1800 watakunapi kawsaq Friedrich Nietzsche sutiyuq runapa qillqasqan huk kaqnin libronmi El anticristo nisqa sutiyuq karqa.

Ñawpaq watakunapim utaq edad media nisqankupim reykunawan kamachikuqkunaqa enemigonkunata anticristo nispa sutichaqku.

Alemania nacionniyuq Martín Lutero sutiyuq runam, catolica iglesiapa contranpi churakuruspan punta apaqninkunata anticristo nispa suticharqa.

ANTICRISTO sutiqa unay watañam tupachisqa kachkan catolica iglesiapi punta apaqninkuwan hinaspa manchakuypaq peliculakunawan. Chayraykum runakunaqa tapukunku: ¿Pitaq kanman anticristoqa? ¿Yaqachu chaymanta yachayqa ancha allin kanman? Chay rimay suqta kutita bibliapi rikurisqanraykum allin kanman qatiqninpi chaymanta yachayninchik.

ANTICRISTO PI KASQANMANTA

Apostol Juanllam anticristo rimaytaqa bibliapi qillqarqa. ¿Imatam payqa anticristomanta nin? Punta cartanpim nin:‘Ñam tukupay tiempopiña kachkanchik. Anticristopa hamunanmantaqa ñam uyarirqankichikña, chaymi kunanqa achkallaña anticristokuna rikuriramunku, chaynapim yachanchik tukupay tiempoña kasqanta. Paykunaqa ñuqanchikmantam lluqsirunku, ichaqa manam ñuqanchik partechu [...]. ¿Pitaq chay llullaqa? “Jesusqa manam Cristochu” niqmi llullaqa. Payqa anticristom, payqa neganmi Dios taytatapas chaynataq churin Jesucristotapas’, nispa (1 Juan 2:18, 19, 22, CQ12).

Apostol Juanpaqqa Jesucristomantawan yachachisqankunamanta llullakunata rimaq runakunam anticristo kanku

¿Imatam apostol Juanpa nisqanmanta yachanchik? Payqa ‘achkallaña anticristokunamantam’ rimarqa, chay nisqanwanmi qawachirqa achka runakuna kasqankuta. Juanpa nisqanman hinaqa llullakunatam chiqichinku, ninkum Jesusqa mana Cristo kasqanta hinaspa taytan pi kasqantapas pakankum. Chaynaqa, kanmanmi Cristo tukuspanku runakunata pantachiq runakuna utaq Cristopa qatiqnin kasqankuta niq religionkuna. Apostol Juanmi nirqa llapan kay runakuna ‘ñuqanchikmanta lluqsimusqanta’, kayna nisqanwanmi qawachirqa chiqap yachachikuykunata qipanchasqankuta. Hinaspapas chayna runakunaqa ñam Juanpa tiemponpiqa karqakuña. Yaqachusmi “tukupay tiempopiña” nisqanwanqa qawachichkarqa wañukunanpaqña kasqan watakunamanta.

¿Imatawanraqmi Juanqa anticristomanta nirqa? Nirqam pantay yachachikuykunata yachachinankumanta, nirqam: ‘“Jesucristom kay pachaman hamuspan chiqap runa karqa” nispa niqkunam Diospa espiritunpa yachachisqanqa kachkanku. Jesucristota mana chaynapaq chaskiqqa manam Diospa espiritunpa yachachisqanchu kachkan, payqa kachkan anticristopa espiritunpa yachachisqanmi. Qamkunaqa ñam uyarirqankichikña anticristopa hamunanmantaqa, arí, payqa ñam kay pachapiña kachkan’, nispa (1 Juan 4:2, 3). Iskay cartanpim hina chayllamanta rimaspan nirqa: “Achka pantachikuqkunam kay pachapi rikuriramunku, paykunaqa manam creenkuchu Jesucristopa runayasqantapas, chaynata yachachiqqa pantachikuqmi hinaspa anticristom”, nispa (2 Juan 7). Apostol Juanpa nisqanman hinaqa, anticristoqa Jesucristomantawan yachachisqankunamanta llullakunata yachachiqmi.

‘LLULLA RUNAKUNAMANTAWAN’ ‘MANA KASUKUQ RUNAKUNAMANTA’

Jesusmi nirqa: ‘Cuidakuychik “Diosmantam willakuchkani” niq llulla runakunamanta. Paykunaqa oveja hina rikchayniyuq hamuspapas sunqunkupiqa kachkan suwa atuqkuna hinam’.

