VIDANMANTA
Yachachiqninchik Diostam tukuy tiempo kasukurqaniku
WARMICHAYWAN precursor hinaspa huklaw nacionkunapi willakuq kaspaykum achka sasachakuykunata pasarqaniku. Wakinpim rikuq kaniku wañuchinakuyta, militarkunata, callepi tukuy ima kañasqankuta hinaspa llumpay wayra-parata. Chaymi qunqaymanta ayqikunayku karqa. Chaywanpas anchatam kusikuniku chaylawkunapi willakunaykupaq tantiakusqaykumanta. Jehova Diosninchikqa hinallam kunankama yanapawachkanku. Pay ‘suma-sumaq yachachiqninchik’ kasqanraykutaqmi ima ruwayniykupipas chaynataq kawsakuyniykupipas aswan allinta yachachiwachkanku (Job 36:22; Is. 30:20).
TAYTA-MAMAYQA QATIPAKUNAPAQMI KARQA
1957 watapim tayta-mamay Italiamanta Canada nacionman astakururqaku. Chaypim yacharqaku Saskatchewan provinciapa Kindersley sutiyuq llaqtachanpi, chay qipallamantaqmi Diosninchikmantapas yacharurqaku. Ñuqaykumanpas yachachiwarqakum Diosta serviy imamantapas aswan allin kasqanta. Yuyachkanim warmachallaraq kaptiy tayta-mamaywan hinaspa hermanoykunawan yaqa sapa punchaw Diosmanta willakusqaykuta. Chayraykum asispay nini: “Ñuqaqa pusaq watallaymantaraqmi precursor hinaña karqani”, nispay.
1966 watapi tayta-mamaywan, mayorniywan sullkachaykuna.
Tayta-mamayqa mana ancha qullqiyuq kaspankupas puntataqa Jehova Diospaqmi imatapas ruwaqku. 1963 watapim Estados Unidos nacionpi hatun huñunakuyman rinaykupaq tayta-mamay yaqa tukuy imaykuta rantikururqaku. 1972 watapiñataqmi Columbia Britanica provinciapi Trail sutiyuq llaqtachaman ripukurqaniku italiano rimayniyuq runakunaman Diosmanta willakunaykupaq. Chay llaqtaqa karullay-karum karqa. Taytayqa hatun tiendapim llamkarqa imatapas limpiaypi hinaspa imapas malograkuruptin allichaypi. Allin pagasqa llamkaykunata munachiptinkupas Jehova Diosninchikta astawan servinanraykum mana munaqchu.
Tayta-mamayqa ancha qatipakunapaqmi karqaku. Anchatam agradecekuni ñuqatawan kimsa hermanoykunata Diosta tukuy sunquykuwan servinaykupaq yanapawasqankumanta. Tayta-mamaypa tukuy yachachiwasqanwanmi mana iskayrayanichu Jehova Diospaq puntata ruwaptiy paypas yanapawananmantaqa (Mat. 6:33).
TUKUY TIEMPOYKUWANMI DIOSTA SERVIYTA QALLAYKURQANIKU
1980 watapim tukuy sunqunwan Diosta serviq kuyayllapaq warmichawan casarakururqani, paypa sutinmi Debbie. Munarqanikum tukuy tiempoykuwan Diosta serviyta, chaymi casarakusqaykumanta kimsa killa pasayllata Debbieqa precursora karqa. Casarakusqaykumanta huk wata pasaytañataqmi testigokunapa mana ancha kasqanman astakururqaniku astawan yanapakunaykupaq. Chaypim ñuqapas precursor karqani.
1980 watapi casarakusqay punchaw.
Tiempopa pasasqanman hina hukmanyaruspaykum huklawmanña pasakuyta munarqaniku. Ichaqa Sal. 141:5). Allin kaqkunapi yuyaymanaspaykum cuentata qukururqaniku chaypi iñiqmasinchikkuna, warmachakuna hinaspa mana testigo qusayuq iñiqmasinchikkuna Diosta astawan serviyta munasqankumanta. Yacharurqanikumá ima sasachakuyña kaptinpas allin kaqkunapi piensayta hinaspa Jehova Diospi hapipakuyta. Payqa ima sasachakuyña kaptinpas yanapawanchikmi (Miq. 7:7). Kaqmantamá Diosta kusisqa servirqaniku.
