Jehova Diospa testigonkunapa yachachisqanku imayna kasqanmanta yachanaykipaq reparay Antonio sutiyoq Testigopi, paymi Luis sutiyoq runaman kaqmanta watukunqa.

JESUSPI IÑIYQA ANCHA ALLINMI

Antonio: Imaynallam Luis. Kusikunim suyawasqaykimanta.

Luis: Ñoqapas kusikunim hamusqaykimanta Antonio.

Antonio: Apamurqaykim Willakuq hinaspa ¡Rikchariy! revistakunata. Kaypi yachachikuykunaqa sumaqmi kachkan.

Luis: Gracias. Antonio huk tapukuyniymi kachkan.

Antonio: Niykuway.

Luis: Qayninpam llamkaqmasiyman willarqani revistaykichikpi sumaq yachachikuykuna kasqanmanta. Ichaqa paymi niwarqa Jesuspi mana iñisqaykichikrayku revistaykichikta mana leenaypaq. Ñoqañataqmi nirqani kutimuptiki tapunaypaq. ¿Ciertotachu Jesuspi mana iñinkichik?

Antonio: Allinmi chayta yachanaykipaq kikiytapuni tapuwasqaykiqa. Hukkunaqa mana kaqtapas niwachwanmi.

Luis: Arí.

Antonio: Jehova Diospa testigonkunaqa iñinikum Jesuspiqa. Manam chayllachu, paypi mana iñispaykuqa manam salvakuymankuchu.

Luis: Chaytam ñoqapas piensachkarqani. Ichaqa llamkaqmasiy mana chaynata piensaptinmi tapukuyta munarqani. Manaraqmá haykapipas chaymantaqa rimarqanchikchu.

Antonio: Arí, ichaqa Bibliapi wakin textokunam qawachin imanasqa Jesuspi iñiyqa ancha allin kasqanmanta. Runakunaman yachachispaykum chay textokunata servichikuniku. ¿Munawaqchu yachayta?

Luis: Arí, munaymanmi.

Antonio: Kikin Jesusmi huk kaqnin qatiqninta nirqa, Juan 14:6 nisqapi: “Ñoqam kani ñan, cheqap kaqpas chaynataq kawsay qokuqpas. Taytaymanqa manam pipas chayanmanchu mana ñoqawanqa”, nispa. Kaypi nisqanman hinaqa, ¿imaynatataq Taytanman asuykuchwan?

Luis: Jesusnintakamam.

Antonio: Awriki. Chaytam Jehova Diospa testigonkunaqa ruwaniku. Bibliamanta yachasqaykiman hina tapusqayki, ¿pipa sutinpitaq Diosta mañakunanchik?

Luis: Jesuspa sutinpim.

Antonio: Arí, chaymi ñoqapas Diosta mañakuspayqa paypa sutinpi ruwani. Chaytam llapallan iñiqmasiykunapas ruwanku.

Luis: Allinmi.

Antonio: Kunanñataq qawasun Juan 3:16 nisqanta. Kaypim pisi rimayllapi willachkan Jesuspa vidanmanta hinaspa imapaq hamusqanmantapas. ¿Leeykuwaqchu kay versiculopa nisqanta?

 Luis: Ninmi: “Diosqa ancha-anchatam kuyarqa runakunata, chaymi sapallan Churinta qomurqa pipas paypi iñiqqa manaña puchukaspa wiñaypaqña kawsananpaq.”

Antonio: Gracias. ¿Haykapipas leerqankichu kay textota?

Luis: Arí, iglesiaypim uyarirqani.

Antonio: Achkam reqsinku ¿aw? Rimarisunchik ima niy munasqanmanta. Jesusmi nirqa Dios kuyawasqanchikrayku wiñay kawsay haypananchikmanta, ichaqa ¿imatam ruwananchik?

Luis: Iñinanchikmi.

Antonio: Arí, sapallan Churin Jesucristopim iñinanchik. Jesuspi iñispallam wiñay kawsaytaqa haypasunchik, chaytam nin apamusqay Willakuq revistapa 2 kaq paginanpas. Kallpanchantaqmi Diospa Gobiernonpi hinaspa Jesucristopi iñinapaqpas, “paymi wiñay kawsayta haypanapaq wañukurqa”.

Luis: Kaypipas nisqam ¿aw?

Antonio: Awriki.

Luis: Hinaptinqa, ¿imanasqataq runakunaqa ninku Jesuspi mana iñisqaykichikta?

Antonio: Ichapas chaynataqa ninku religionninkupi punta apaqkunapa otaq runakunapa nisqanta uyarisqankurayku.

Luis: Chaytaqa ichapas ninku Jehova Diospa testigonkunawan sutichakusqaykichikraykupas.

Antonio: Kanmanmi.

Luis: Chaynaqa, ¿imanasqataq llumpayta Jehova Diosmanta rimankichik?

