1, 2. (1) ¿Imanasqataq wakinkunaqa manaraq tantiakunkuchu Jehova Diospa testigon kanankupaq? (2) ¿Imamantataq kay yachachikuypi yachasunchik?

 ¿YUYACHKANCHIKCHU Jehova Diospa testigon kayta munaspa imakunawan sasachakusqanchikmanta? Ichapas manchakurqanchik testigo karuptinchik llamkaqmasinchik, llaqtamasinchik utaq ayllunchik chiqniwananchikta. Utaqchá piensarqanchik Diospa kamachikuyninman hina kawsakuytaqa mana atinanchikta. Chaykunata yuyarispanchikqa biblia estudiachisqanchik runamasinchiktam entiendesun imanasqa Jehova Diospa testigon kananpaq manaraq tantiakusqanta.

² Jesuspas nirqam wakinkuqa runamasinta manchakuspanku hinaspa iskayrayaspanku Jehova Diosta servinankupaq mana tantiakunankumanta (Mat. 13:​20-22). Chayna runakunamanpas Jesusqa hinallam yachachirqa qatiqnin kanankupaq. Jesusta qatipakuspaqa atisunmi estudiachisqanchik runamasinchikta Diosta servinanpaq yanapayta. Yanapananchikmi imawan sasachakusqanmanta cuentata qukunanpaq, Jehova Diosta astawan kuyananpaq, imamantapas puntataqa Diospa nisqanta ruwananpaq chaynataq sasachakuyninkunata atipananpaq. Atichwanmi Jesusta qatipakuspa runamasinchikkuna testigo kanankupaq yanapaytaqa. Chaypaqmi servichikuchwan Kusisqa kawsakunapaq sutiyuq qillqanchikta. Chaykunamantam kay yachachikuypi yachasun.

YANAPASUNYÁ IMAWAN SASACHAKUSQANMANTA CUENTATA QUKUNANPAQ

3. ¿Imakunapi piensaspantaq Nicodemoqa mana tantiakurqachu Jesuspa qatiqnin kananpaq?

³ Nicodemo sutiyuq runam judiokunapa hukkaqnin kamachiqninku karqa. Diosmanta willakuyta Jesus qallaykusqanmanta suqta killa pasayllatam Nicodemoqa cuentata qukururqa Jesusqa Diospa  akllasqan runa kasqanmanta, chaywanpas manam tantiakurqachu qatiqnin kananpaqqa (Juan 3:​1, 2). Nicodemoqa ‘judiokunata manchakusqanraykum’ Jesuswan tutalla rimarqa (Juan 7:13; 12:42). Ichapas piensarqa manaña respetaspanku chiqnirunankuta chaynataq kapuqninta qichurunankuta. Chayraykupaschá Jesuspa qatiqnin kananpaqqa mana tantiakurqachu. a

4. ¿Imaynatam Jesusqa Nicodemota yanaparqa?

⁴ Nicodemoqa allintam yacharqa Moisesman Diospa qusqan kamachikuykunamantaqa. Ichaqa manam entienderqachu imata ruwaspan Jehova Diosta kusichinanmantaqa, chaymi pipas entiendeykachinan karqa. ¿Imaynatam Jesusqa yanapaykurqa? Yachachinanpaq tiempochakuspam. Nicodemo tutaña rimayta munaptinpas paywan rimananpaqmi tiempochakurqa. Jesusqa allintam entiendechirqa qatiqnin kananpaq imakunata ruwananmanta. Nirqam huchanmanta wanakuspan yakupi bautizakunanmanta hinaspa Diospa churinpi iñispan kasukunanmanta (Juan 3:​5, 14-21).

5. ¿Imaynatam estudiachisqanchik runamasinchikta yanapachwan imawan sasachakusqanmanta cuentata qukunanpaq?

⁵ Bibliata estudiachisqanchik runamasinchikpas allinta yachaspanpas ichapas mana cuentata qukunchu Diosta servinanpaq imakunata ruwananmanta. Ichapas llamkayllamanña qukurusqanrayku utaq ayllun piñakunanta manchakusqanrayku Diosta servinanpaq manaraq tantiakunchu. ¿Imaynatam yanapachwan Jesusta qatipakuspa? Imawan sasachakusqanmanta cuentata qukunanpaqmi yanapananchik, chaypaqqa tiempochakunanchikmi. Ichapas kuska mikunanchikpaq niykuchwan utaq maytapas puririkuq richwan. Chaypiqa willawachwanmi imayna tarikusqanmanta, imawan sasachakusqanmanta. Willawaptinchikqa yachasunmi imata ruwananpaq yanapayta. Chaymantapas kaytam entiendechinanchik: Imatapas ruwananqa manam ñuqanchikta kusichiwananchikraykuchu, aswanqa Diosta kuyasqanraykum.