llaqtan-llaqtan watukuqwanraqmi rimarqaniku. Payqa kuyakuyllawanmi clarota niwarqaku: “Sasachakuyllaykichikpi llumpayta piensasqaykichikraykum hukmanyachkankichik. Allin kaqkunapiyá yuyaymanaychik, chayta ruwaspaqa kusisqam kankichik”, nispan. Chayna niykuwasqankuqa anchatam kallpanchawarqaku (Chaymantam precursorkunapaq escuelaman rirqaniku, tawam karqaku yachachiqniyku. Paykunamanta kimsañataqmi huklaw nacionkunaman rispa Diosmanta willakuqkuna karqaku. Paykunam fotonkuta qawachiwaspanku willawarqaku sasachakuykunapi tarikuptinkupas imaynata Jehova Dios yanapasqanmanta. Chayna willawasqankuwanmi ñuqaykupas munarqaniku huklaw nacionkunaman rispa Diosmanta willakuyta, chaypaqmi kallpanchakuyta qallaykurqaniku.
1983 watapi Columbia Britanica llaqtapi huñunakunanchik wasipi.
Ichaqa manaraq huklaw nacionman richkaspam 1984 watapi hina Canada nacionllapi Quebec llaqtachaman rirqaniku. Chayqa Columbia Britanica provinciamantaqa karullay-karum karqa. Chaypiqa frances rimaytam rimarqaku, chayraykum chay rimayta yachanayku karqa, hinaspapas imayna kawsasqankumantam yachanayku karqa. Qullqiykupas manam haypawarqakuchu. Huk kutipim huk runa niykuwarqaku papa cosechasqankupa puchunta apakunaykupaq, chayllam mikunaykupaq karqa. Debbiem miski-miskita papawan tukuyta yanukuq. Chayna sasachakuypi kaspaykupas tukuytam ruwarqaniku mana hukmanyaruspa kusisqalla kanaykupaq. Chaymantapas kikiykum qawarqaniku Jehova Dios imaymanata cuidawasqankuta (Sal. 64:10).
Qunqaymantam qayaramuwarqaku betel wasipi yanapakunaykupaq, ichaqa galaad escuelamanmi astawanqa riyta munarqaniku. Chaywanpas betel wasiman rinaykupaqmi “arí” nirqaniku. Betelman chayaruspaykuñataqmi chaypi cuentallikuq iñiqmasinchik Kenneth Littleta tapurqaniku: “Galaad escuelaman rinaykupaq niykuwaptinkuqa, ¿imatataq ruwasaqku?”, nispayku. Payñataqmi niwarqaku: “Niykusuptikichikña chaymantaqa rimasunchik”, nispa.
Huk semanaña betelpi kachkaptiykum qayaramuwarqaku galaad escuelamanpas rinaykupaq.
Chaymi tantiakunayku karqa betelpi hinalla yanapakunaykupaq utaq galaad escuelaman rinaykupaq. Iñiqmasinchik Kennethmi niwarqaku: “Mayqinpiña yanapakuspaykichikpas wakinpim ninkichik hukninpi yanapakuynikichik aswan allin kasqanta. Ichaqa mayqinpiña yanapakuptikichikpas Jehova Diosqa anchatam bendecisunkichik”, nispan. Galaad escuelaman rinaykupaqmi tantiakururqaniku. Tiempopa risqanman hinañataqmi cuentata qukurqaniku iñiqmasinchik Kennethpa nisqanqa cierto kasqanta. Chayraykum wakin iñiqmasinchikkuna maypi yanapakunankupaq tantiakunanku kaptin pay hina ñuqaykupas niniku.GALAAD ESCUELAMANMI RIRQANIKU
(Ichuq lawpi) Ulysses Glass.
(Alliq lawpi) Jack Redford.
Ancha kusisqam karqaniku 22 iñiqmasinchikkunawan kuska galaad escuelapi 83 kaq yachachikuypi kasqaykumanta. Chayqa apakurqa Estados Unidos nacionpim 1987 watapa abril killanpi. Yachachiqniykumanta wakiqninmi karqa Ulysses Glass hinaspa Jack Redford. Pichqa killam chay escuelapi karqaniku. Tukurqanikuñataqmi septiembre killapa 6 kaq punchawninpi. Chaypim Johntawan señoran Marie Goodeta niwarqaku Haiti nacionman kuska rinaykupaq.
1988 watapi Haiti nacionpi.
