1 Corintios 5:1-13

  • Qhelli jucha ruway kashasqanmanta (1-5)

  • Pisi levaduralla llapa masata poqochinanmanta (6-8)

  • Juchallikuq runata qarqonamanta (9-13)

5  ¿Cheqachu qankuna ukhupi qhelli jucha* ruway kashan? Juj runataqsi taytanpa warminwan tiyashán. Chhayna qhelli ruwayqa manamá ni mana iñiqkuna ukhupipas* rikukunchu.  Icha, ¿kusisqachu chaywan kashankichispas? ¿Manachu aswanpas khuyay llakisqa kashanaykichis? ¿Manachu chay juchallikuq runatapas qankuna ukhumanta qarqonaykichis?  Manaña qankunawanchu kashani chaypas, yuyayniyqa* qankunawanmi kashan, chay jucha ruwaq runatapas ñan juchachaniña chaypipas kashayman jina.  Señorninchis Jesuspa sutinpi juñunakushaqtiykichismi noqapas Señorninchis Jesuspa atiyninwan yuyayniypi chaypi kashasaq, jinan qankunaqa  chay juchallikuq runata Satanasman entregankichis, chhaynapi aycha ch’usaqyachisqa kananpaq, espiritutaq Señorpa p’unchayninpi salvasqa kananpaq.  Manan allinchu kashan jatunchakusqaykichisqa. ¿Manachu yachankichis pisi levaduralla llapa masata poqochisqanta?  Chay levadurayoq ñaupaq kaq masata wijch’uychis, chhaynapi mana levadurayoq mosoq masa kanaykichispaq. Pascua fiestapaq corderonchis Cristoqa sacrificasqañan kapun.  Chayrayku chay fiestaman qatiq fiestataqa ama levadurayoq ñaupa masawanchu ruwasun, nitaq jucha ruway, millay ruway levadurawanchu; aswanpas ruwasun mana levadurayoq t’antawan, chayqa ch’uya sonqo kay, cheqaq kay iman.  Apachimusqay cartapin qelqamuraykichis: “Ama qhelli juchapi puriqkunawanqa juñukuychischu”, nispa. 10  Chaytaqa nimuraykichis manan kay pachapi qhelli juchapi puriqkunamanta, sinchi munapayaqkunamanta, suwakunamanta, ídolo adoraqkunamantapas tukuy imapi t’aqakunaykichispaqchu, chhayna kaqtinqa kay pachamantachá lloqsipunaykichis kanman. 11  Kunanmi ichaqa niykichis: Pipas iñiqmasinchis kashaspa qhelli juchapi purishanman, otaq sinchi munapayaqpas kanman, ídolo adoraqpas kanman, millay k’amiqpas kanman, machaqpas kanman, suwapas kanman chayqa, ama chhayna runawanqa juñukuychischu, amapuni chhayna runawanqa mijuychispaschu. 12  Manan noqaq ruwanaychu jawapi kaqkunata juzgayqa. Qankunaqa iñiqkunatan juzganaykichis, 13  Diosñan juzganqa jawapi kaqkunataqa. Chayraykun Diospa simin qelqaqa nin: “Qankuna ukhumanta qarqoychis juchallikuq runata”, nispa.

Uraypi willakuykuna

Qhaway “explicasqa simikuna” nisqapi “qhelli jucha” nisqata.
Griego rimaypiqa “nacionkuna ukhupipas” ninmi.
Griego rimaypiqa “espiritupiqa” ninmi.