6. ¿Imaynatam estudiachisqanchik runamasinchikta yanapachwan Diosta kasukunanpaq? (Rimarimuytaq 1 Corintios 16:13 nisqanmantapas).

⁶ Bibliata estudiachisqanchik runamasinchik Jehova Dios yanapananmanta mana iskayrayaspanqa tukuy sunqunwanmi yachasqankunata kasukunqa (leey 1 Corintios 16:13). ¿Imaynatam yanapachwan Dios yanapananmanta mana iskayrayaspa kasukunanpaq? Jehova Diospa kamachikuyninkunallamanta yachachinamantaqa yachachinanchiktaqmi payqa yanapayta munasqanmantapas. Ninanchikmi bibliapa nisqanman hina kawsakunanpaq Dios yanapananmanta. Hinallayá yachaykusun estudiachisqanchikta imaynatawanraq yanapanamanta.

YANAPASUNYÁ DIOSTA ASTAWAN KUYANANPAQ

7. ¿Imaynatam Jesusqa uyariqninkunata yanaparqa Diosta astawan kuyanankupaq?

⁷ Jesusqa yacharqam Diosta kuyaspankuqa chaylla kasukunankumanta. Chaymi qatiqninkunaman imamantapas yachachispanqa astawan yachachirqa Jehova Diosta kuyanankupaq. Huk kutipim Jesusqa Jehova Diosmanta yachachispan kuyakuq taytawan tupachirqa. Nirqam Diosqa chay tayta hina mañakusqanchikman hina imatapas quwananchikmanta (Mat. 7:​9-11). Huk kutipipas nirqam mana allin ruwaq churinta huk tayta llakipayaspan hinaspa pampachaykuspan wasinpi kaqmanta chaskiykusqanmanta, chaywanmi yachachirqa Jehova Diospas chay tayta hina llakipayakuq kasqanmanta. Chaywanmi uyariqninkunaqa cuentata qukurqaku Diosqa ancha kuyakuq kasqanmanta. Uyariqninkunamanta wakinpaqa manapaschá taytankuqa kuyakuqchu karqa. Chaynaqa, ¡maynatachá kusikurqaku Jehova Dios kuyakuq kasqanmanta uyarisqankuwanqa! (Luc. 15:​20-24).

8. ¿Imaynatam yachachisqanchik runamasinchikta yanapachwan Diosta astawan kuyananpaq?

⁸ Ñuqanchikpas yachachisqanchik runamasinchiktam yanapananchik Diosta astawan kuyananpaq. Chaymi yachachispanchikqa willananchik  Jehova Diosqa imayna sunquyuq kasqanmanta chaynataq kuyakuq kasqanmanta. Sapa yachachikuypitaqmi yanapananchik Jehova Diosqa payta kuyasqanmanta cuentata qukunanpaq. Jesus wañukusqanmanta yachachispanchikpas yanapananchikmi payta kuyasqanrayku Dios churinta kachamusqanmanta cuentata qukunanpaq (Rom. 5:8; 1 Juan 4:10). Yachachisqanchik runa payta Jehova Dios anchata kuyasqanmanta cuentata qukuspanqa Diostam astawan kuyanqa (Gal. 2:20).

9. ¿Imamanta yachasqanmi Michaelta yanaparqa bautizakunanpaq?

⁹ Indonesia nacionmanta Michaelmi warmacha kaspanraq bibliamanta yacharqa, ichaqa manam bautizakurqachu. 18 watanpi kachkaspanñataqmi huklaw nacionman pasakurqa camionkunata manejaspan llamkananpaq. Nacionninman kutiruspanmi casarakururqa, churinpas karqañam. Ichaqa warmintawan churinta nacionninpi saqiykuspanmi huklaw nacionta rirqa llamkapakuq. Chaymanta watakuna pasaytam warminwan churinqa biblia estudiayta qallaykuspanku Diospa munasqanman hinaña kawsakuyta qallaykurqaku. Maman wañukuptinmi Michaelqa nacionninman kutirqa taytanta uywananpaq, chaypim biblia estudiayta qallaykurqa. Kusisqa kawsakunapaq sutiyuq libropi 27 yachachikuyninpi Jesuspa wañukusqanmanta yachasqanmi sunqunman chayarurqa. “Astawan yachaykusun” niqpim cuentata qukururqa Jesus wañukuptin Dios anchata llakikusqanmanta, chaywanqa waqakururqaraqmi. Jesuspa wañukusqanmanta agradecekuspanmi Jehova Diospa munasqanman hinaña kawsakuspan bautizakururqa.

