Yachachikuypa kasqanman rinapaq

Yachachikuyman rinapaq

Juanpa hinaspa Judaspa cartankunamanta allinnin yachachikuyninkuna

Juanpa hinaspa Judaspa cartankunamanta allinnin yachachikuyninkuna

 Jehová Diospa Palabranqa kawsachkanmi

Juanpa hinaspa Judaspa cartankunamanta allinnin yachachikuyninkuna

APOSTOL Juanqa yaqapaschá 98 kaq watapi kimsa cartankunata qellqarqa Efeso llaqtapi, kay cartakunaqa Bibliapa tukupayninpim kachkan. Punta kaq hinaspa iskay kaq cartankunaqa kallpanchachkanmi Diospa achkiyninpi purinankupaq chaynataq Diosta qepanchakuqkunamanta cuidakunankupaqpas. Kimsa kaq cartanpiñataqmi kallpanchan Diospa achkiyninpi purispankupas yanapanakunankupaq.

Jesuspa wawqen Judaspas 65 kaq watapim Palestina llaqtapi cartanta qellqarqa. Chay qellqasqanpim iñiqmasinkunata nirqa congregacionpi mana allin runakuna rikurimusqanmanta, hinaspam consejarqa imaynata atipanankupaq. Juanpa kimsa cartankunamantawan Judaspa cartanmanta yachasqanchikqa sasachakuykunapipas kallpanchawasunmi iñiyninchikpi allinta takyananchikpaq (Heb. 4:12).

DIOSPA ACHKIYNINPI, KUYANAKUYPI HINASPA IÑIYPI TAKYASUN

(1 Juan 1:1–5:21)

Punta kaq cartantam Juanqa qellqarqa llapallan cristianokunapaq hinaspapas consejarqam Diosta qepanchakuqkunamanta cuidakunankupaq chaynataq cheqappi allinta takyaspa allin kaqta ruranankupaqpas. Qawachintaqmi Diospa achkiyninpi purisqanku, kuyanakusqanku hinaspa iñiyninkupi takyasqanku imanasqa allin kasqantapas.

Juanmi qellqarqa: “Diosninchik hina achkiypi purispam [. . .] llapallanchik huklla kachkanchik”, nispa. Chaymantapas, kuyakuyqa Diosmanta kasqanraykum kaynata nin: “Kuyanakunanchikmi”, nispa. ‘Diosta kuyasqanchikmi’ yanapawanchik ‘kamachikuyninkunata kasukunanchikpaq’, chaynallataqmi Palabranpi hinaspa Churinpi ‘iñisqanchikpas’ yanapawanchik kay pachapi mana allinkunata atipanapaq (1 Juan 1:7; 4:7; 5:3, 4).

Bibliapi wakin textokunamanta tapusqankuta contestasqanku:

2:2; 4:10. ¿Imaynanpitaq Jesusqa Diospa “piñakuyninta amachananpaq wañurqa”? Diospa kamachisqan leyta cumplinanpaqmi huchanchikrayku wañurqa, chaynata ruraspanmi Diospa piñakuyninta amacharqa. Jesuspa wañukusqanpi iñiqkunatam Diosqa llakipayarispan huchankutapas pampachaykunman (Juan 3:16; Rom. 6:23).

2:7, 8. ¿Ima kamachikuytam Juan suticharqa ‘ñawpaq [. . .] kamachikuy’ chaynallataq ‘mosoq kamachikuy’ nispa? Juanqa kuyanakuymanta chaynataq yanapanakuymantam rimachkarqa (Juan 13:34). ‘Ñawpaq’ kamachikuy nispanqa rimachkarqa kay cartanta manaraq qellqachkaptin 60 wata ñawpaqtaraq Jesuspa kamachisqan kasqanraykum. Chaymi nirqa iñiqkunaqa cristiano kasqankumantapacha hatallisqankuta. ‘Mosoq’ kamachikuy nispanqa rimachkarqa manam runamasinchikta kuyanallamantachu  aswanqa allinninkupaq tukuy ima ruraymantam (Lev. 19:18; Juan 15:12, 13).

3:2. ¿Imatataq hanaq pachaman riqkuna ‘manaraq yachankuchu’, hinaspa pitam rikunqaku ‘imayna kasqanman hina’? Paykunaqa manaraqmi yachankuchu hanaq pachapi espiritu cuerpopi kawsarispanku imayna kanankumanta (Fili. 3:20, 21). Ichaqa yachankum hanaq pachapi kawsarispanku Diosman rikchakunankuta, paytam rikunqaku ‘imayna kasqanman hina’, “[Diosqa] Espiritum” (2 Cor. 3:17, 18).

