3. Yanapakuytam chaskina
Bibliata entiendenapaq yanapakuykuna
3. Yanapakuytam chaskina
Estudioso Edward John Eyre sutiyoq runam, Australia lawpi chunchu runakunapa yanapakuyninta chaskirqa, Nullarbor sutiyoq aqollaña chunniq lawninta risqanpi. Paykunawanmi aqollaña orqopi imayna yaku tariyta yacharqa hinaspa eucaliptomanta imayna yaku horqoytapas, chaymi qepa punchawkunapi mana wañurqachu.
KAYMI yachachiwanchik ima ruranapaqpas yanapakuy necesitasqanchikta. Chaynallataqmi Bibliata entiendenapaqpas necesitanchik pipas yanapawananchikta.
Jesuspas yacharqam qatiqninkuna Diospa Palabranta kikillankumanta mana entiendenankuta. Chaymi huk kutipi ‘yuyayninkuta kichaykuspan [. . .] entiendechirqa Bibliapa nisqanta’ (Lucas 24:45). Jesusqa yacharqam Bibliapa yachachikuyninta entiendenapaq yanapakuy necesitakusqanta.
Maypitaq yanapakuyta tarichwan
Jesusmi qatiqninkunata kamachirqa chay yanapakuyta qonankupaq. Manaraq cieloman richkaspanmi nirqa: “Llapallan nacionpi runakunaman rispayá willamuychik qatiqniykunaña kanankupaq [. . .]. Yachachimuychikyá qamkunaman tukuy ima kamachisqayta kasukunankupaq”, nispa (Mateo 28:19, 20). Arí, cristianokunapa rurayninqa Bibliamanta runakunaman yachachiymi, yachachinankutaqmi imayna kasukunankupaqpas. Hinaptinqa cheqap cristianokunaqa runakunatam yanapananku Bibliata entiendenankupaq.
Qatiqninkunata Jesus chay kamachisqanmanta manaraq unay kachkaptin ima pasasqanmantayá qawasunchik. Bibliam willawanchik Etiopia nacionpi kamachikuq huk runa Jerusalenmanta kutispan, willakuq Isaiaspa qellqasqan librota leespan mana entiendesqanmanta. Chay libropi leesqanmi kayna karqa: “Nakanankupaq ovejata hina pusaptinkum mana rimarirqachu. Imaynam carnero kanman millwan rutuqninpa qayllanpi upallalla, chaynam paypas Hechos 8:32, 33; Isaías 53:7, 8).
karqa ñakarichiqninkunapa qayllanpi upallalla. Humillaykachispankum mana allin arreglotachu rurapurqaku. ¿Pitaq willakunman mirayninmanta wañurachichkaptinkuqa?”, nispa (¿Imatam rurarqa chay kamachikuqqa? Bibliamanta yachaq Felipe sutiyoq cristianotam valekurqa yanapananpaq. Hinaptinmi chay kamachikuq tapurqa Felipeta: “Niykuway ¿pimantataq kay willakuqqa rimachkan, kikinmantachu icha pimantataq?”, nispa (Hechos 8:34). Kay kamachikuqqa Jerusalenmantam kutimurqa, payqa Diosta yupaychaqmi karqa, chaynaqa Diostachá mañakurqa leesqanta entiendenanpaq. Hinaspapas payqa yachayta munaspam leerqa. Chaywanpas manamá allintaqa entienderqachu. Ichaqa humilde kaspanmi Felipeta mañakurqa yanapananpaq. Felipeñataqmi mana hukmanyachispalla yachachirqa. Allinta entienderuspanmi kamachikuq runaqa anchata kusikuspan chaylla bautizakuyta munarqa (Hechos 8:35-39).
Kunan tiemponchikpipas Jehová Diospa testigonkunaqa punta cristianokuna hinam rurachkanku. Mana imallapaqmi Bibliamanta yachachinku 235 nacionkunapi hinaspa llaqtakunapipas. Chaypaqmi sapa kuti tiempochakuspanku Bibliapa sapakama yachachikuyninta estudiachinku. * (Qaway “Bibliamanta tapukuykunapa kutichiynin”, niqta.)
Bibliaqa lliw tapukuykunatam kutichin
Kay revistapa qallariyninpi rimamusqanchik Steven, Valvanera hinaspa Jo-Annem, Jehová Diospa testigonkunawan Biblia estudiayta qallaykurqaku. ¿Imapim tukurqa? Stevenmi willakun: “Anchatam admirakurqani tapukuyniykunapa kutichiyninkuna mana sasa entiendenapaq kasqanta yacharuspay. Willakuyninkunatawan textokunallatam tupachina kasqa. Manamá haykapipas chaynataqa estudiarqanichu. Chaymantapas Bibliapa yachachikuyninta entiendenapaqqa manam atipanakunaraqchu kasqa, chaywanmi kusikurqani”, nispa.
Chaynam pasarqa Valvaneratapas, paymi nin: “Cuentatam qokurqani Bibliapa yachachikuyninkuna allin tupasqanta. Bibliapim creerqani yachachikuynin allin kasqanrayku, ichaqa manam Iglesiapi runakuna niwaptinkuchu”, nispa. Jo-Annepas kaynatam nin: “Lliw tapukuyniykunata Biblia kutichiwasqanraykum Dios respetayta qallaykurqani. Admirakurqanim ima tapukuykunapapas kutichiynin Bibliapi qellqasqa kasqanwan”, nispa.
Jehová Diospa testigonkunamanta, ¿pitapas reqsinkichu? Ichapas qampas paykunata tapukuwaq, Biblia estudiay imayna kasqanmanta. Mana pitapas reqsispaykiqa qellqawaqmi kay revistapa iskay kaq paginapi rikuriq mayqan direccionmanpas, chaynapi visitamusunaykipaq. Yuyariy Bibliaqa manam sasa entiendena librochu. Yachamusqanchikman hinaqa kaykunallatam ruranayki: Diospa chuya espiritunta mañakuy, runakunapa rimasqanta mana kasuspa leey, hinaspa Bibliamanta allin yachaqwan yanapachikuy.
[Willakuy]
^ par. 10 Chaypaqmi yaqa llapanpi servichikunku, ¿Imatapunim Bibliaqa yachachin?, librota. Kay libroqa Jehová Diospa testigonkunapa rurasqanmi.
[8 kaq paginapi dibujo hinaspa recuadro]
Bibliamanta tapukuykunapa kutichiynin
Jehová Diospa testigonkunam Bibliamanta estudiota qospanku kay tapukuykunata kutichinku:
• ¿Imatam Dios munan kay Allpa pachapaq?
• ¿Maypitaq wañusqakunaqa kachkan?
• ¿‘Tukupay tiempokunapichu’ kawsachkanchik?
• ¿Imaraykutaq Diosqa saqen ñakariykuna kananta?
• ¿Imatam rurana ayllupi kusisqa kawsanapaq?
[7 kaq paginapi dibujokuna]
Bibliata entiendenapaqqa Diospa chuya espirituntam mañakuna, runakunapa rimasqanta mana kasuspam leena hinaspapas yanapakuytam maskana