Yaqa 2000 wata chayaykamuchkaptinmi betelpi iñiqmasinchikkunata Franciapi gobierno nirqa 1993 watamanta 1996 watakama donacion chaskisqankumanta impuestota paganankupaq. Chaymi hina Franciapi juezkunaman quejakurqaniku, ichaqa manam favorninchikpichu sayarqaku. Juiciopi pierderuptinchikmi Franciapi gobiernoqa hapikuykurqa 6.300.000 dolar qullqinchikta. Chayraykum enteron Europapi riqsisqa juezkunamanña quejakurqaniku. Ichaqa chay juezkunam niykuwarqaku manaraq juicioman richkaspayku encargasqanku juezapa qayllanpi Francia gobiernopa abogadonkunawan huñunakunaykupaq, chaynapi ima acuerdomanpas chayanaykupaq.

Ñuqaykuqa piensarqanikum chay juezaqa gobiernopa mañawasqanku qullqimanta wakinta paganaykupaq niwanankuta, chaynapi manaña juicioman rinaykupaq. Ichaqa manam imaniraqllatapas quytaqa piensarqanikuchu, manachayqa manach bibliapa nisqanta kasukuchkaymankuchu karqa. Iñiqmasinchikkunaqariki qullqichankutaqa qurqaku Diosmanta willakuy apakunanpaqmi, manam gobiernoman qunapaqchu (Mat. 22:21). Chaywanpas hinatam rirqaniku chay juezapa qayllanman Europapi juezkunapa nisqanta kasukuspayku.

Suma-sumaq wasipim huñunakurqaniku. Rimayta qallaykuptillaykum piensasqaykuman hina chay juezaqa niykuwarqaku gobiernopa mañawasqanku qullqimanta wakillantapas qunaykupaq. Chaynata niptinmi qunqaymanta niykurqaniku: “¿Yacharqankichu Francia gobiernoqa 6.300.000 dolar qullqiykuta hapikuykusqanta?”, nispa.

 Chayta uyariruspanmi juezaqa hukmanyarurqa, payqa manam chaytaqa yachasqachu, chaymi Francia gobiernopa abogadonkunata tapuykurqa. Paykuna “chayqa ciertom” niykuptinkum juezaqa paykunata reclamarqa hinaspam manaña mastaqa parlayta munarqachu. Chaywanmi cuentata qukururqaniku Jehova Dios yanapawasqankuta. Chay huñunakuymantam kusisqallaña lluqsirqaniku, mana creenapaq hinam tukuy chayqa karqa.

2011 watapim 30 de junio killapi Europapi juezkunaqa llapanku favorninchikpi sayarqaku. Francia gobiernotam kamachirqa donacionta chaskisqanchikraykuqa impuestota mana cobrawananchikpaq, hinaspapas nirqataqmi qullqi hapikuykusqankuta interesniyuqta kutichipuwananchikpaq. Chay juezkunapa tantiasqankuqa kunankamam Franciapi iñiqmasinchikkunata yanapachkan. Qunqaymanta tapuykusqaykuqa karqa Goliatta urkunpi hapiruq rumi hinam. Imaynam Davidpas yacharqa Diospa yanapakuynillanwan Goliatta vencerusqanta, chaynam ñuqaykupas yacharqaniku Diospa yanapakuynillanwan chay juiciota ganarusqaykuta (1 Sam. 17:​45-47).

Achka kutipim juiciokunataqa ganarqanchik religionpi punta apaqkuna hinaspa atiyniyuq autoridadkuna contranchikpi kachkaptinkupas. Kunankamaqa 1.225 kutikamam 70 nacionkunapi chaynataq ancha riqsisqa juezkunapa qayllanpi juiciokunata ganarqanchik. Chay juiciokuna ganasqanchikraykum gobiernopa reconocisqan kanchik hinaspa Diosninchikmanta libre willakuyta atinchik. Manataqmi pipas mana obligawanchikmanchu bandera izaypi hinaspa desfilaypi participanapaqqa utaq yawarta churachikunapaqqa.

Willasqaykichik imanasqa Estados Unidos betel wasipi llamkachkaspaypas Europa lawpi contranchikpi juicio kaptin yanapakuq risqaymanta.

