1 Juan 5:1-21

  • Jesuspi iñispan kay pachata atipasun (1-12)

    • Imachus Diosta munakuy kasqanmanta (3)

  • Mañakuyninchisqauyarisqapunin kanqa (13-17)

  • Kay millay pachapi allinta cuidakunamanta (18-21)

    • Kay pachaqa Saqraq makinpin kashan (19)

5  Pipas Jesusqa Cristo kasqanpi creeqqa Diospa wawanmi. Diosta munakuqqa munakullantaqmi paypa wawankunatapas.  Diospa wawankuna munakusqanchistaqa rikuchisun payta munakuspa kamachikuyninkunatapas junt’aspa iman.  Diosta munakuyqa kamachikuyninkunata kasukuymi; kamachikuyninkunaqa manataqmi sasa junt’aychu,  chaymi Diospa wawankunaqa kay pachatapas atipanku; iñiyninchiswantaqmi kay pachataqa atipanchispas.  ¿Pitaq kay pachatari atipanman? ¿Manachu Jesusqa Diospa Churin kasqanpi iñiq?  Jesucristoqa unuwan yawarwan iman rijurimuran, ichaqa manan unullawanchu rijurimuran, aswanpas unuwan yawarwan iman payqa rijurimuran. Espiritupas willashanmi chaymantaqa, cheqaqllatataqmi chay espirituqa willanpas.  Chhaynaqa kinsan rikuchinku pichus Jesusqa kasqanta, chaykunan:  espíritu, unu, yawar ima, kinsantinkutaqmi kaqtakama willankupas.  Noqanchisqa chaskikunchistaq runaq willasqanta chayqa, astawanraqchá riki chaskikunanchis Diospa willasqantaqa. Diosqa pay kikinmi Churinmanta willashan. 10  Pipas Diospa Churinpi iñiqqa Diospa willasqanta sonqonpi allinta jap’ikusqantan rikuchishan. Pipas Diospi mana iñiqmi ichaqa Churinmanta Diospa willasqanpi mana iñisqanrayku llullata jina payta qhawarishanman. 11  Diospa willawasqanchisman jinaqa, paymi wiñay kausaytaqa qowanchis, Churinpitaqmi chay kausayqa kashan. 12  Pipas Churiwan jujllachasqa kaqqa chaskinqan chay kausayta, pipas Diospa Churinwan mana jujllachasqa kaqmi ichaqa mana chaskinqachu chay kausayta. 13  Qankuna Diospa Churinpa sutinpi iñiqkunaqa chaskinkichismi wiñay kausaytaqa, chayta yachanaykichispaqmi noqaqa kaykunata qelqamushaykichis. 14  Chaymantapas, imataña Diospa munayninman jina mañakusunchis chaypas, Diosqa uyariwasunmi, manapunin chaymantaqa iskayananchischu. 15  Yachanchistaq ima mañakusqanchistapas uyariwananchista chayqa, chaskisunpunin paymanta tukuy ima mañakusqanchistapas. 16  Pipas iñiqmasinta rikunman wañuyman mana apaq jucha ruwashaqta chayqa, mañapunanmi paypaq, jinan Diosqa payman kausayta qonqa, chhaynatan Diosqa ruwanqa wañuyman mana apaq jucha ruwaqkunawan. Ichaqa kanmi wañuyman apaq juchapas, chay jucha ruwaqpaqmi ichaqa mana pipas mañapunanchu. 17  Mana allin ruwaykunaqa lliupas juchan, ichaqa kanmi wañuyman mana apaq juchapas. 18  Yachasqanchis jina, Diospa wawankunaqa manan juchapiqa purinkumanchu, Diospa Churinmi paykunata cuidashan, chaymi Satanasqa* mana imananpaschu paykunataqa. 19  Yachasqaykichis jina, noqanchisqa Diosmantan paqarimunchis, lliu kay pachan ichaqa Satanaspa makinpi* kashan. 20  Chaymantapas, Diospa Churinmi kay pachaman jamuspa allin reparaq kayta qowaranchis pichus cheqaq kaqmanta yachananchispaq; chay cheqaq kaqwanqa Churin Jesucristoq yanapayninwanmi jujllachasqa kashanchis. Chay cheqaq kaqqa cheqaq Diosmi, paymi wiñay kausaypas. 21  Wawallaykuna, karunchakuychis idolokunamanta.

Uraypi willakuykuna

Griego rimaypiqa “millay kaqqa” ninmi.
Griego rimaypiqa “millay kaqpa makinpi” ninmi.