1 Pedro 2:1-25

  • Diospa siminmantan yarqachikuna (1-3)

  • Kausaq rumikuna espiritual wasiman perqasqa kasqankumanta (4-10)

  • Kay pachapiqa forastero jina kausanamanta (11, 12)

  • Pikunatachus kasukunamanta (13-25)

    • Criston noqanchispaq allin ejemplo (21)

2  Chayrayku, chinkachiychis qankunamanta tukuy mana allin kaqta, llullakuyta, iskay uya kayta, envidiakuyta, jujkunamanta millay rimayta ima.  Chayllaraq naceq wawakuna jina Diospa simin qelqamanta lloqsimuq mana imawan chaqrusqa lechemanta yarqachikuychis, chhaynapi chaywan wiñaspa salvasqa kanaykichispaq.  Chaypaqmi ichaqa allintaraq yachanaykichis* may sumaq sonqochus Señorqa kasqanta.  Payqa kausaq rumin, paytan runakunaqa wijch’upuranku, Diosmi ichaqa payta ajllakuran, ancha valorniyoqpaqtaqmi qhawarinpas; payman achhuykuspaykichisqa*  kausaq rumikuna jinan qankunapas espiritual wasiman perqasqa kankichis, chhaynapi ch’uya sacerdotekuna kanaykichispaq, Jesucristoq yanapayninwan Diospa sonqonpaq jina espiritual sacrificiokunata jaywanaykichispaqwan.  Diospa simin qelqapipunin nishan: “¡Uyariychis! Sionpin ajllasqa rumita churasaq, cimientopi esquina jap’iq ancha valorniyoq rumita; lliu paypi iñiqkunaqa manan jayk’aqpas p’enqachisqachu kanqa”, nispa.  Qankuna iñiqkunapaqqa ancha valorniyoqmi payqa ¿riki? Mana iñiqkunapaqmi ichaqa Diospa simin qelqaq nisqan junt’akun, chaypin nin: “Perqaqkunaq wijch’usqan rumin esquina jap’iq jatun kaq rumi kapun”, nispa.  Nillantaqmi: “Urmachiq rumi, jark’aq qaqa ima kapun”, nispa. Paykunaqa Diospa siminta mana kasukuq kasqankuraykun urmanku, chaypaqtaqmi paykunaqa t’aqasqapas karanku.  Qankunan ichaqa kankichis “ajllasqa ayllumanta kaqkuna, rey t’aqa sacerdotekuna, ch’uya nacionmanta kaqkuna, Diospa ajllakusqan llaqta ima; chhaynapi may sumaq sonqochus may atiyniyoqchus Diosqa kasqanmanta lliupi willanaykichispaq”, paymi laqhayaqmanta ancha allin k’anchayninman wajamurasunkichis. 10  Ñaupaqqa manan Diospa llaqtanchu karanchis, kunanmi ichaqa paypa llaqtan kapunkichis, chaymantapas ñaupaqqa manan khuyapayasqachu karankichis, kunanmi ichaqa khuyapayasqa kapunkichis. 11  Munasqa wayqe-panaykuna, qankunaqa waj llaqtayoq jinataq, forastero jinataq kay pachapi kausashankichis chayqa, kallpachakushallaychis qankunawan maqanakuq aychaykichispa munaynin contra qaqata sayanaykichispaq. 12  Chaymantapas allintapuni kausaychis kay pacha runakuna ukhupiqa, chhaynapin paykunaqa mana allin ruwaqmanta tumpashaspasuykichispas allin ruwasqaykichista rikuspanku Diosta jatunchanqaku runakunata qhawariq jamunan p’unchaypi. 13  Señorninchisrayku k’umuykukuywan kasukuychis runaq churasqan llapa autoridadta; kasukuychis reytapas, payqa jatun autoridadmi; 14  kasukuychis gobernadorkunatapas, paykunatan reyqa churan mana allin ruwaqkunata castiganankupaq, allin ruwaqkunatataq jatunchanankupaq. 15  Diosqa munan allin kausasqaykichiswan mana yuyayniyoq runakunaq yanqa thautisqankuta ch’inyachinaykichistan. 16  Qankunaqa libren kankichis, ichaqa amayá libre kasqaykichis tumpaqa mana allin kaqkunataqa ruwankichischu, aswanpas Diospa kamachinkuna jinapuni kausaychis. 17  Llapa runakunata respetaychis, llapa iñiqmasikunata munakuychis, Diosta manchakuspa kausaychis, respetaychis reytapas. 18  Kamachikunapas tukuy manchakuywan patronninkuta kasukuchunku, ichaqa ama allin kaqkunallatachu ni llamp’u sonqo kaqkunallatapaschu,* kasukuchunku ruwasqankuwan mana contentakuq kaqkunatapas. 19  Diosqa ancha allinpaqmi qhawarin paypa ñaupanpi allin concienciayoq kayta munaspa mana allin kaqkunata aguantaspa ima mana juchanmanta ñak’ariq runataqa. 20  Ichaqa juchaykichisraykuchus castigasqa kawaqchis chayqa, allintaña chayta aguantawaqchis chaypas, ¿ima allintataq ruwashawaqchis? Allin kaqkunata ruwasqaykichisrayku ñak’ariykunata aguantaspan ichaqa Diospa sonqonta kusichishawaqchis. 21  Qankunaqa chhaynata ñak’arinaykichispaqpunin wajasqa karankichis, Cristopas qankunaraykun ñak’ariran ejemplota churanasuykichispaq, chhaynapi tukuy yuyaywan yupinta qatikunaykichispaq. 22  Payqa manan jayk’aqpas juchallikuranchu, manataqmi siminpipas engañoqa karanchu. 23  K’amishaqtinkupas manan k’amipakuranchu, ñak’arichishaqtinkupas manan pitapas amenazaranchu; aswanmi payqa chaninta juzgaq juezman qaqata jap’ipakuran. 24  Paymi k’aspipi wañuspa juchanchiskunatapas cuerponpi apapuran, chhaynapi juchapaq wañupunanchispaq, allin kaqta ruwananchispaqtaq kausananchispaq. “Paypa k’irinkunawanmi qankunaqa qhaliyachisqa karankichis.” 25  Chaymantapas qankunaqa chinkasqa ovejakuna jinan purisharankichis, kunanmi ichaqa wajmanta Diospa ladonpi kashankichis, paymi vidaykichista* cuidaqpas michiqpas.

Uraypi willakuykuna

Griego rimaypiqa “mallinaykichis” ninmi.
“Achhuykuy” simitaqa “asuykuy, qayllaykuy otaq chimpaykuy” nillankutaqmi.
Chaypiqa “ni mana terco kaqkunallatapaschu” nillanmantaqmi.
Griego rimaypiqa “almaykichista” ninmi.