¿Imatam sacerdotekuna ruwaqku templopi wañuchisqanku animalkunapa yawarninwan?

ÑAWPAQ Israel nacionpi sacerdotekunaqa sapa watam waranqantin animalkunata templopi wañuchiqku. Judio runakunamanta allinta yachaq Josefo sutiyuq runapa nisqanman hinaqa pascua punchawllapiraqsi 250.000 ovejakunata wañuchiqku. Chaynaqa, achka-achkachá animalkunapa yawarninqa lluqsiq (Lev. 1:​10, 11; Num. 28:​16, 19). ¿Imatam ruwaqku chaynaña yawarwanqa?

Ñawpaq tiempomanta estudiaq runakunam Jesuspa tiemponpi kaq templopa kasqanta uchkuspanku tarirunku desagüeyuq sumaq ruwasqa kasqanta. Yaqachusmi chayqa karqa templomanta hawaman yawar lluqsinanpaq.

Imayna chay kasqanmantayá yachaykusun.

• Altarpa sikinpi uchkukuna kasqanmanta. Yaqa 200 wata pasayta judiokunapa kamachikuyninkunamanta qillqasqanku Misná sutiyuq libropim altarpaq ruwasqanku desagüekunamanta nin: “Altarpa huknin esquinanpim iskay uchku karqa. Chay uchkumanmi yaykuq challasqanku yawarpas chaynataq altarta lavasqanku yakupas.Chaynintam Cedron wayquman chayaq”, nispa.

  Misná libropa nisqanqa tupantaqmi judiokunamanta rimaq kay tiempopi qillqasqanku huk libropa nisqanwanpas. Chaypim nin ñawpaq tiempomanta estudiaq runakuna aspispanku uchkukunata tarisqankuta. Nintaqmi: “Yaqachusmi chayqa karqa templomanta hawaman yawarniyuq yaku lluqsinanpaq”, nispa.

• Achka-achka yaku kasqanmanta. Sacerdotekunaqa achka yakutam necesitarqaku altarta limpianankupaqqa hinaspa yawarta uchkuntakama pasachinankupaqqa. Chaypaqqa llaqtamantam yarqantakama pusaqku. Karqataqmi ruwasqanku pozokunapas chaynataq quchakunapas. Ñawpaq tiempomanta estudiaq Joseph Patrich sutiyuq runam nin: “Ñawpaq tiempopiqa manam huk temploqa karqachu mayninta yaku yaykunanpaq hinaspa lluqsinanpaq sumaq ruwasqaqa”, nispa.