1 Pedro 3:1-22

  • Esposakunamanta qosakunamantawan (1-7)

  • Llakipayanakuymanta, thaj kayta maskhanamantawan (8-12)

  • Allin kaqkunarayku ñak’arinamanta (13-22)

    • Listollapunin kashana suyakuyninchismanta rimanapaq (15)

    • Bautismomanta, allin concienciayoq kaymantawan (21)

3  Kaqllataq qankunapas, esposakuna, qosaykichista k’umuykukuywan kasukuychis, chhaynapin Diospa siminta mana kasukuq qosaqa esposanpa allin kausasqanrayku mana ima rimapayasqalla kasukuq kanqa.  Arí, ch’uya kausasqanta, ancha respetoyoq kasqantawan rikuspan kasukuq kanqa.  Ama jawallaykichispichu munay kasqaykichisqa rikukuchun, arí, ama sumaq simp’akuyllapichu, qori adornokunawan churakuyllapichu, nitaq allin p’achakunawan churakuyllapichu munay kasqaykichisqa rikukuchun.  Aswanpas sonqoykichispi imaynachus kasqaykichispi rikukuchun munay kasqaykichisqa, chayrayku thaj kaywan llamp’u sonqo kaywan ima adornakuychis, chaytan Diosqa ancha valorniyoqpaq qhawarin, chaymantapas chay adornoqa mana ismuqmi.  Chhaynatan ñaupa tiempopi Diospi suyakuq ch’uya warmikunapas adornakuranku, paykunaqa k’umuykukuywanmi qosankuta kasukuqku,  imaynan Sarapas Abrahanta kasukuran chhaynata, payqa “señorníy” nispan Abrahanta niq. Sichus qankunapas allin kaqkunata ruwankichis, manataq imatapas manchakunkichischu chayqa, paypa ususinkunan kankichis.  Kaqllataq qankunapas, qosakuna, esposaykichista allinta reqsiychis, chhaynapi allin yuyaywan paykunawan kausanaykichispaq. Chaymantapas warmi kasqankurayku aswan llafsa vasota jina sumaqta qhawariychis, chhaynapi Diosmanta mañakuyniykichis ama jark’asqa kananpaq. Chaymantapas paykunaqa qankunawan kuskan kausay herencia regalota chaskinqaku.  Wayqe-panaykuna, llapaykichis juj yuyaylla kaychis, qankunapura llakipayanakuychis, wayqe-panantin jina munanakuychis, tukuy sonqowan khuyapayanakuychis, k’umuykukuqtaq kaychispas.  Amapuni mana allinmantaqa mana allinllawantaq pagaychischu, amallataq k’amisuqniykichistapas k’amiychischu. Aswanpas bendicionta paykunamanqa qoychis, chayta ruwanaykichispaqpunin qankunaqa wajasqa karankichis, chhaynapi qankunapas bendicionta chaskinaykichispaq. 10  “Pipas kausayta munakuqqa kusisqa kausaytapas munaqqa, mana allin rimaymanta qallunta allinta cuidakuchun, simintapas cuidakuchun ama ima engañotapas rimananpaq. 11  T’aqakuchun mana allin kaqmantapas, imachus allin kaqtataq ruwachun; thaj kayta maskhachun, kallpachakuchuntaq chay thaj kayta ama chinkachinanpaq. 12  Jehová Diospa ñawinqa allin kausaq runakunatan qhawashan, paykunaq rogakusqankutan ninrinpas uyarishan. Ichaqa mana allin ruwaqkunaq contranpin Jehová Diosqa* kashan.” 13  Tukuy sonqowanchus allin kaqkunata ruwankichis chayqa, ¿pitaq ima mana allintapas ruwasunkichisman? 14  Ñak’ariwaqchisña allin kaqta ruwasqaykichisrayku chaypas, kusisqa kaychis. Ichaqa aman manchakunkichischu imatachus runakuna manchakunku chaytaqa,* amataq llakipakunkichispaschu. 15  Aswanpas sonqoykichispi niychis: “Criston Señorqa, ch’uyan payqa”, nispa. Chaymantapas listollapuni kashaychis pipas suyakuyniykichismanta tapukuqtinqa chayman kutichinaykichispaq, ichaqa llamp’u sonqowan ancha respetowan iman chaytaqa ruwankichis. 16  Allin concienciawanpuni kausaychis, chhaynapi imataña runakuna qankuna contra rimanqaku chaypas, Cristota qatikuspa allinta kausasqaykichisrayku contraykichispi rimaqkunaqa p’enqaypi qhepanankupaq. 17  Diospa munayninchus kanman chayqa, allinmi qankunapaqqa kanman allin kaqkunata ruwaspa ñak’ariy, mana allin kaqkunata ruwaspa ñak’ariymantaqa. 18  Cristopas juj kutillatan wañuran juchata chinkachinanpaq, arí, chanin runan mana allin runakunarayku wañuran, chhaynapi Diosman pusanasuykichispaq. Payqa aycha cuerpopin wañuran, espíritu cuerpopitaq kausarichisqa karan. 19  Chaymantataq preso kashaq espiritukunata predicaq riran, 20  paykunaqa manan kasukurankuchu Noepa tiemponpi Dios pacienciawan suyakushaqtin, chay tiempopin arcapas ruwakusharan, chay arcapin pisi runakunalla unumanta librasqa karanku, arí, pusaq almakunallan* librasqa karanku. 21  Chay pasasqanqa bautismowanmi tupan. Bautismon kunanqa qankunatapas Jesucristoq kausarimpusqanwan salvashasunkichis. Bautismoqa manan aychapi qhellita chinkachiychu, aswanpas Diosmanta allin concienciata mañakuymi. 22  Payqa janaq pachatan ripuran, kunantaq Diospa paña ladonpi kashan; paymanmi k’umuchisqa karan angelkunapas, autoridadkunapas, atiyniyoq kaqkunapas.

Uraypi willakuykuna

Griego rimaypiqa “Jehová Diospa uyanqa” ninmi.
Chaytaqa “aman manchakunkichischu runakunaq amenazasqantaqa” nispapas t’ijrakullanmantaqmi.
Chaypiqa “runakunallan” nillanmantaqmi.