1, 2. ¿Imatam biblia niwanchik Sadocmanta? (Rimarimuytaq 1 Cronicas 12:​22, 26-28 nisqanmantapas).

 HUK kutipim 340.000 Israel runakuna huñunakururqaku reyninku kananpaq Davidta churanankupaq. Huñunakururqakuqa Hebron llaqtapa hichpan muqukunapim. Chaypim kusikuyllawanña karqaku Davidwan parlaspanku hinaspa Jehova Diospaq takispanku (1 Cron. 12:39). Chaypitaqmi kachkarqa joven Sadocpas. Achkallaña runakuna kachkaptinpas Diosqa yacharqam chaypi Sadoc kasqanta. Munarqataqmi chaypi kasqanta ñuqanchikpas yachananchikta (leey 1 Cronicas 12:​22, 26-28). ¿Imatam biblia niwanchik Sadocmanta?

² Sadocqa karqa sacerdotem, chayraykum sacerdotekunata kamachiq Abiatarwan llamkaq. Jehova Dios yachayta qusqanraykutaqmi Sadocqa Diospa munayninmanta allinta yacharqa (2 Sam. 15:27). Chaymi runakunaqa maskaqku imamantapas consejachikunankupaq. Sadocqa mana manchakuq runataqmi karqa. Chayna kasqanmantam astawan yachasun.

3. (1) ¿Imaynanpitaq mana manchakuq kananchik? (2) ¿Imamantam kay yachachikuypi yachasun?

³ Tukupay punchawkunallapiña kawsasqanchikraykum satanasqa astawanraq imawanpas sasachawachkanchik (1 Ped. 5:8). Chaymi mana manchakuq kananchik satanastawan munaychakusqan runakunata Jehova Dios chinkachinankama (Sal. 31:24). Qatiqninpiyá yachaykusun Sadocpa mana manchakuq kasqanta imakunapi qatipakunamanta.

KAMACHIWAQNINCHIK DIOSLLATAYÁ KASUKUSUN

4. ¿Imanasqataq mana manchakuq kananchik Diospa munayninta puntapi churanapaq? (Qawaytaq dibujotapas).

⁴ Diospa munayninta puntapi churanapaqqa mana manchakuqmi kananchik (Mat. 6:33). Mana allin runakunapa chawpinpi kawsasqanchikraykum Diosta tukuy imapi kasukunapaq chaynataq gobiernonmanta willakunapaq mana manchakuq  kananchik (1 Tes. 2:2). Chaymantapas, politicokuna hinaspa qatiqnin runakuna rakinasqa kasqankuraykum mana pimanpas sayapakuyqa aswan sasa (Juan 18:36). Achka testigokunam politicaman mana chaqrukusqankurayku utaq militar kayta mana munasqanrayku qullqimanta sasachakurqaku, maqapasqa utaq carcelman apasqa karqaku.

5. ¿Imanasqam Sadocqa mana manchakuq kanan karqa Davidwan kuska guerraman rinanpaq?

⁵ Sadocqa manam Hebron llaqtataqa rirqa rey kananpaq Davidta churaqllachu, aswanqa guerrapi peleananpaqwanmi (1 Cron. 12:38). Preparasqataqmi karqa Israel runakunapa enemigonkunawan David peleaq riptin riysinanpaqpas. Sadocqa manapaschá allin peleaytaqa yachaqchu, chaywanpas mana manchakuq kasqanraykum riyta munarqa.

6. ¿Davidpa imayna kasqantaq Sadocta yanaparqa mana manchakuq kanapaq? (Rimarimuytaq Salmos 138:3 nisqanmantapas).

⁶ ¿Imaynatam Sadocqa mana manchakuq kayta yacharqa? Wakin kallpasapa hinaspa mana manchakuq runakunata qawaspanchá qatipakuyta munarqa. Paykunamanta hukninmi karqa David. Payqa Israel soldadokunapa kamachiqnin kaspa mana manchakuq kaptinmi llapallan runakuna kamachiqninku kananpaq churayta munarqaku (1 Cron. 11:​1, 2). Enemigonkuna wañuchiyta munaptinpas Davidqa Diospi hapipakuspanmi yanapaykunanpaq mañakuq (Sal. 28:7; leey Salmos 138:3). Sadocqa qatipakurqataqchá Jeoyadatapas, Jeoyadapa churin Benayatapas chaynataq Israel ayllukunapi 22 kamachiqkunatapas (1 Cron. 11:​22-25; 12:​26-28). Paykunaqa rey kananpaqmi Davidta yanapayta munarqaku.