Anticristokunamanta Juan manaraq qillqachkaptinmi, Jesusqa qatiqninkunata nirqa: ‘Cuidakuychik “Diosmantam willakuchkani” niq llulla runakunamanta. Paykunaqa oveja hina rikchayniyuq hamuspapas sunqunkupiqa kachkan suwa atuqkuna hinam’, nispa (Mateo 7:15). Apostol Pablopas Tesalonica llaqtapi iñiqkunatam nirqa: ‘Amayá piwanpas  engañachikuychikchu, puntataqa runakunam Diosta qipanchakunqaku hinaptinmi rikurimunqa leyta mana kasukuq runa, chay runaqa chinkananpaq citasqañam kachkan’, nispa (2 Tesalonicenses 2:3).

Kaymi qawachiwanchik punta pachak watapi “Diosmantam willakuchkani” niq llulla runakuna hinaspa pantay yachachiqkuna, iñiqkunapa iñiyninta hukmanyachiy munasqankuta. Paykunam Cristomantawan huk yachachikuykunamanta llulla willakuykunata willakurqaku, chayraykum Juanqa suticharqa “anticristo” nispa. “Chinkananpaq citasqañam kachkan” nisqanwanmi apostol Pabloqa qawachichkarqa Dios chinkachinanmanta.

WAQAYCHAKUSUN ANTICRISTOPA RUWASQANKUNAMANTA

Kunan tiempopipas anticristokunaqa tukuytam ruwachkanku. Runakuna utaq religionkunam Jesuspa chaynataq yachachisqanpa contranpi hatarichkanku. Llullakuspankum pantay yachachikuykunata yachachichkanku, chayraykum runakunaqa ninku Jesusqa hina Jehova Dioslla kasqanta. Chay pantay yachachikuykunawan mana intuchikunapaqmi allinta cuidakunanchik. Qatiqninpim qawasun iskay pantay yachachikuykuna runakunata hukmanyachisqanmanta.

Unay watakunam achka iglesiakuna yachachirqaku huk cuerpollapi Dios tayta, dios churi, dios espiritu kasqanta. Ninkum taytawan churiqa huk Dioslla kasqankuta. Arí, kay iglesiakunaqa anticristo hinam kachkanku Diosmantawan churin Jesusmanta pantayta yachachisqankurayku. Chay yachachikuy pakasqankuqa manam yanapanchu allin sunqu runakuna bibliapa nisqanman hina Diosta riqsinankupaq, hinaspa Jesusta qatinankupaqpas (1 Corintios 11:1; Santiago 4:8).

Chay iglesiakunallam runakunata pantachiyta munaspanku bibliankumanta Jehova Diospa sutinta hurqurunku, chaymantapas mana allintam rimanku Diospa sutin rikuriq bibliakunamanta. Llullankutam chaytaqa ruwarunku, bibliapiqa yaqa qanchis waranqa kutitam Jehova sutiqa rikurin. ¿Imapim chayna pantachisqanku tukurqa? Achka runakunamá Diospa sutintaqa riqsinkuchu.

Chayna kaptinpas, Diospa sutin Jehova kasqanta yachayqa achka runakunatam yanapan payman asuykunankupaq. Chaynam karqa Richard sutiyuq runawan, paymi mana qunqanchu casarasqa testigokunawan rimasqanmanta. Paymi nin: “Bibliapim qawachiwarqaku Diospa sutinqa Jehova kasqanta. Dios sutiyuq kasqanmantaqa admirakurqanim. Manam haykapipas sutin kasqantaqa piensarqanichu”, nispa. Chaymantapunim bibliapa yachasqankunata ruwayman churananpaq kallpanchakurqa, chaynapi Jehova Diosta kusichinanpaq. Richardmi nin: “Diospa sutinta riqsiyqa paywan allin amistad kanaypaqmi yanaparuwan”, nispa.

Pachaknintin watakunapim anticristo kaqkunaqa, waranqantin runakunata tutayaypi hina Diosmanta mana allinta yachachispanku kachirqaku. Bibliamanta allinta yachaspaqa atisunmi anticristo pi kasqanta yachayta, chaymi pantay yachachikuyninkunawanqa mana intuchikusunchu (Juan 17:17).