1 Pedro 5:1-14

  • Diospa ovejankunata michinamanta (1-4)

  • K’umuykukuq kanamanta, allinta cuidakunamantawan (5-11)

    • Tukuy llakipakuyninchistan Diosman saqena (7)

    • Saqraqa qaparishaq león jinan kashan (8)

  • Tukupay simikuna (12-14)

5  Kunanqa qankuna ukhupi umalliqkunatañataq* rimapayasaq. Umalliqmasiykichis jina, Cristoq ñak’arisqanta rikuq jina, qhepaman rikukunqa chay jatunchasqa kayman jaykuqmasiykichis jinan noqaqa qankunata valekuykichis:  Qankunaman encargasqa kaq Diospa ovejankunata allinta michiychis, paykunata qhawarinaykichispaqmi qankunaqa churasqa karankichis, ichaqa aman obligasqa jinachu chaytaqa ruwankichis, aswanpas Diospaq jinan ganaswan michinkichis, chaymantapas aman imatapas ganayta munaspachu chaytaqa ruwankichis, aswanpas tukuy sonqowan llank’aspan michinkichis.  Amallataqmi dueñochakuspachu michinkichisqa, aswanpas allin ejemplon paykunapaqqa kankichis, paykunaqa qankunaman encargasqa Diospa ovejankunan kanku.  Chhaynapin uma kaq michiq rikhurimuqtin ancha qhapaq, mana ch’akiq coronata chaskinkichis.  Kaqllataq qankunapas waynakuna, k’umuykukuywan kasukuychis kuraq qharikunata. Ichaqa llapaykichispas k’umuykukuq kaywan p’achakuychis, chhaynapi k’umuykukuywan qhawarinakunaykichispaq. Diosqa uma oqariqkunaq contranpin kashan, k’umuykukuq kaqkunamanmi ichaqa ancha sumaq sonqo kayninta rikuchin.  Chayrayku k’umuykukuychis ancha atiyniyoq Diosman,* chhaynapi tiempollanpi jatunchanasuykichispaq.  Chaymantapas tukuy llakipakuyniykichista payman saqeychis, payqa qankunamantan llakikun.  Allin yuyaywanpuni imatapas ruwaychis, allintapunitaq cuidakuychispas. Enemigoykichis Saqraqa qaparishaq león jinaraqmi purishan pillatapas millp’uruyta munaspa.  Ichaqa allin iñiywan pay contra qaqata sayaychis; yachasqaykichis jina, lliu kay pachapi iñiqmasikunapas qankuna jinan ñak’arishanku. 10  Ichaqa juj tiempolla ñak’arisqaykichis qhepamanmi Cristowan jujllachasqa kasqaykichisrayku wiñaypaq kaq lliflli kayninman wajasuqniykichis ancha sumaq sonqo kayta qoq Diosqa pay kikin entrenayta tukusunkichis. Paymi qaqata sayachisunkichis, paymi kallpasapaman tukuchisunkichis, payllataqmi allintapas tajachisunkichis. 11  Paypaq kachun wiñay-wiñaypaq atiyqa. Amén. 12  Junt’aq sonqo iñiqmasinchis Silvanoq* yanapayninwanmi kay pisi simikunata qelqamushaykichis, chhaynapi qankunata kallpacharinaypaq, ancha sumaq sonqo kayninta qankunaman Diospa rikuchisqanqa cheqaq kasqanta sut’ita rikuchinaypaqwan. Amapunin kuyurinkichischu chaymantaqa. 13  Kay Babilonia llaqtapi qankuna jina ajllasqa señoran* napaykuyta apachimushasunkichis, napaykamullasunkichistaqmi waway Marcospas. 14  Munakuy much’awan napaykunakuychis. Qankuna Cristowan jujllachasqa kaqkunapi thaj kay kachun.

Uraypi willakuykuna

Qhaway “explicasqa simikuna” nisqapi “umalliq” nisqata.
Griego rimaypiqa “Diospa atiyniyoq makinman” ninmi.
Paytan nikullantaq “Silas” nispa.
Kay textopi “señora” nispaqa Babilonia llaqtapi iñiq t’aqamantan rimashanman karan.