Acaya provinciapi kaq iñiqkunapaqwan.  Qankunaq willasqaykichiswanmi Jehová Diospa siminqa mast’arikuran, ichaqa manan Macedoniallapichu nitaq Acaya ladollapipaschu, aswanpas jinantinpin; Diospi iñisqaykichispas lliupin uyarikushan, chaymi manaña imapas rimanaykupaq kanñachu.  Paykunan aswanqa willawanku imaynas ñaupaqpi qankunaman chayamurayku chayta, imaynatas qankunapas idolokuna adorayta saqepuspa kausaq cheqaq Diosman kutirikurankichis payta kamachi jina servinaykichispaq chaytawan. 10  Paykunaqa willawallankutaqmi imaynas qankunaqa Diospa Churin janaq pachamanta jamunanta suyashankichis chaytapas; paytan Diosqa wañusqanmanta kausarichiran, paymi Diospa jamushaq phiñakuyninmantapas librawasunchis, payqa Jesusmi.

Uraypi willakuykuna

Paytan nikullantaq “Silas” nispa.