“YACHACHIRQANIM PIM KASQAYKITA”

Antonio: Diospa sutin Jehova kasqanraykum, hinaspapas yachanikum sutinta servichikuyqa allinpuni kasqanta. Jesuspas servichikurqam. Juan 17:26 nisqanpim Taytanta mañakuspan kaynata nirqa. ¿Leeykuwaqchu?

Luis: Arí, ninmi: “Yachachirqanim pim kasqaykita, chaywanpas hinallaraqmi yachachisaq chaynapi kuyawasqaykiman hina paykunapas kuyanakunankupaq chaynataq ñoqapas paykunapi kanaypaq.”

Antonio: Gracias. Qawasqaykiman hinam Jesusqa Diospa sutinmanta willakurqa. Ichaqa, ¿imanasqam willakurqa?

Luis: Imanasqaya, manam yachanichu.

Jesuspi mana iñispaqa manam salvakuytaqa atichwanchu

Antonio: Chaypaq leesunchik Hechos 2:21 nisqanta (Chuya Qellqa, revisión 2012). Ninmi: “Ichaqa haykam Señorpa sutinta qayakuqmi salvasqa kanqa”, nispa. Qawasqanchikman hinam Diospa sutinta qayakuqkunalla otaq servichikuqkunalla salvasqa kanqaku. Chaytam Jesuspas yacharqa.

Luis: ¿Aw?

Antonio: Chaymi paypaqqa ancha allinpuni karqa, Taytanpa sutinta servichikuynin hinaspa qatiqninkunaman reqsichiypas. Chayraykutaqmi ñoqaykupas sutinmanta willakuniku, hinaspam munaniku runakuna reqsinankuta chaynataq servichikunankutapas.

Luis: Ichaqa Diospa sutinta runakuna mana yachaspankupas otaq mana servichikuspankupas, yachankum pi kasqantaqa.

Antonio: Yaqapaschá, ichaqa Diosmi sutinta willawarqanchik payman asuykunanchikpaq.

Luis: ¿Imaynataq chayqa?

Antonio: Yaqa llapanchikmi yachanchik, Puka Lamar Qochata huk runa kichasqanmanta hinaspa chunka kamachikuykunata chaskisqanmantapas, ¿aw? Yachanchiktaqmi hatu-hatun buqueta ruwaspan huk runa familiantawan  animalkunata salvasqanmantapas. ¿Sasachawanchikchu sutinkuta mana yachasqanchik paykunamanta yachanapaq? Manam ¿aw? Huchanchikrayku wañunanpaq hanaq pachamanta hamuq runapa sutinta mana yachasqanchikpas manam sasachawanchikchu, ¿aw?

Luis: Manam.

Antonio: Ichaqa, Diosmi paykunapa sutinkuta willawanchik, chaynapi mana reqsispanchikpas sutinkuta yachasqanchikrayku cheqap runakunata hina qawananchikpaq. Sutinkum: Moises, Noey hinaspa Jesus.

Luis: Manam haykapipas chaynataqa piensarqanichu.

Antonio: Chaymi ñoqaykuqa Jehova Diospa sutinta servichikuniku, munanikum lliw runakuna payta reqsispanku hapipakunankuta chaynataq amistadninkuta hina qawanankutapas. Ichaqa reqsikunikum Jesusnintakama salvakuy atisqaykuta. ¿Qawaykuchwanchu chaymanta rimaq textota?

Luis: Allinmi kanman.

Antonio: Kaqmanta yuyarisun Juan 14:6 nisqanta, chaypim Jesus nirqa: “Ñoqam kani ñan, cheqap kaqpas chaynataq kawsay qokuqpas”, nispa. Kunanñataq leeykuy Juan 14:1 (Señorninchik Jesucristopa Musoq Testamenton) versiculopa tukuyninpi nisqanta.

Luis: Ninmi: “Diosmanmi iñinkichik, ñuqamampas iñiwankichiktaqmi”.

Antonio: Kaypi nisqanman hinaqa, ¿akllakunanchikchu Jehova Diospi iñinapaq otaq Jesuspi iñinapaqpas?

Luis: Manam. Jesusmi nirqa iskayninkupi iñinapaq.

Antonio: Chaynamá. Chaymantapas manam iñinim niyllachu, aswanqa ruwasqanchikwanmi qawachina.

Luis: Chaynamá.

Antonio: ¿Imaynatam chayta ruwana? ¿Allinchu kanman kaqmanta watukamuptiy chaymanta rimayninchik? *

Luis: Allinmi kanman Antonio.

¿Kanchu Bibliamanta ima tapukuynikipas? ¿Munawaqchu yachayta Testigokuna imapi creesqankumanta otaq imatapas imanasqa sapa kuti ruwasqankumanta? Chaynaqa watukamusuptikim chaykunamanta tapuwaq. Paykunaqa qanwan parlariytam munanqaku.

^ par. 60 Astawan yachanaykipaq qaway ¿Imatapunim Bibliaqa yachachin? niq libropa 12 kaq yachachikuyninta, chayqa Jehova Diospa testigonkunapa ruwasqanmi. Horqowaqtaqmi jw.org/quy nisqanmanta.