5:5-8. ¿Imaynatam yakupas, yawarpas chaynataq espiritupas willakurqaku “Jesusqa Diospa Churin kasqanta”? Bautizakusqan yakumanta Jesus lloqsiramuptinmi Jehová Diosqa churinta aprobarqa (Mat. 3:17). ‘Llapallanchikta salvawananchikpaq’ yawarninta chaqchusqanwanmi qawachirqa Diospa Churin kasqanta (1 Tim. 2:5, 6). Bautizakusqan yakumanta lloqsiykuptin chuya espiritu hawanman chayamusqanwanmi qawachirqa Diospa churin kasqanta, hinaptinmi “pay purirqa allinkunata rurastin chaynataq Satanaspa llapa ñakarichisqan runakunata sanoyachistin” (Juan 1:29-34; Hech. 10:38).

Imatam yachachwan:

2:9-11; 3:15. Sichu huk cristiano imawanpas kuyakuyninta chinkarachispanqa iñiyninpim tutayaypi hina tarikun.

HINALLA ‘CHEQAP KAQPI KAWSAYCHIK’

(2 Juan 1-13)

Kaynata nispanmi iskay kaq cartanta Juan qellqayta qallarirqa: “Ñoqa anciano Juanmi Diospa akllasqan señoraman hinaspa wawankunaman”, nispa. Hinaspa ‘wakin wawankuna’ ‘cheqap kaqpi kawsasqankumanta’ yachaspanmi kusikusqanta qellqarqa (2 Juan 1, 4).

Iñiqmasinkunata kuyakuq kanankupaq kallpanchaspanmi kaynata nirqa: “Kuyanakuyqa Diospa kamachikuyninkunaman hina kawsakuymi”, nispa. Nirqataqmi ‘pantachikuqmanta hinaspa anticristomantapas” cuidakunankupaq (2 Juan 5-7).

Bibliapi wakin textokunamanta tapusqankuta contestasqanku:

1, 13. ¿Pitaq chay ‘akllasqa señoraqa’? Yaqapaschá rimachkarqa Kiria sutiyoq warmimanta, griego rimaypim Kiria ninanqa “señora” ninan. Otaq kaynataqa nirqa enemigonkuta pantachinanpaqchá, ichaqa huk kaqnin congregacionmantam rimarqa. Chayna kaptinqa wawankunaqa congregacionpi iñiqkunam, ‘ñañanpa wawankunañataqmi’ huknin congregacionpi kaqkuna.

7. ¿Pipa runayasqanmantam Juan rimarqa, hinaspa pantachiqkunaqa imanasqataq ‘mana creerqakuchu’? Jesus kay pachaman hamuspan runayasqanmantawan sapaqchasqa kananmantam rimachkarqa (1 Juan 4:2). Pantachiqkunaqa Jesucristo kay pachaman hamusqanta hinaspa chuya espirituwan sapaqchasqa kasqantapas manam creenkuchu.

Imatam yachachwan:

24Bibliapi cheqap yachachikuykunata reqsispa kasukuymi ancha allin salvakunanchikpaq (3 Juan 3, 4).

8-11. ‘Dios Taytanchikpa, Churin Jesucristopa [. . .] kuyakuyninta, llakipayakuyninta hinaspa hawkalla kawsachiwasqanchikta’ chaynataq iñiqmasinchikpa amistadninta mana chinkachinapaqqa Dios serviyninchikpi imayna kasqanchiktam cuidakunanchik hinaspam ‘Jesucristopa yachachikuyninkunapi mana takyaqkunata’ qepanchananchik (2 Juan 3).

“CHEQAP WILLAKUYPI LLAMKAQMASIN KANANCHIKPAQ”

(3 Juan 1-14)

Kimsa kaq cartantaqa kuyasqan amistadnin Gayopaqmi qellqarqa kaynata nispa: “Iñichisqaykuna cheqap kaqpi kawsasqanmanta uyarispaymi ñoqaqa ancha-anchata kusikuni”, nispa (3 Juan 4).

Juanmi kallpancharqa Gayota congregacionkuna watukuqkunata ‘allintapuni’ yanapasqanmanta. Juanmi nirqa: ‘Paykunataqa  yanapananchikmi cheqap willakuypi llamkaqmasin kananchikpaq’, nispa (3 Juan 5-8).