YANAPASUNYÁ IMAMANTAPAS DIOSPA MUNAYNINTA PUNTATA RUWANANPAQ

10. ¿Imaynatam Jesusqa qatiqninkunata yanaparqa Diospa munayninta puntata ruwanankupaq? (Rimarimuytaq Lucas 5:​5-11 nisqanmantapas, qawaytaq dibujotapas).

¹⁰ Jesuspa qatiqninkunaqa chayllam cuentata qukururqaku payqa Diospa akllasqan runa kasqanmanta. Ichaqa manaraqmi entienderqakuchu Diosta serviyta munaspankuqa paymanta tukuy sunqunkuwan willakunankuta. Pedrowan Andresqa unaychañam Jesuspa qatiqnin karqaku tukuy ruwayninkuta saqispa mayman riptinpas riysinankupaq Jesus niptinqa (Mat. 4:​18, 19). Paykunaqa Santiagopiwanmi hinaspa Juanpiwanmi challwa hapiq karqaku, negocionkupas allinmi karqa (Mar. 1: 16-20). Chayna kaptinpas chayta saqispankum Jesusta qatirqaku. Chaywanpas tantiarqakuchá familiankuta imaynata mantienenankupaqpas. Diospa munayninta puntata ruwanankupaqqa tantiakurqaku yanapananmanta mana iskayrayasqankuraykum. ¿Imanasqataq mana iskayrayarqakuchu? Jesusmi achka challwata hapinankupaq milagrota ruwarqa, chaywanmi cuentata qukururqaku Jehova Diospa munayninta puntata ruwaptinkuqa pisipuqninkutaqa pay qunanmanta (leey Lucas 5:​5-11).

11. ¿Imaynatam estudiachisqanchikta yanapachwan Diospi hapipakunanpaq?

¹¹ Jesus hina milagrokuna ruwayta mana atispanchikpas atichwanmi estudiachisqanchik runamasinchikta Jehova Diospi astawan hapipakunanpaq yanapayta. Chaypaqmi willachwan munayninta puntata ruwaptinchik Dios imayna yanapawasqanchikmanta. Ichapas huñunakuykunaman rinanchikrayku mana tukuy punchaw llamkanapaq patronninchikwan rimananchik karqa. Estudiachisqanchikmanmi willachwan chayta ruwaptinchik Dios yanapawasqanchikmanta hinaspa yanapawaptinchik paypi astawan hapipakusqanchikmanta.

12. (1) ¿Imanasqataq yachachiq rispanchikqa iñiqmasinchikkunata hukta-hukta pusananchik? (2) ¿Imaynatam estudiachisqanchikta yanapachwan Diospa munayninta puntata ruwananpaq Kusisqa kawsakunapaq sutiyuq qillqawan?

¹² ¿Imaynatawantaq estudiachisqanchik runamasinchikta yanapachwan Diospa munayninta puntata ruwananpaq? Yachachiq rispanchikqa iñiqmasinchikkunatam hukta-hukta pusananchik. Paykunatam nichwan Jehova Diosmanta imaynata yachasqankumanta chaynataq Diospa munayninta puntata ruwanankupaq imakunata ruwasqankumanta willanankupaq. Paykunapa willakusqanta uyarispanqa estudiachisqanchikpas kallpanchasqam kanqa Diospa munayninta puntata ruwananpaq. Tiempochakunanchiktaqmi Kusisqa kawsakunapaq sutiyuq qillqanchikpi “Astawan yachaykusun” utaq “Astawan yachanaykipaq” niqpi videokunata qawachinapaqpas. 37 kaq yachachikuyta yachachispanchikqa qawachichwanmi Jehova Diosqa imapas pisipuwaqninchiktam quwanchik niq videota, hinaspam nichwan Diospa munayninta puntata ruwaptin paytapas yanapananmanta.

YANAPASUNYÁ SASACHAKUYNINKUNATA ATIPANANPAQ

13. ¿Ima sasachakuykunapi kanankumantam Jesusqa qatiqninkunata nirqa?

¹³ Jesusqa qatiqninkunatam achka kutipi nirqa chiqnisqa kanankumanta. Wakinpiqa ayllullankum kanan karqa chiqniqninkuqa (Mat. 5:11; 10:​22, 36). Manaraq wañukuchkaspanpas nirqam paypa qatiqnin kasqankurayku wakinpiqa wañuy patanpi kanankumanta (Mat. 24:9; Juan 15:20; 16:2). Chaymantapas nirqam Diospa gobiernonmanta hinalla willakunankurayku allin yuyayniyuq kanankupaq, piwanpas mana atipanakunankupaq chaynataq mana kutipakunankupaq.