TAYTA-MAMAYQA HUKLAW NACIONKUNAPIM WILLAKUQKU

Tayta-mamaypa sutinqa Georgewan Lucillem, paykunaqa galaad escuelamanmi rirqaku, hinaspam Etiopia nacionpi yanapakuchkarqaku. Chaypim 1956 watapi nacerqani, chaymi Philipwan suticharuwarqaku Diosmanta ‘willakuq Feliperayku’ (Hech. 21:8). Chaymanta watallamanmi Etiopiapi gobierno manaña munarqachu Diosmanta willakunanchikta. Taksa warmacharaq kaspaypas allintam yuyachkani huñunakuykunaman chaynataq willakuqpas tayta-mamaywan pakan-pakanlla risqaykuta. Chayqa ñuqapaqqa manam hukmanchu karqa, ichaqa 1960 watapim gobierno niykuwarqaku Etiopiamanta pasakunaykupaq.

Estados Unidosmanmi ripukurqaniku, Wichita sutiyuq llaqtapim yacharqaniku. Chaypipas tayta-mamayqa tukuy tiemponkuwanmi Diosmanta  willakurqaku. Tayta-mamaykuqa Diosta kasukunaykupaqmi yachachiwarqaku mayorniy Judyta, ñuqata chaynataq sullkay Leslietapas. Paykunapas Etiopiapim nacerqa. 13 wataypim bautizakurqani, chaymanta kimsa wata pasaytam Peru nacionpi Arequipa llaqtaman rirqaniku. Chaypiqa manam achkachu Diosmanta willakuqkunaqa karqaku.

1974 watapim 18 watallaypiraq kachkaptiy Peru nacionpi betel wasipi kaqkuna ñuqatawan tawa iñiqmasinchikkunata niykuwarqaku precursor especial kanaykupaq. Niykuwarqakum urqukunapi Diosmanta mana willakusqanku llaqtakunaman rispayku willakamunaykupaq. Chaypim willakurqaniku quechuata chaynataq aimarata rimaq runakunaman. Risqayku carrollapitaqmi puñuqpas kaniku, chaypi puñunaykupaqmi sumaqta allicharurqaniku. Chay carrotaqa cuadrado hina kasqanraykum “Arca” nispayku suticharurqaniku. Kusikuywanmi yuyarini chaypi yachaq runakunapaq bibliata leepuspay wakchayaypas, unquypas, wañuypas chinkananmanta willakusqayta (Apoc. 21:​3, 4). Achkaqmá willakusqaykuta uyarispanku bautizakuyman chayarqaku.

ESTADOS UNIDOS BETEL WASIPI KANAYPAQMI NIYKUWARQAKU

1977 watapim iñiqmasinchik Albert Schroeder Peru nacionta hamurqa iñiqmasinchikkunata watukuq. Payqa karqa Diospa llaqtanpi punta apaqmi, paymi niwarqa Estados Unidos betel wasipi yanapakunaypaq solicitudta apachinaypaq. Chay watallapim 17 de junio killapi Estados Unidos betel wasipi yanapakuyta qallaykurqani. Tawa watam yanapakurqani limpieza ruwaypi chaynataq imapas allichaypi.

1978 watapim junio killapi Nueva Orleans llaqtapi hatu-hatun huñunakuyninchik karqa, chaypim riqsirurqani Elizabeth Avallone sutiyuq iñiqmasinchikta. Paypa tayta-mamanpas ñuqapa tayta-mamay hinam Diosmanta tukuy sunqunkuwan willakuq kasqaku. Elizabethpas tawa watañam precursora regular kasqa, tukuy tiemponwan Diosta serviytataqmi munarqa. Asamblea pasaytapas hinallam paywanqa parlaq kaniku. Chaymantam allinta riqsinakuruspayku 1979 watapi 20 de octubreta casarakururqaniku, hinaspam kuskayku betelpi yanapakurqaniku.

Huñunakurqanikuqa Brooklyn español congregacionpim, chaypi iñiqmasinchikkunaqa kuyakuqllañam karqaku. Watapa pasasqanman hinam kimsa congregacionkunapipas karqaniku. Chaypi iñiqmasinchikkunapas kuyakuqllañam karqaku, yanapawarqakutaqmi betelpi hinalla yanapakunaykupaqpas. Paykunatawan familiaytam anchata agradecekuniku tayta-mamayku yuyaqyaruptin atiendeypi yanapaykuwasqankumanta.

