1 Corintios 10:1-33

  • Israel runakuna imakunapichus tarikusqankumanta (1-13)

  • Idolokunata mana adoranamanta (14-22)

    • Jehová Diospa mesanmanta, supaykunaq mesanmantawan (21)

  • Imapas ruwanalla kasqanmanta, jujkunaq allinninta maskhanamantawan (23-33)

    • ‘Lliutan ruwana Diosta jatunchanapaq’ (31)

10  Wayqe-panaykuna, kaytan yachanaykichista munani: Ñaupa taytanchiskunaqa llapankun phuyuq pachanta purispa lamar-qochanta pasaranku.  Llapankun Moisespa qhepanta rispa phuyuwan lamar-qochawan ima bautizasqa karanku.  Llapankun Diospa qosqan mijunatapas mijuranku,  llapallankutaqmi Diospa qosqan unutapas ujaranku. Paykunaqa ladonkupi kaq qaqamantan Diospa qosqan unutaqa ujaranku, chay qaqaqa Cristotan representaran.  Ichaqa, yaqa llapankutan Diosqa mana allinpaq qhawariran, chaymi ch’inneqpi wañupuranku.  Chaykunaqa noqanchis yachananchispaqmi karan, chhaynapi ama chay mana allinkuna ruwayta munapayaq runakuna jinachu kananchispaq.  Chaymantapas, ama ídolo adoraqkunaqa kasunchu, imaynan wakinninku ídolo adoraqman tukupuranku jinaqa. Paykunamantan Diospa simin qelqapi nin: “Runakunan mijuq ujaq tiyaykuranku, chaymantataq aychanku kusirichiq jatariranku”, nispa.  Amataq qhelli juchatapas ruwasunchu imaynan wakinninku ruwaranku jinataqa, chay qhelli jucha ruwasqankumantan juj p’unchayllapi paykunamanta iskay chunka kinsayoq waranqa runakuna wañuranku.  Amallataq Jehová Diostapas pruebaman churasunchu imaynan wakinninku pruebaman churaranku jinataqa. Chay ruwasqanku jawan mach’aqwaypa picasqan wañuranku. 10  Amallataq rimapakuqchu kasun, imaynan wakinninku rimapakuq karanku jinaqa. Chhayna kasqankuraykun paykunataqa wañuchiq* wañuchiran. 11  Paykunata chaykuna pasasqanqa noqanchis yachananchispaqmi qelqasqa karan, chhaynapi kay tiempoq tukukuyninpi kausaqkunaqa manaña paykuna jinachu kananchispaq. 12  Chayrayku, pipas “qaqatan sayashani” niqqa allinta cuidakuchun, paqtataq urmanman. 13  Qankunaqa ima tentacionpipas tarikuspaqa manan waj tentacionpichu tarikushankichis, aswanpas lliu runaq tarikusqanpi jinallan. Diosqa junt’aqpunin, chaymi mana dejanqachu mana aguantanaykichiskama tentasqa kanaykichistaqa; aswanpas tentasqa kashaqtiykichismi payqa yanapayta qosunkichis, chhaynapi aguantanaykichispaq. 14  Chayrayku, munasqa amigoykuna, karunchakuychis ídolo adoraymanta. 15  Qankunaqa allin reparaq runakunataq kankichis chayqa, qankuna kikiykichis reparaychis rimasqay allinchus kashan icha manachus chayta. 16  ¿Manachu Diosman graciasta qosqanchis copaqa Cristoq yawarninta representan? ¿Manachu p’akisqanchis t’antapas Cristoq cuerponta representan? 17  Jujllan t’antaqa, chaymi askhaña kanchis chaypas, juj cuerpolla kanchis juj t’antallata llapanchis mijusqanchisrayku. 18  Yuyariychis Israel llaqta runakunata. Altarpi jaywasqa sacrificiomanta mijuqtinkuqa, ¿manachu Dioswanpas mijushankuman jina karan? 19  Chayta nispayqa, ¿“idolopas, idoloman jaywasqa kaqkunapas valorniyoqmi” nispachu nishani? 20  Manan, aswanpas chayta nispaqa: “Waj nacionkunamanta runakuna sacrificiota jaywaspaqa supaykunamanmi sacrificiota jaywashanku, manan Diosmanchu”, ninaytan nishani. Noqaqa manan munaymanchu supaykunawan jujllachakunaykichistaqa. 21  Manan Jehová Diospa copanmanta supaykunaq copanmantawanqa ujayta atiwaqchischu, manallataqmi “Jehová Diospa mesanmanta” supaykunaq mesanmantawanqa mijuyta atiwaqchischu. 22  Icha, ‘¿Jehová Diostachu phiñachiyta munashankichis?’ Noqanchisqa manan paymanta aswan kallpayoqchu kanchis ¿riki? 23  Tukuy imapas ruwakullanmanmi, ichaqa manan lliuchu allin kanman; tukuy imapas ruwakullanmanmi, ichaqa manan lliuchu runata kallpachan. 24  Sapanka jujpa allinninta maskhashachun, amataq paypa allinnintaraqchu. 25  Aycha qhatunapi vendesqanku ima aychatapas mijullaychis, manan imatapas tapukunaykichisraqchu concienciaykichis jawaqa. 26  Yachasqanchis jina, “Jehová Diospan kay pachapas chaypi tukuy imaymana kaqpas”. 27  Pi mana iñiqchus mijunaman wajarisunkichisman, qankunapas munawaqchistaq riyta chayqa, mijullaychis tukuy ima servisqasuykichistapas, manan imatapas tapukunaykichisraqchu concienciaykichis jawaqa. 28  Ichaqa pipas nisunkichisman “chay mijunaqa idoloman jaywasqan kashan” nispa chayqa, aman mijunkichischu chay willasuqniykichis jawa, conciencia jawa ima. 29  Chaywanqa manan concienciaykichismantachu rimashani, aswanpas juj kaqpa conciencianmantan. Ima ruwanaypaqpas libreña kani chaypas, mana allintan ruwashayman jujpa conciencian juzgawanman chayqa. 30  Diosman graciasta qospaña mijuyman chaypas, mana allintan ruwashayman imapas mijusqaymanta juj runa millayta rimanman chayqa. 31  Chayrayku, mijushankichisña, ujashankichisña, imataña ruwashankichis chaypas, lliuta ruwaychis Diosta jatunchanapaq jina. 32  Allinta cuidakuychis, chaytaq urmachiwaqchis judiokunata, griegokunata* Diospa iñiq t’aqantapas. 33  Noqapas manan allinniytachu maskhashani aswanpas jujkunaq allinnintan, arí, lliu runaq sonqonpaq jinan tukuy imatapas ruwashani, chhaynapi paykuna salvasqa kanankupaq.

Uraypi willakuykuna

Chay wañuchiqqa Diospa angelninmi kanman karan.
Chay runakunaqa griego simi rimaq mana judío runakunan kankuman karan.