14. ¿Imaynatam estudiachisqanchikta yanapachwan pipas sasachaptinqa mana hukmanyarunanpaq? (Rimarimuytaq 2 Timoteo 3:12 nisqanmantapas).

¹⁴ Ñuqanchikpas Jesus hinam bibliata estudiachisqanchik runamasinchikman willananchik bibliata estudiasqanrayku llamkaqmasin, riqsinakusqan utaq ayllun piñakuspan imanananmanta utaq asipayananmanta (leey 2 Timoteo 3:12). Llamkaqmasinkunam asipayanmanku paykuna hina manaña kasqanrayku. Ayllunpas tukuyta nispanmi chiqninman bibliapi yachachikuykunata kasukusqanrayku. Bibliata estudiachisqanchik runamasinchikmanqa willananchikñam chiqnisqa kananmanta, chaynapim pipas sasachaptinqa mana hukmanyarunqachu. Yachanqataqmi ima ruwayta chaynataq ima niytapas.

15. ¿Imaynatam estudiachisqanchikta yanapachwan bibliata estudiasqanrayku ayllun piñakuptin?

¹⁵ Bibliata estudiachisqanchik runamasinchikta ayllun piñakuptinqa nichwanmi Jesustapas wakin ayllunkuna piñakusqankumanta. Paykunam nirqaku: “Locoyarunmi”, nispanku (Mar. 3:21; Juan 7:5). Piensarichichwanmi ayllunkuna imanasqa piñasqa kasqankuta. Nichwanmi: “¿Engañachikusqaykita piensaspanchu piñakun, icha Jehova Diospa testigonkunata chiqnisqanraykuchu?”, nispa. Yachachinanchiktaqmi pacienciakunanpaq chaynataq yachasqankunamanta ayllunmanpas utaq pimanpas sumaqllata willananpaq.

16. ¿Imaynatam estudiachisqanchikta yanapachwan yachasqankunamanta ayllunman sumaqllata willananpaq?

 ¹⁶ ¿Imaynatam bibliata estudiachisqanchik runamasinchikta yanapachwan yachasqankunamanta ayllun tapuptin? Ninanchikmi mana lliwta willarunanpaq. Lliwta willaruptinqa amirunmanmi utaqmi hukmanyarunman. Ninanchikmi imamantapas ratulla utaq pisillata willananpaq, chaynata willaptinqa astawanmi yachayta munanman (Col. 4:6). Chaymantapas nichwanmi jw.org niqmanta ayllunman willananpaq, chaynapi kikinku Jehova Diospa testigonkunamanta astawan yachanankupaq.

17. ¿Imakunata servichikuspataq estudiachisqanchikta yachachichwan Jehova Diospa testigonkunamanta pipas tapuptin willananpaq? (Qawaytaq fototapas).

¹⁷ Bibliata estudiachisqanchik runamasinchikmanqa yachachichwantaqmi jw.org niqpi “Jehova Diospa testigonkunamanta tapukusqanku” niqwan. Chaypi yachachikuykunawan yanapachikuspam yachachichwan ayllunkuna utaq amistadninkuna tapuptin pisichallapi willananpaq (2 Tim. 2:​24, 25). Yuyaymanachichwantaqmi pipas tapuptinqa yachasqankunamanta ima nispan willakunanpaqpas. Chaypaqmi servichikuchwan Kusisqa kawsakunapaq sutiyuq libropi “Wakin runakunam ninku” niqta. Chaypi rikuriq tapukuykunawanmi imaynata willakunanpaq yachachichwan. Practicaruspañataqmi nichwan imaynatawanraq astawan allinta willakunanpaq. Chaynata yachachiptinchikqa mana pinqakuspam hinaspa mana manchakuspam yachasqankunamanta willakunqa.

18. ¿Imaynatam estudiachisqanchikta kallpanchachwan iñiqmasinchikkunawan kuskaña Diosmanta willakuq rinanpaq? (Rimarimuytaq Mateo 10:27 nisqanmantapas).