 ABOGADOPAQ ESTUDIASQAYMANTA

1982 watapim qunqaymanta niykuwarqaku Departamento de Asuntos legales nisqanpiña yanapakunaypaq. Kimsa wata pasaytañataqmi niykuwarqaku universidadman rispa abogadopaq estudianaypaq. Estudiaspaymi yacharurqani Jehova Diospa testigonkuna juiciokunaman rispa ganasqanchikmanta. Chay juiciokuna ganasqanchikqa Estados Unidospi chaynataq huklaw nacionkunapipas runakuna libre kanankupaqmi yanapan. Estudiasqaypiqa chaykunamantam una-unay rimaq kaniku.

1986 watapiñataqmi 30 wataypi kachkaptiy betelpi Asuntos legales nisqankumanta encargakunaypaq niykuwarqaku. Kusikurqanim jovenllaraq kachkaptiypas chaypi encargakunaypaq niykuwasqankuwanqa, ichaqa yacharqanim chayqa sasa kasqanta, chayraykum nikurqani “atisaqchu imaynaya” nispay.

1988 watapiñataqmi estudiayta tukuruspay abogadoña kanaypaq papelniykunata hurqururqani. Universidadpi kaspayqa mana musyayllatam imayna piensasqayta cambiarusqani. Pipas universidadpi estudiaspanqa hatuntukuqmi rikurirunman hinaspam piensanman estudiasqanrayku hukkunamanta aswan allin kasqanta. Ñuqapas yaqa chaynatañam piensachkarqani, ichaqa Elizabethmi yanapawarqa kaqmanta bibliata allinta estudiaspay hinalla Diospi hapipakunaypaq. Allintam yacharuni imatapas allinta yacharunamantaqa Jehova Diospa amistadnin kay, payta kuyay hinaspa iñiqmasinchikkunata kuyay aswan allin kasqanta.

MANA PIPA HARKASQAN WILLAKUNAPAQMI AUTORIDADKUNAPA LEYNINWAN RESPETACHINIKU

Estudiayta tukuruspayqa autoridadkunapa respetasqan Diospa llaqtan kananpaqmi tukuy tiempoywan yanapakurqani. Kusisqamá yanapakurqani, ichaqa Diospa llaqtanpi tukuy ima cambiasqanraykum sasa karqa. Willasqaykichik 1990 watapi ima pasarusqanta, chay watapim Diospa llaqtanpi punta apaqkuna niykuwarqaku qillqanchikkunata runakunaman quspa qullqita manaña mañanamanta. Chaymi munarqaku yanapaykunaykuta, chaypaqqa tukuytam averiguanayku karqa, chaynapi Diospa llaqtanpi punta apaqkuna allinta tantianankupaq. Allinta tantiasqankuraykum chay watamantaqa Jehova Diospa testigonkunaqa mana imallapaqña qillqanchikkunata qunchik, chayqa ancha allinmi karqa. Betelpi chaynataq congregacionkunapipas manañam chay qullqi huñusqankumanta encargakuqkunaqa karqañachu, autoridadkunapas manañam llumpaytaqa impuestotaqa cobrawarqanchikchu. Wakinkuqa nirqakum qillqanchikta quspa mana qullqita mañaptinchikqa mana qullqiyuq qiparunamanta hinaspa manaña Diosmanta willakunamanta, ichaqa manamá chaynachu karqa, kunanqa 1990 watapi kasqankumantaqa mas achkañam kanchik. Runamasinchikkunamanpas mana qullqillapaqmi qillqanchikkunata qunchik. Cuentatam qukuni Diospa yanapakuyninwan chaynataq Diospa llaqtanpi punta apaqkunapa nisqankuta kasukuptinchikqa imapas allin lluqsisqanta (Ex. 15:2; Mat. 24:45).

