Yachachikuypa kasqanman rinapaq

Yachachikuyman rinapaq

 QARANPI KAQ YACHACHIKUY | DIOSQA KUYAKUYWANMI QAWASUCHKANKI

Diosqa munanmi payman asuykunaykita

Diosqa munanmi payman asuykunaykita

“Manam pipas hamunmanchu ñoqamanqa kachamuwaqniy Taytay ñoqaman mana pusamuptinqa.” (JUAN 6:44)

IMANASQAM WAKINQA ISKAYRAYANKU: Achka runakunam Diospi iñinku, ichaqa piensankum llumpay karupi kasqanta. Irlandapi kaq Christinam sapa semana iglesiaman riq, paymi nin: “Yacharqanim Dios tukuy ima unanchasqanta. Ichaqa manam Diostaqa reqsirqanichu, manam haykapipas sienterqanichu paypa hichpanpi kasqaytaqa”, nispa.

IMATAM BIBLIA YACHACHIN: Wakinpiqa piensanchikpaschá Diosmanta llumpay karupi kasqanchikta, payqa tuta-punchawmi qawamuwachkanchik. Dios imayna cuidawasqanchikmanta yachachispanmi Jesus rikchanachirqa: “Pachak ovejayoq runapa huknin ovejan chullaruptinqa ¿manachum isqon chunka isqonniyoq ovejata saqeykuspan tarimunankama orqokunapi maskamunqa?”, nispa. ¿Ima niytataq chaywanqa munarqa? Jesusmi nin: “Hanaq pachapi kaq Taytaykichikpas manam munanchu hukllanpas kay uchuychakuna chinkananta”, nispa (Mateo 18:12-14).

Diosqa kuyanmi llampu sonqokunata. ¿Imaynatam maskan chay chullaruq ovejachata? Kay yachachikuypa qallariyninpi textopa nisqanman hinam Diosqa payman asuykunankupaq runakunata yanapan.

¿Pikunataq Diosmanta willanankupaq runakunata wasin-wasin maskanku otaq callekunapipas asuykunku?

Llampu sonqo runakunatam Diosqa payman asuykunankupaq yanapan. Apostolkunapa tiemponpim Etiopia nacionmanta kaq runa carretanpi rirqa Isaiaspa qellqasqan willakuyta leestin, chaymi Jehova Diosqa serviqnin Felipeta kamachirqa chay leesqanpa ima ninan kasqanta entiendechinanpaq (Hechos 8:26-39). Apostol Pedrotapas romamanta kaq Corneliopa wasinmanmi kacharqa, Cornelioqa Diosta mañakuspanmi paypa munayninta ruwananpaq kallpanchakurqa (Hechos 10:1-48). Apostol Pablotapas riqmasintawanmi guiarqa Filipos llaqtapa hichpanta riq mayukama rinankupaq. Chaypim reqsirurqaku Diosman sonqo Lidiata, payqa Diospa yanapayninwanmi willakusqankuta entienderqa (Hechos 16:9-15).

Chaykunawanmi cuentata qokunchik Jehova Diosqa payman asuykuq munaqkunataqa kikinpas maskachkanman hina yanapasqanmanta. Kay tiempopiqa, ¿pikunataq Diosmanta willanankupaq runakunata wasin-wasin maskanku otaq callekunapipas asuykunku? Testigonkunam. Sonqoykipi tapukuy: “¿Paykunatachu Dios valekuchkan payman asuykunaypaq?”, nispa. Diosta mañakuy payman asuykunaykipaq hinaspa Testigonkunawan yanapasusqaykita chaskikuy. *

^ par. 8 Astawan yachanaykipaq qaway ¿Imanasqataq Bibliata estudiana? niq videota, chayqa kachkanmi www.jw.org/quy nisqanpi.