7. (1) ¿Pikunatam kunan tiempopi qatipakuchwan mana manchakuq kanapaq? (2) ¿Imatam yachachwan video qawasqanchikpi iñiqmasinchik Nsilumanta?

⁷ Ñuqanchikpas mana manchakuq kaytam yachasun Diospa munayninta puntapi churaqkunata qatipakuspanchik. Señorninchik  Jesucristo kay pachapi kachkaptinmi hikutarqaku satanaspa munaychakusqan politicaman chaqrukunanpaq (Mat. 4:​8-11; Juan 6:​14, 15). Paymi ichaqa mana wichiykachinankupaq Jehova Diosllapi hapipakurqa. Qatipakuchwantaqmi militar kayta utaq politicaman chaqrukuyta mana munaq achka joven iñiqmasinchikkunatapas. Paykunamantam yachachwan jw.org niqpi. a

IÑIQMASINCHIKKUNATAYÁ YANAPASUN

8. ¿Ima kaptintaq punta apaqkunaqa mana manchakuq kananku iñiqmasinkuta yanapanankupaq?

⁸ Diosta serviqkunaqa kusisqam yanapanakunchik (2 Cor. 8:4). Chaypaqqa wakinpim mana manchakuq kananchik. May nacionpipas guerra kaptinqa punta apaqkunaqa yachankum iñiqmasinchikkunata kallpanchanankuta. Ichapas qunanku kanqa bibliata, qillqanchikkunata hinaspa mikuyta utaq pachata. Paykunaqa kuyakuq kasqankuraykum peligroso kaptinpas tukuyta ruwanku yanapanankupaq (Juan 15:​12, 13). Chayta ruwasqankuwanmi sutilla qawakun Sadoc hina mana manchakuq kasqanku.

9. 2 Samuel 15:​27-29 nisqanman hinaqa, ¿imata ruwananpaqmi Sadocta David kamachirqa? (Qawaytaq dibujotapas).

⁹ Davidtam churin Absalon wañuchiyta munarqa kamachiq kayta munaspan (2 Sam. 15:​12, 13). Chaymi Davidqa Jerusalenmanta ayqikunan karqa. Runankunatam nirqa: “¡Hakuchik kaymanta ayqikusun, manam Absalonmanta lluptiytaqa atisunchu!”, nispa (2 Sam. 15:14). Lluqsiruptinkuñam Davidqa cuentata qukururqa Jerusalenpi pipas quedaspan Absalonpa imapas tantiasqanta willananta, chaymi Sadoctawan wakin sacerdotekunata kamachirqa Jerusalenman kutinankupaq. Paykunaqa mana musyachikuspallankum Absalonpa ruway munasqanmanta Davidman willananku  karqa (leey 2 Samuel 15:​27-29). Absalonqa karqa kikillanpaq munaq, piña-piña hinaspa taytanpa contranpi hatariq runam. Chayna kachkaspanqa, ¡imataraq chay sacerdotekunataqa ruwanman karqa Davidta yanapasqankuta yacharuspanqa!

10. ¿Imaynatam Davidta yanaparqaku Sadoc hinaspa paywan kaqkuna?

¹⁰ Sadoc hinam Husaipas Davidpa confianza amistadnin karqa. Paykunatam David nirqa ima ruway piensasqanpi yanapanankupaq (2 Sam. 15:​32-37). Davidpa nisqanman hinam Husaiqa Absalonpa amistadnintukuspan consejarqa Davidwan imaynata peleaq rinanpaq. Chaynapim Davidpaqwan runankunapaqqa tiempo karqa peleanankupaq allinta preparakunankupaq. Chaymantam Husaiqa Sadocmanwan Abiatarman willarqa Absalon imayna peleaq rinanmanta (2 Sam. 17:​8-16). Paykunañataqmi Davidman willachimurqaku (2 Sam. 17:17). Jehova Diospa yanapakuyninwanmá Sadocpas chaynataq wakin sacerdotekunapas Davidta yanaparqaku mana wañurachinankupaq (2 Sam. 17:​21, 22).