1962 watapim galaadmanta riq iñiqmasinchikkunata Haiti nacionmanta qarqururqaku. Chaymantapacham ñuqayku chayraq rirqaniku. Galaad escuela tukusqaykumanta kimsa semana pasaruptinmi urqukunapa chawpinpi kaq huk llaqtapi yanapakuyta qallaykurqaniku, hinaspapas tawaykum huk wasillapi yacharqaniku. Chaypiqa 35 iñiqmasinchikkunam karqaku. Ñuqaykuqa jovenllaraq kasqaykuraykum achkata yachanayku karqa. Chay nacionpiqa achkam wakcha kallarqaku, yaqa lliwtaqmi leeytapas mana yacharqakuchu. Chaypi runakunapas autoridadkunapa contranpi hatariqku. Callekunapipas qayaykachakustinmi tukuy imata kañastin puriqku, hinaspapas llumpay wayra-param kakuq.
Iñiqmasinchikkunamantam tukuyta yacharurqaniku. Paykunaqa ima sasachakuyña kaptinpas pacienciakuspankum kusisqalla kaqku, hinaspapas Diosta kuyasqankuraykum hinalla willakurqaku. Huk yuyaq iñiqmasinchikmi leeyta mana yachaspanpas umallanmanta yacharqa yaqa 150 bibliapi textokunata. Runamasinchikkunapa llumpay ñakarisqankuta qawaspaykum anchata munarqaniku Jehova Dios chay sasachakuykunata tukuchinanmanta willayta. Bibliamanta punta yachachisqaykumanta wakinkum tiempopa risqanman hina karqaku precursor regularña, precursor especialña chaynataq punta apaqña. Tukuy chaykunawanmi anchata kusikuniku.
Huk kutipim Trevor sutiyuq musuta riqsirurqani. Payqa mormon religionniyuqmi karqa, Haiti nacionmanpas religionninraykum rirqa. Paywanqa achka kutipim bibliamanta rimarqaniku. Watakunapa risqanman hinam cartata chaskirurqani, chaypim nimuwarqa: “Tantiakuruniñam Jehova Diospa testigon kanaypaq, hamuq asambleapim bautizakusaq. Munanim Haitiman kutiyta, munanitaqmi precursor especial kaytapas, chaynapi chay yachasqay lawkunapi Diosmanta willakunaypaq”, nispa. Chaynamá karqa. Payqa chaypimá unay watakuna warmichanwan kuska yanapakurqaku.
EUROPA HINASPA AFRICA LAWPIM KARQANIKU
1994 watapi Eslovenia nacionpi kasqay.
Chaymantam Europa lawman rinaykupaq niwarqaku, chaypiqa autoridadkunam saqichkarqaña kaqmanta Diosmanta willakunanchikta. 1992 watapim Eslovenia nacionpi Liubliana llaqtaman chayarurqaniku, chaypa hichpanpim tayta-mamayqa wiñasqaku manaraq Italiaman ripukuchkaspanku. Chay tiempopiqa tukuy chaylawtam Yugoslavia niqwan riqsiqku, chaypiqa hinallam guerraqa karqa. Chaylawpi kaq iñiqmasinchikkunatam Diosmanta hinalla willakunankupaq Austria betel wasipi kaq iñiqmasinchikkuna yanaparqaku. Yanaparqakutaqmi Croacia hinaspa Serbia nacionpi kaq iñiqmasinchikkunapas. Chaymanta qipamanqa sapa nacionpim betel wasi kananña karqa.
Chaypi rimayninkutam hinaspa imayna kawsakusqankutam yachanayku karqa. Chaypi runakunam rimayninkupi niwaqku: “Jezik je težek”, nispa. Chay ninanqa: “Rimayniykuqa sasa-sasa yachaymi”, nispa. Chay nisqankuqa ciertom karqa, sasatamá yacharqaniku. Chaywanpas anchatam kusikurqaniku iñiqmasinchikkuna hinalla Diosman sunqu kasqankuwan hinaspa Diospa llaqtanpi ima cambiokuna kaptinpas chaylla kasukuq kasqankuwan. Diospas chayna kasukuq kaptinkum anchata bendecirqa. Qawarqanikutaqmi
Jehova Diosninchik tiempollanpi serviqninkunata kuyakuywan corregisqantapas. Esloveniapi tukuy ima yachasqaykum astawanraq yanapawarqaku ima sasachakuywanpas mana hukmanyarunaykupaq.Kaqmantam huklawman rinayku karqa. Chayraykum 2000 watapi Africa Occidental lawpi Costa de Marfil nacionman rirqaniku. Ichaqa chaypi wañuchinakuy qallaykuptinmi 2002 watapi lluqsichiwarqaku Sierra Leona nacionman. Chayman chayaruptiykuqa 11 wata wañuchinakuy kasqanmi chayraq tukurusqa. Llumpay sasamá karqa qunqayllamanta chayna lluqsiyniykuqa. Chaywanpas huklawkunapi tukuy ima yachasqaykum anchata yanapawarqaku hinalla kusisqa kanaykupaq.