¹⁸ Jesusmi qatiqninkunata nirqa lliw runakunaman willakunankupaq (leey Mateo 10:27). Estudiachisqanchik runamasinchik yachasqankunamanta willakuspanqa Jehova Dios imayna yanapasqanmantam cuentata qukunqa. Chaywanqa Jehova Diospim astawan hapipakunqa. ¿Imaynatam estudiachisqanchikta kallpanchachwan iñiqmasinchikkunawan kuskaña Diosmanta willakuq rinanpaq? Jesuspa wañukusqanta yuyarinapaq killapi utaq hatun huñunakuyninchik apakusqan killapim estudiachisqanchikta nichwan willakunanpaq imakunata ruwananmanta. Nichwanmi chay killakunapiqa runamasinchikwan rimay mana llumpay sasa kasqanta. Chaymantapas kallpanchachwanmi chawpi semana huñunakuypi ñawpaqman lluqsispan rimarinanpaq utaq yachachinanpaq. Chaypaq tantiakusqanqa yanapanqam mana manchakuspan Diosmanta willakunanpaq.

AMAYÁ ISKAYRAYASUNCHU ESTUDIACHISQANCHIK RUNAMANTAQA

19. ¿Jesuspa ima nisqanwantaq sutilla karqa qatiqninkunamanta mana iskayrayasqan? ¿Imaynatam Jesusta qatipakuchwan?

¹⁹ Jesusqa manam iskayrayarqachu qatiqninkuna imaña kaptinpas hinalla qatinankumantaqa, chaymi manaraq wañukuchkaspan chaynataq hanaq pachaman manaraq kutikuchkaspan qatiqninkunata nirqa: ‘Maymi kasqaypim qamkunapas kankichik’,  nispa. Jesusqa nichkarqa qatiqninkunapas hanaq pachaman rinankumantam, ichaqa manam chaytaqa entienderqakuraqchu. Chaywanpas Jesusqa manamá iskayrayarqachu tukuy sunqunkuwan Diosta servinankumantaqa (Juan 14:​1-5, 8). Jesusqa yacharqam tiempopa pasasqanman hina qatiqninkuna yachachisqankunata allinta entiendenankumanta (Juan 16:12). Ñuqanchikpas estudiachisqanchiktam ninanchik Diosman sunqu kay atinanmanta mana iskayrayasqanchikta.

20. ¿Imatam Cristina ruwarqa estudiachisqan warmimanta mana iskayrayaspan?

²⁰ Manam iskayrayananchikchu yachachisqanchik runamasinchik Diospa munasqanman hina kawsakuy munasqanmantaqa. Malaui nacionpim iñiqmasinchik Cristina b bibliamanta estudiachiyta qallaykurqa Alina sutiyuq sipasta, payqa catolicam karqa. Kusisqa kawsakunapaq libropi 14 yachachikuyman chayaruptinkum Cristinaqa Alinata tapurqa: “¿Ima ninkitaq taytacha-mamacha yupaychaymanta?”, nispan. Alinaqa piñarikuspanmi nirqa: “¡Chaypaqqa sapakamam tantiakunanchik!”, nispa. Chaynata niptinmi Cristinaqa piensarqa bibliamanta yachayta manaña munasqanta. Chaywanpas Cristinaqa pacienciakuspanmi hinalla yachachirqa taytacha-mamachata yupaychayqa mana allin kasqanmanta Alina cuentata qukunankama. Chaymanta killakuna pasaytam Cristinaqa tapurqa: “¿Imaynatam bibliamanta hinaspa taytanchik Jehova Diosmanta yachasqaykiqa kunankama yanapachkasunki?”, nispa. Chay tapukuyqa 34 yachachikuypim kachkan. Alinapa ima nisqanmantam Cristina nin: “Niwarqam: ‘Yachasqaykunawanqa kusisqam kachkani. Cuentatam qukuruni Jehova Diospa testigonkunaqa bibliapa nisqanman hina kawsakusqankumanta’”, nispa. Chaymantaqa manañam Alinaqa taytacha-mamachakunataqa yupaycharqañachu, hinaspam bautizakurqa.

21. ¿Imaynatam estudiachisqanchikta yanapachwan Diosta servinanpaq?

²¹ Jehova Diosmi runakunataqa yanapan paymanta yachaspanku servinankupaq, chayna kaptinpas ñuqanchikpas yanapakuchwanmi (1 Cor. 3:7). Chaymi mana Diospa kamachikuyninkunallamantachu yachachinanchik, aswanqa payta astawan kuyanankupaqmi. Chaymantapas yachachinanchikmi Diosta kuyaspa imamantapas puntataqa paypa munayninta ruwanankupaq. Yachachinanchiktaqmi sasachakuykunapi kaspankuqa Diospi astawan hapipakunankupaqpas. Chaymantapas sutillam kanan paykunamanta mana iskayrayasqanchik, chaymanta cuentata qukuspankuqa paykunapas Dios serviytam munanqaku.