Arí. Jehova Diospa testigonkunapaqqa bibliapa llapallan librochakunam ‘Diospa Espiritunpa qusqan hinaspapas allinmi yachachiwananchikpaq’ (2 Timoteo 3:16). Biblia iskay partepi qillqasqa kaptinpas, iskayninkum ñawpaq testamento hinaspa musuq testamentopas Diospa palabranmi. Chaymi Jehova Diospa testigonkunaqa bibliaqa huklla kasqanta qawachinaykupaq, ñawpaq testamentota sutichaniku Hebreo rimaypi qillqasqa, musuq testamentotañataq Griego rimaypi qillqasqa nispa.

Jesuspa qatiqninkunaqa bibliapa ñawpaq testamentontapas servichikunankum

Apostol Pablom Diospa kayna nisqanta qillqarqa: ‘Ñawpaqta imapas qillqasqa kaqkunaqa yachachiwananchikpaqmi qillqasqa kachkan’ nispa (Romanos 15:4). Manam iskayrayanikuchu hebreo rimaypi qillqasqa kaqkunaqa lliw runakunata yanapananmantaqa. Chaypiqa tarinchikmi sumaq yanapakuykunata, hinaspapas willawanchiktaqmi ñawpaq tiempopi imakuna pasasqanmantapas. Chaykunamanta yachayqa ñuqaykupaqpas hinaspa lliw runakunapaqpas ancha allinmi.

  • Ñawpaq tiempopi imakuna pasasqanmanta. Bibliapiqa hebreo rimaypim willawanchik Dios kay allpa pachata imayna unanchasqanmanta hinaspa lliw runakuna huchayuq imayna rikurirusqanmantapas. Hebreo rimaypi qillqakusqa kaqkunaqa yachachiwanchikmi maymanta qamusqanchikta hinaspa imarayku wañusqanchikmantapas (Genesis 2:7, 17). Chaymantapas kay partepim yachanchik ñawpaq tiempopi serviqninkunata ñuqanchik hina sasachakuypi tarikuptin Dios imayna yanapasqanmanta (Santiago 5:17).

  • Yanapawananchikpaq yachachikuykuna. Proverbios hinaspa Eclesiastes librochankunaqa hebreo rimaypim qillqakurqa. Kaykunapim tarinchik kawsayninchikpi yanapawananchikpaq yachachikuykunata. Wakiqnin yachachikuykunam familianchikkunawan imayna kusisqa kawsakunamanta (Proverbios 15:17), llamkayman mana llumpayta qukuruspa imayna kusisqa kanamanta (Proverbios 10:4; Eclesiastes 4:6) hinaspa mozo-sipasllaraq kaspa ima sumaq rawaykuna haypananmantapas (Eclesiastes 11:9–12:1).

Allintataqmi yanapawasun Moisespa chaskisqan kamachikuykunapas, kayqa bibliapa qallariyninpi pichqa librochankunam, kaytam sutichanku Torá utaq Pentateuco, nispa. Chaypi kamachikuykunata kasukunapaq mana obligasqa kaspanchikpas, yachachikuyninkunaqa yanapawasunmi vidanchikpi kusisqa kawsakunapaq (Levitico 19:18; Deuteronomio 6:5-7).