Sierra Leonapiqa achka runakunam Diosmanta yachayta munarqaku. Iñiqmasinchikkunaqa achka wataña wañuchinakuypa chawpinpi kaspankupas kuyakuqllañam karqaku. Paykunaqa wakcha kaspankupas qukuykuqllañam karqaku. Hukkaqnin iñiqmasinchikmi Debbieman pachachakunata regalayta munarqa. Qallariyllapiqa Debbiem nirqa: “Ama llakikuychu”, nispa. Chaywanpas iñiqmasinchikqa nirqam: “Wañuchinakuy kaptinmi huklaw nacionmanta iñiqmasinchikkuna yanapamuwarqaku. Kunanqa ñuqaykuñam yanapakuyta munaniku”, nispa. Chayraykum ñuqaykupas paykuna hina qukuykuqllaña kayta munarqaniku.
Chaymantam Costa de Marfil nacionman kutirqaniku, chaypi kachkaptiykum kaqmanta wañuchinakuy qallaykurqa. Chaymi noviembre 2004 watapi helicopteropi sapakama mochilachayuqllata hurquwarqaku. Chayarurqanikum Franciamanta soldadokunapa campamentonman. Paqarintinñataqmi Suiza nacionman avionpi apawarqaku. Chaymantam chawpi tutaña betel wasiman chayarurqaniku. Suyawachkasqakum betel wasipi cuentallikuqkuna, solterokunapaq escuelapi yachachiqkuna sapakama señorankupiwan. Paykunata qawaykuptiykum wiqiykupas atipawarqakuraq. Kuyakuyllawanñam chaskiykuwarqaku, quni mikuytam qaraykuwarqaku, Suizamanta chocolatetam achkata quykuwarqaku.
2005 watapi Costa de Marfil nacionpi hatun huñunakuypi yachachisqay.
Chaymantam Ghana nacionman rinaykupaq niwarqaku, chaypiqa manam unaychu karqaniku. Costa de Marfilmanmi wañuchinakuy manaña kaptin kutirqaniku. Iñiqmasinchikkuna kuyakuywan yanapaykuwasqankuraykum chay sasachakuy tiempopi mana hukmanyaspa tukuyta aguantarqaniku. Jehova Diospa yachachiwasqanchikman hinam tantiakururqaniku maypi kaspaykupas kuyakuq kanaykupaq. Tukuy sasachakuyta pasasqaykum yacharachiwanku astawan Diosman sunqu kanaykupaq.
ASIA OCCIDENTAL LAWMANMI RIRQANIKU
2007 watapi Asia Occidental lawpi kasqay.
Betel wasimantam 2006 watapi niykuwarqaku Asia Occidental lawmanña rinaykupaq. Chaylawpiqa kaqmantam yachanayku karqa huk rimaykunata chaynataq runakuna imayna kawsakusqankuta. Chaylawpi runakunaqa autoridadkunatawan religionpi punta apaqkunatam anchata manchakuqku. Paykunapa nisqankuman hinataqmi kawsakuqkupas. Iñiqmasinchikkunam ichaqa Diospa llaqtanpi punta apaqkunapa nisqankuta kasukusqankurayku tukuy rikchaq rimayniyuq kaspankupas huk sunqulla karqaku. Iñiqmasinchikkunataqa Jehova Diosta kasukusqankuraykum ayllunku, escuelapi estudiaqmasinku, llamkaqmasinku hinaspa llaqtamasinku llumpayta chiqniqku. Tukuy chaykunata aguantasqankuwanmi ñuqaykuqa anchata kusikurqaniku.
Israel nacionpim Tel Aviv llaqtapi 2012 watapi hatun huñunakuy karqa. Bibliapim willawanchik 33 watapi pentecostes fiestapi Jehova Diosta serviqkuna achka huñunakusqankumanta. Chaymantaqa manañam chayna achkaqa huñunakurqakuñachu. Chaymi chay huñunakuyqa ancha kusikunapaq karqa.