11. ¿Imaynatam Sadoc hina mana manchakuq kachwan iñiqmasinchikkunata yanapanapaq niwaptinchik?

¹¹ Iñiqmasinchikkunata yanapanapaq niwaptinchikqa, ¿imaynatam Sadocta qatipakuchwan vidanchik peligropi kanan kaptinpas? 1) Niwasqanchikman hinayá ruwasun. Arí, betel wasimanta niwasqanchiktayá kasukusun. Kasukuspanchikqa lliw iñiqmasinchikkunawanmi huk sunqulla kasun (Heb. 13:17). Punta apaqkunaqa sapa kutim leenanku terremotopas utaq imapas manaraq pasachkaptin chaynataq pasaruptin imata ruwanamanta (1 Cor. 14:​33, 40). 2) Mana manchakuq kaspapas allin tantiuwanyá ruwasun (Prov. 22:3). Amayá yanqapas-yanqaqa vidanchiktaqa peligropiqa churasunchu. 3) Jehova Diospiyá hapipakusun. Payqariki munachkan allinlla kananchiktam, chaymi yanapawachwan vidanchikta cuidaspa iñiqmasinchikkunata yanapanapaq.

12, 13. ¿Imatam yachachwan Viktormantawan Vitalimanta? (Qawaytaq fototapas).

 ¹² Rimarisunchik punta apaq Viktormanta hinaspa Vitalimanta. Paykunam Ucrania nacionpi guerra kaptin iñiqmasinchikkunaman aparqaku yakuta hinaspa imapas mikunankupaq kaqta. Viktormi nin: “Tukuy lawkunapim purirqaniku imatapas apanaykupaq maskaspayku. Sapa kutim hichpaykupi balakuna tuqyaqta uyarirqaniku. Huk iñiqmasinchikmi guardakusqan mikuykunata quwarqaku. Chaykunawanmi yanaparqaniku mana imayuq qiparuq iñiqmasinchikkunata. Chay mikuykunata carroman cargachkaptiykum hichpallaykuman bomba kaqlla chayaramurqa, antismi mana tuqyarurqachu. Chay punchawmi mana manchakunaypaq Jehova Diosta mañakustin chisyarurqani, chaynapi iñiqmasinchikkunata hinalla yanapanaypaq”, nispa.

¹³ Vitaliñataqmi nin: “Ciertotamá mana manchakuq kanay karqa. Qallariypi viajaspayqa 12 horam rirqani Diosta mañakustillan”, nispa. Vitaliqa tantiuwantaqmi imatapas ruwarqa, paymi nin: “Jehova Diostam mañakurqani yachayta quwananpaq hinaspa mana ruway atisqayta riqsikunaypaq. Maytapas riq kani autoridadkunapa maynin permitisqallankutam. Iñiqmasinchikkunapa imayna yanapanakusqankuta qawaspaymi Diospi astawan hapipakurqani. Paykunaqa ñankunatam limpiaqku, mikuykunatawan pachakunata huñuspankum carroykuman cargaqku, hinaspankupas Viktortawanmi samaykachiwaqku hinaspa mikuykachiwaqku”, nispa.

DIOSMAN SUNQUYÁ KASUN

14. ¿Imaynam tarikunchik pi kuyasqanchikpas Dios serviyta saqiruptin?

¹⁴ Imamantapas astawanqa llakichiwanchik mayqin familianchikpas utaq amistadninchikpas Dios serviyta saqirusqanmi (Sal. 78:40; Prov. 24:10). Aswan sasaraqmi ancha kuyasqanchik familianchik utaq amistadninchik kaptinqa. Sadocpas chayna llakipim tarikurqa, chaymi paymanta yachayqa yanapawasun.

15. ¿Imanasqataq Sadocqa mana manchakuq kanan karqa hinalla Diosman sunqu kananpaq? (Rimarimuytaq 1 Reyes 1:​5-8 nisqanmantapas).

