1 Corintios 2:1-16

  • Corinto llaqtapi Pabloq predicasqanmanta (1-5)

  • Diospa yachaynin may jatunpuni kasqanmanta (6-10)

  • Espirituwan pusachikuq runaqa jujniraymi aychaq munayninman jina kausaq runamantaqa (11-16)

2  Chaymi noqaqa, wayqe-panaykuna, Diospa pakasqa yachayninta qankunaman willaq jamuspayqa mana yachaysapakunaq rimasqan simikunawanchu ni yachayninkuwanchu jamurani.  Aswanmi noqaqa Jesucristomanta, k’aspipi wañuchisqa kasqanmanta imalla yachanaykichista munarani.  Chaymantapas qankunaman jamushaspayqa pisi kallpa, manchan-manchan, khatatataspa iman kasharani.  Rimaspapas yachachispapas manan imaynan yachaysapa runakuna sonqota suwanankupaq rimanku chhaynatachu rimarani, aswanmi rimasqayqa rikuchiran santo espirituq atiyninta.  Chhaynapi iñiyniykichisqa mana runaq yachayninpichu sayananpaq, aswanpas Diospa atiyninpi sayananpaq.  Chaywanpas yachaymantan rimanchis iñiyninkupi allin wiñasqa kaqkunawanqa, ichaqa manan kay pacha runakunaq yachayninmantachu nitaq kay pachapi kamachikuqkunaq yachayninmantapaschu, paykunaqa chinkachisqan kanqaku.  Aswanmi juj pakasqa yachaymanta rimanchis, Diospa pakasqa yachayninmanta. Chay yachaytaqa paymi paqarichiran kay pacha runakuna manaraq imatapas ruwashaqtinku, chhaynapi noqanchis jatunchasqa kananchispaq.  Chay yachaytaqa manan kay pachapi pi kamachikuqpas yacharanchu; yachankumanchus karan chayqa, manachá ancha jatun Señortaqa wañuchinkumanchu karan.*  Diospa simin qelqapas ninmi: “Ñawiq mana rikusqankunata, ninriq mana uyarisqankunata, sonqoq mana piensasqankunata iman Diosqa munakuqninkunapaq prepararan”, nispa. 10  Diosqa noqanchismanmi santo espiritunwan chaykunata rikuchiwanchis; santo espirituqa tukuy imaymanatan t’aqwin, Diospa pakasqa yachayninkunatawanraq. 11  ¿Pipas yachanmanchu juj runaq imachus piensasqanta? Manan ¿riki? Aswanpas chay runaq sonqollanmi* chaytaqa yachan; chhaynallataqmi Diospa imachus piensasqantaqa mana pipas yachanchu, aswanpas santo espiritullanmi chaytaqa yachan. 12  Noqanchisqa manan kay pachaq espirituntachu chaskiranchis, aswanpas Diospa espirituntan, chhaynapi sumaq sonqo kayninpi Diospa imaymana qowasqanchiskunata allinta entiendenanchispaq. 13  Chaymantapas chaykunamantan rimanchis, ichaqa manan runaq yachachisqanman jinachu, aswanpas espirituq yachachisqanman jinan; chaytaqa ruwanchis santo espiritumanta jamuq simikunawan Diospa kaqninkunata yachachispanchismi. 14  Aychaq munayninman jina kausaq runaqa manan chaskinmanchu Diospa espiritunmanta kaqkunataqa, paypaqqa mana valeqmi chaykunaqa, manataq entiendeytapas atinmanchu, chaykunaqa Diospa espiritunwan t’aqwikusqanrayku. 15  Diospa espiritunwan pusachikuq runaqa tukuy imaymanatan t’aqwin, paytan ichaqa mana pi runapas t’aqwinmanchu. 16  Diospa simin qelqan nin: “¿Pitaq Jehová Diospa piensayninta yachanman, chhaynapi payta yachachinanpaq?”, nispa. Noqanchisqa Cristoq yuyaynin yuyayniyoqmi kanchis.

Uraypi willakuykuna

Chaypiqa “k’aspipi wañuchinkumanchu karan” nillanmantaqmi.
Griego rimaypiqa “espiritullanmi” ninmi.