Chay watakunapim niwarqaku Diosmanta willakunanchikta autoridadkunapa michakusqan nacionpi kaq iñiqmasinchikkunaman watukunaykupaq. Wakin
qillqanchikkunatam aparqaniku, Diosmanta willakuqmi lluqsirqaniku, huñunakuykunamanpas rirqanikum. Tukuy lawpi armayuq soldadokuna kaptinpas manam manchakurqanikuchu iñiqmasinchikkuna riysiwasqankurayku chaynataq mana musyachikuspalla purinaykupaq niykuwasqankurayku.AFRICA LAWMANMI KUTIRQANIKU
2014 watapi Congo nacionpi kasqay.
2013 watapim niykuwarqaku Africa lawman kutispa Kinsasa llaqtapi betel wasipi yanapakunaykupaq. Chay llaqtaqa kachkan Republica Democratica del Congo nacionpim, chay nacionqa hatunsum hinaspa suma-sumaqmi. Chaypipas runakunam sapa kuti sasachakurqaku wañuchinakuy kaptin, chaymantapas yaqa lliwmi llumpay wakcha karqaku. Ninakurqanikum: “Riqsinchikñam Africataqa, yachanchikñam imawan sasachakunanchikmantaqa”, nispa. Ichaqa manamá piensasqaykuman hinachu karqa, astawanraqmi aguantayta yachanayku karqa. Wakin llaqtakunamanqa chakillawanmi rirqaniku, mayukunatapas chakillawanmi chimparqaniku. Sasachakuyniykupi piensanaykumantaqa allin kaqkunapim piensarqaniku. Iñiqmasinchikkunaqa wakcha kaspankupas tukuytam aguantarqaku, kuyakuqmi karqaku, tukuy sunqunkuwanmi Diosmanta willakurqaku, huñunakuykunaman rinankupaqpas anchatam kallpanchakurqaku. Qawarqanikutaqmi Jehova Diospa yanapakuynillanwan achka runakuna iñiqmasinchikkunaña kasqankutapas. Kinsasa llaqtapi tukuy imata pasasqaykuwanmi Diospi astawan hapipakuyta yacharurqaniku. Iñiqmasinchikkunapas aylluyku hinam karqaku.
2023 watapi Sudafrica nacionpi Diosmanta willakusqay.
2017 wata tukuytam Sudafrica nacionpi betel wasipi yanapakunaykupaq niykuwarqaku, chayqa ñawpaqta kasqayku betel wasikunamantapas aswan hatunsum. Chaypim niykuwarqaku mana yanapakusqayku kaqkunapi yanapakunaykupaq. Pasaq watakunapi Jehova Dios tukuypi yanapawasqankuta yuyarisqaykum yanapawanku kaypipas kusisqa servinaykupaq. Kay wasipiqa kachkanmi unay wataña Diosta tukuy sunqunkuwan serviq iñiqmasinchikkuna. Paykunatam anchata kuyaniku. Kay wasipiqa achka nacionmanta tukuy rikchaq rimayniyuq iñiqmasinchikkunam huk sunqulla kanku. Jehova Diosmi yanapawanchik huk sunqulla kawsakunanchikpaq paypa munasqanman hina kawsakuptinchikqa.
Mana piensasqayku lawkunapim karqaniku, chaymi huk rimaykunata yacharurqaniku. Qawarqanikutaqmi runakuna imayna kawsakusqankutapas. Wakinpiqa sasachakuykunapim karqaniku. Ichaqa Jehova Diosqa manamá saqiruwarqakuchu. Iñiqmasinchikkunawanmi maypipas yanapachiwarqaku (Sal. 144:2). Kunankama tukuyta pasasqaykuwanmi yacharuniku Jehova Diosta aswan allinta serviyta.
Anchatam agradecekuni tayta-mamay allinta uywawasqanmanta. Señoraytapas agradecekunim imaña kaptinpas ñuqawan kuska kasqanmanta. Anchatam kusikuni enteron pachapi iñiqmasinchikkuna imawan sasachakuspankupas Diosta hinalla servisqankumanta. Ñuqaykuqa munachkanikum hamuq tiempopipas ‘yachachiqninchik Diosta’ hinalla kasukuyta.