¹⁵ David yuyaqña kaspan wañukunanpaqña kachkaptinmi churin Adonias kamachiq kayta munarqa. Jehova Diosmi ichaqa munarqa Davidpa qipanmanqa Salomon kamachinanta (1 Cron. 22:​9, 10). Chaymi Sadocqa Davidta hinalla yanapaspan Diosman sunqu karqa. Abiatarñataqmi Davidta traicionaspa Adoniasta yanaparqa (leey 1 Reyes 1:​5-8). Chay ruwasqanwanmi Diostapas qipanchachkarqa. Chaywanqa mayna llakisqachá Sadocqa tarikurqa. Abiatarwanqa 40 wata masninmi sacerdote kaspa llamkarqaku (2 Sam. 8:17). Iskayninkutaqmi ‘Diospa baulnintapas’ cuidarqaku (2 Sam. 15:29). Chaymantapas Davidta yanapaspankum tukuy imata pasarqaku Diosta servispanku (2 Sam. 19:​11-14).

16. ¿Imam Sadocta kallpancharqa hinalla Diosman sunqu kananpaq?

¹⁶ Jehova Diosta Abiatar qipancharuptinpas Sadocqa hinallam Diosman sunqu karqa. Davidpas manam iskayrayarqachu Sadoc hinalla yanapananmantaqa. Adoniaspa ima ruway piensasqanta willaykuptinkum Davidqa Sadocta, Natanta hinaspa Benayata qayachirqa kamachiq kananpaq Salomonta churanankupaq (1 Rey. 1:​32-34). Sadoctaqa kallpancharqa Natanta hinaspa Diosta wakin serviqkunata qawasqanchá. Paykunaqa kamachiq Davidta yanapaspankum Diosman sunqu karqaku (1 Rey. 1:​38, 39). Salomonqa kamachiqña kaspanmi ‘Abiatarpa rantinpi churarurqa Sadoctaña’ (1 Rey. 2:35).

17. ¿Imaynatam Sadocta qatipakuchwan pi kuyasqanchikpas Diosta saqiruptin?

¹⁷ ¿Imaynatam Sadocta qatipakuchwan? Pi kuyasqanchikpas Diosta saqiruptinqa hinallam  Diosta servinanchik (Jos. 24:15). Jehova Diosqa mana manchakuq kanapaqmi kallpata quwasun. Chaypaqqa paytam mañakunanchik, hinaspapas iñiqmasinchikkunamantam mana karunchakunanchikchu. Diosqa payman sunqu kasqanchiktaqa valoranmi, chayraykum bendeciwasun (2 Sam. 22:26).

18. ¿Imatam yachachwan Marcomantawan señoranmanta?

¹⁸ Yachaykusunchik iñiqmasinchik Marcomantawan Sidsemanta. Paykunapa iskay warmi warmankum wiñaruspanku Jehova Diosta saqirurqaku. Marcom willakun: “Churi-wawanchikkuna naceptinqa ancha-anchatam kusikunchik. Tukuytam ruwanchik paykunata cuidanapaq, chaymi Diosta saqiruptinkuqa llumpayta llakikunchik”, nispa. Nintaqmi: “Jehova Diosqa manam haykapipas saqiwarqakuchu. Wakinpi ñuqa llakisqa tarikuptiymi Sidse kallpanchawaq, pay llakisqa tarikuptinñataqmi ñuqa kallpanchaq kani”, nispa. Señoranñataqmi nin: “Dios yanapawaptillankum llakitaqa aguantarqaniku. Ñuqapa huchaypi warmaykuna Diosta saqirusqanta piensaspaymi llumpay hukmanyasqa tarikurqani. Chayna tarikusqaytam Diosman willakurqani. Chaymanta qipallatam unay wataña mana tupasqay iñiqmasinchik asuykamuwaspan niwarqa: ‘Sidse, manam qampa huchaykipichu warmaykikunaqa Diosta saqirun’, nispa. Jehova Dios yanapawaptinmá hinalla kusisqa servichkani”, nispa.

19. ¿Imaynam kayta munanchik?

¹⁹ Jehova Diosqa munan llapallan serviqninkuna Sadoc hina mana manchakuq kananchiktam (2 Tim. 1:7). Chaywanpas payqa munan manam kikillanchikpi confiakunanchiktachu, aswanqa paypi confiakunanchiktam. Chayraykum ima sasachakuypas kaptin mana manchakuq kanapaqqa Jehova Diosta mañakunanchik. Chayna kaptinchikqa Sadoc hina mana manchakuq kanapaqmi Diosqa yanapawasun (1 Ped. 5:10).