Bibliapi wakin textokunamanta tapusqankuta contestasqanku:

11. ¿Imanasqataq hukkunaqa mana allinkunata ruranku? Dios serviyninkupi mana allin kasqankuraykum Diospa yachachikuyninkunata mana entiendenkuchu. Hinaspam imatapas ruranku Diospa mana rikusqanta piensaspanku (Eze. 9:9).

Imatam yachachwan:

4. Iñiyninkupi allin takyaq wawqe-panikunaqa kusikunkum mozo-sipaskuna ‘cheqap kaqpi kawsasqankuta’ qawaspanku. Tayta-mamakunapas, ¡maynataraqchá kusikunku Jehová Diosta servinankupaq wawa-churinkuta yanapasqankumanta!

5-8. Congregacionkunata watukuq wawqenchik, misionerokuna, Betelpi llamkaqkuna hinaspa precursorkunapas iñiqmasinkuta hinaspa Jehová Diosta kuyasqankuraykum tukuy sonqonkuwan llamkanku. Iñiyninkuqa allinmi qatipakunapaq hinaspa kallpanchananchiktam necesitanku.

9-12. Demetriopa allin ejemplontam qatikunanchik manam rimaysapa yanqa rimaq Diotrefestachu.

“DIOSPA KUYAKUYNINPIYÁ WAQAYCHAKUYCHIK”

(Judas 1-25)

Congregacionman engañowan yaykuqkunamantam Judas nirqa: “Pipapas qepanpi rimaspankum quejallapi purinku kikillankupa mana allin munasqankuman hina”. “Paykunaqa hatun tukurusparaqmi rimankupas hinaspam runakunata alabanku”, nispa (Judas 4, 16).

¿Imaynatataq cristianokunaqa mana allin ruraqkunamanta cuidakunmanku? Judasmi kaynata nirqa: “Kuyasqallaykuna, yuyariychikyá Señorninchik Jesucristopa apostolninkunapa ñawpaqmantaraq kayna nisusqaykichikta”. “Diospa kuyakuyninpiyá waqaychakuychik”, nispa (Judas 17-21).

Bibliapi wakin textokunamanta tapusqankuta contestasqanku:

3, 4. ¿Imanasqataq Judasqa cristianokunata kallpancharqa ‘iñisqankuta defiendenankupaq’? Congregacionman ‘achka runakuna engañowan yaykuramusqankuraykum’. Chay runakunaqa “Diostapas manam adorankuchu, Diosninchikpa favornintapas tikrarunku qanra vidapi purikuymanñam”.

20, 21. ¿Imaynatataq ‘Diospa kuyakuyninpiqa waqaychakuchwan’? 1) ‘Wiñananchikmi suma-sumaq iñiyninchikpi’, kaytaqa ruranchik Bibliata estudiaspa hinaspa tukuy sonqowan predicaspam; 2) ‘Diostam mañakunanchik Chuya Espiritupa yanapakuyninwan’ hinaspa 3) Rantinchikpi Jesuspa wañusqanpim iñinanchik, chaywanmi wiñay kawsayta haypasunchik (Juan 3:16, 36).

Imatam yachachwan:

5-7. ¿Mana allin ruraq runakuna Diospa piñakuyninmanta atinmankuchu lluptiyta? Kimsa ejemplokunamanta Judaspa nisqanman hinaqa manam lluptiytaqa atinmankuchu.

8-10. Angelkunata kamachiq Miguelqa manam pitapas ñakarqachu. Ñoqanchikpas Diospa nombrasqan serviqninkunatam respetananchik.

12. Cheqap yachayta saqeqkunaqa kuyakuq tukuspankum iñiyninchikta yanqacharunmanku, paykunaqa nadeaqkunata chaynataq buquekunata peligroman churaq mayu ukupi rumikuna hinam kanku. Hinaspa mana yakuyuq puyu hinam kanku iñiyninkupi mana allin kasqankurayku. Chayna runakunaqa kanku usyay tiempopi mana ruruyoq chakisqa sacha hinam. Chaymi puchukachisqa kanqaku. Karunchakunachikpunim paykunamantaqa.

22, 23. Cheqap cristianokunaqa cheqninkum mana allin ruraykunata. Iñiyninkupi allin takyasqa wawqekunaqa ‘iskayrayaqkunatam’ yanapanku wiñaypaq mana puchukachisqa kanankupaq.

[20 kaq paginapi dibujokuna]

Yakupas, yawarpas chaynataq espiritupas willakurqakum “Jesusqa Diospa Churin kasqanta