 Wakinpiqa juiciokunataqa ganarqanchik manam abogadonchikkunaraykuchu, aswanqa iñiqmasinchikkuna respetakuq hinaspa kuyakuq kasqankuraykum. Willasqaykichik Cuba nacionpi ima pasarusqanta. Chaypim 1998 watapi hatun huñunakuyninchikkuna karqa, chaymanmi Diospa llaqtanpi kimsa punta apaqkuna rirqaku señorankupiwan. Paykunapa kuyakuqllaña hinaspa respetakuqllaña kasqankuwanmi autoridadkunaqa cuentata qukurqaku gobiernopa contranpi mana kasqanchikta. Chayna kasqanchikmantam ñuqaykupas convencechiyta munarqaniku paykunawan huñunakuykunata ruwaspayku.

Wakinpiqa juiciomanpunim rinanchik hinalla ‘sumaq willakuyta mana pipa harkasqan willakunapaq chaynataq autoridadkunapa leyninwan respetachikunapaq’ (Filip. 1:7). Rimarisunchik Europa lawpi chaynataq Corea del sur nacionpi ima pasasqanmanta. Chaykunapiqa unaymi autoridadkunaqa iñiqmasinchikkunata obligarqaku militar kanankupaq. Chayraykum Diosta kasukuspa militar kayta mana munasqankurayku Europapi 18.000 chaynataq Corea del sur nacionpi 19.000 iñiqmasinchikkuna carcelman rirqaku.

2011 watapim 7 de julio killapi iñiqmasinchik Bayatyan Armenia nacionwan juiciopi karqa. Chay juiciopim iñiqmasinchik ganarurqa, chaymi juezkunaqa enteron Europapi autoridadkunata nirqa ama pitapas militar kananpaq obliganankupaq, aswanqa mana munaptinqa gobiernopaq imapipas llamkaspa yanapakunankupaq. Tiempo pasasqanman hinam 2018 watapi 28 de junio killapi Corea del sur nacionpipas yaqa chaynata chaypi juezkunapas tantiarurqaku. Tukuy chay juiciokunataqa ganarqanchik joven iñiqmasinchikkuna Diosman sunqu kasqankuraykullam.

Enteron allpa pachapi betel wasipi asuntos legales nisqankupi yanapakuq iñiqmasinchikkunaqa anchatam llamkanku, chaynapi hinalla Diosmanta willakunanchikpaq. Autoridadkuna mayqan iñiqmasinchikpapas contranpi kaptinqa ñuqaykum iñiqmasinchikpa favorninpi rimariniku, chayqa anchatam kusichiwan. Juiciota ganaspaykupas utaq mana ganaspaykupas autoridadkunaman hinaspa kamachiqkunamanmi Diosmanta willaniku, chaynapi paykuna hinaspa huklaw nacionniyuqkunapas Diosmanta yachanankupaq (Mat. 10:18). Documentokuna ruwasqaykupi bibliapa textonkunata churasqaykuraykum chaynataq juezpa qayllanpi textokunata nisqaykuraykum juezkunapas, autoridadkunapas chaynataq periodistakunapas bibliapa nisqanmanta yachanku. Tukuy chayraykum allin sunqu runakunaqa cuentata qukunku Jehova Diospa testigonkunaqa bibliapa nisqanta kasukusqanchikta, chaymi achkaq bibliata estudiayta qallaykurqaku, hinaspam kunanqa iñiqmasinchikkunaña kanku.

¡GRACIAS, TAYTALLÁY JEHOVA!

Yaqa 40 watañam enteron allpa pachapi achka nacionkunapi iñiqmasinchikkunata yanaparqani autoridadkunapa, juezkunapa qayllanman chayaptinku. Estados Unidospi chaynataq enteron allpa pachapi betel wasipi asuntos legales nisqankupi yanapakuq iñiqmasinchikkunataqa anchatam kuyani hinaspa admirani. Jehova Diosqa achkanpim bendeciykuwan, chaymi kusisqa tarikuni.

Señoray Elizabethqa 45 watapunim tukuy imapi yanapawarqa ima sasachakuyña kaptinpas, unqusqanrayku mana ancha kallpayuq tarikuspanpas. Chaymi paytaqa anchata kuyani.

Señoraywan ñuqaqa cuentatam qukuniku mayna yachayniyuqña kaptinchikpas Diospa yanapakuyllanwan imapas ruwakusqanta. Chaymi ñuqaykupas David hina niniku: “Jehova Diosmi runankunataqa kallpanchan”, nispayku (Sal. 28:8). Arí, ‘Jehova Diospa makillanpim kachkan’ tukuy imapas.