1 Corintios 6:1-20

  • Cristianopura quejanakusqankumanta (1-8)

  • Pikunachus Diospa gobiernonman mana jaykunankumanta (9-11)

  • Cuerpowan Diosta jatunchanamanta (12-20)

    • “¡Ayqeychis qhelli jucha ruwaymanta!” (18)

6  Qankunapurapi quejanakuy kaqtinqa, ¿imaraykutaq mana iñiqkunamanri juzgachikuq rinkichis? ¿Manachu aswan chaytaqa qankuna Diosta serviqkuna* ukhullapi allichawaqchis?  Icha, ¿manachu yachankichis Diosta serviqkuna kay pachata juzgananku kasqanta? Qankunataq kay pachata juzgankichis chayqa, ¿manachu atiwaqchis chay juch’uy asuntokuna juzgayta?  ¿Manachu yachankichis angelkunata juzgananchis kasqanta? Angelkunatataq juzgasunchis chayqa, ¿manachu atisunman kay kausaypi kaqkuna juzgayta?  Chayrayku, kay kausaypi imapas juzgana kaqtinqa, ¿imaraykutaq mana iñiq runakunatari juezpaq churakunkichis?  Kaytaqa nimushaykichis p’enqarikunaykichispaqmi. ¿Manachu qankuna ukhupi pillapas yachayniyoq kan, chhaynapi iñiqpurapi imapas kaqtin juzgananpaq?  ¡Imaynapitaq qankunari iñiqpura kashaspa mana iñiqkunawan juzgachikuq rishankichis!  Iñiqpura juicioman jaykuspaqa p’enqaytan ruwashankichis. Chayrayku, ¿manachu aswan aguantallawaqchis mana allin ruwaykunata? ¿Manachu aswan jinallaña qechuchikuwaqchis?  Qankunataq ichaqa chaykuna ruwanaykichistaqa iñiqmasiykichiskunataraqtaq mana allinta ruwankichis engañankichis ima.  Icha, ¿manachu yachankichis mana allin runakunaqa Diospa gobiernonman mana jaykunankuta? Ama engañakuychischu: Qhelli juchapi puriqkunapas, ídolo adoraqkunapas, jujwan pantaqkunapas, warmiman tukuqkunapas, qharipura puñuqkunapas, 10  suwakunapas, sinchita munapayaqkunapas, machaqkunapas, millayta k’amiqkunapas, engañowan suwaqkunapas manan Diospa gobiernonmanqa jaykunqakuchu. 11  Chhaynan wakinniykichisqa karankichis. Chaywanpas ñan maqchisqaña ch’uyanchasqaña kankichis, ñan Señor Jesucristoq sutinpi Diospa espiritunwan chaninchasqaña kankichis. 12  Noqapaqqa tukuy imapas ruwakullanmanmi, ichaqa manan lliuchu allin kanman; tukuy imatapas ruwallaymanmi, ichaqa manan imapas kamachiwanqachu. 13  Mijunaqa wijsapaqmi, wijsataq mijunapaq, Diosmi ichaqa iskayninta ch’usaqyachipunqa. Cuerpoqa manan qhelli juchata ruwanapaqchu, aswanpas Señorpaqmi, Señortaq cuerpopaq. 14  Diosmi atiyninwan Señortaqa jatarichiran, chhaynatan noqanchistapas wañuymanta jatarichiwasun. 15  ¿Manachu yachankichis cuerpoykichisqa Cristoq cuerponpa partenkuna kasqanta? ¿Cristoq cuerponpa partenkunata orqospachu qhelli kausaypi puriq warmiman* jujllachasaq? ¡Manapunin chaytaqa ruwaymanchu! 16  ¿Manachu yachankichis qhelli kausaypi puriq warmiman jujllachakuqqa paywan juj cuerpolla kasqankuta? Diospunin nin: “Iskayninkun juj aychalla kapunqaku”, nispa. 17  Pipas Señorman jujllachakuqmi ichaqa espiritupi jujlla paywan kanqa. 18  Chayrayku, ¡ayqeychis qhelli jucha ruwaymanta! Ima juchatapas juj runa ruwanman chayqa, manan cuerpon contrachu ruwan, qhelli juchata ruwaqmi ichaqa cuerpon contra juchallikushan. 19  Icha, ¿manachu yachankichis cuerpoykichisqa Diospa qosqasuykichis santo espirituq wasin kasqanta? Chaymantapas qankunaqa Diospan kankichis, 20  paymi preciowan rantirasunkichis. Chayrayku cuerpoykichiswan Diosta jatunchaychis.

Uraypi willakuykuna

Griego rimaypiqa “ch’uyakuna” otaq “santokuna” ninmi.
Chaypiqa cuerponta vendeq warmimantan rimashan.