Chay tutamantam Diospi piensayta qallaykurqani. Chay tuta ima mancharichiwasqanmanta manaraq willakuchkaspay willasqaykichik warmacha kaspay imayna uywasqa kasqaymanta hinaspa imaynanpi Diosmanta yachayta munasqaymanta.

1937 watapim nacerqani Francia nacionpi Guesnain llaqtapi. Chay llaqtapi runakunaqa minapim llamkaqku. Papaymi llamkapakurqa minapi, paymi sapa kuti niwaq qillaqa ama kanaypaq. Papayqa sasachakuypi kaqkunatam yanapayta munarqa, chaymi minapi llamkaqkuna huelgata ruwaptinkuqa paypas riysiq. Chaymantapas papayqa llaqtapi kaq curakunatam chiqnirqa. Paykunaqa qullqinku kachkaptinpas minapi llamkaq wakcha runakunamantam qullqita mañakuqku, chayraykum papayqa Diosmantaqa mana haykaqpas yachachiwarqachu.

Chaymi ñuqapas wiñasqayman hina munarqani qullqisapa runakunapa usuchisqan runakuna yanapayta. Llumpaytam piñakuq  kani huklaw llaqtamanta kaqkunata chiqnikusqankuwan. Mamaypas karqa Polonia nacionmantam. Chaymantapas, huklaw llaqtamanta kaqkunapa warmankunawanmi hukllawakuq kani, hinaspam pelotata haytaypi pukllaq kaniku. Ñuqaqa lliw runakuna kuyanakuspa kawsakunankutamá munarqani.

1957 watapim cuartelman yaykurqani soldado kanaypaq, chaymi qallariypi willakusqayman hina Argelia law urqupi kachkarqani. Chay manchachiwaqniyqa kasqa asnollam, manam wañuchiwananpaq soldadochu. Guerrapi kasqayraykum niq kani: “¿Imapaqtaq kawsakunchik? ¿Dios yuyawanchikchu manachu? ¿Haykaqllapipas hawkayaypi kawsakusunchu?”, nispa.

Chaymantam tayta-mamayta watukuq rirqani. Chaypim riqsirurqani Jehova Diospa testigonta, paymi quykuwarqa catolicokunapa biblianta. Argeliaman kutiruspaymi chay bibliata ñawincharqani. Apocalipsis 21:3, 4 nisqanmi piensarirachiwarqa, chaypim nin: “Diospa carpanqa runakunawanñam kachkan. [...] Diosmi llapa runakunapa wiqinta pichanqa, manañam kanqachu wañuypas, llakikuypas, waqaypas nitaq nanaypas”, * nispa. Bibliapi chayna nisqantaqa manam haykaqpas yacharqanichu. Chaykamaqa manam yacharqaniraqchu bibliamantapas nitaq Diosmantapas.

Soldado kasqaymanta lluqsiruypaymi 1959 watapi riqsirurqani Francois sutiyuq testigota, paymi bibliamanta chaynataq Diospa sutinqa Jehova kasqanmanta yachachiwarqa (Sal. 83:18). Paytaqmi yachachiwarqa runakunapa sasachakuynintaqa Jehova Dios tukuchinanmanta chaynataq kay allpa pachanchik suma-sumaq huerta kananmanta, chaynapi Apocalipsis 21:3, 4 nisqan cumplikunanpaq.

Chay yachachiwasqanqa sunquymanmi chayarurqa. Bibliapi imam kaq yachachikuykunata yacharuspaymi curakuna llullata yachachisqankuwan astawan piñakurqani. Chaymi taytay hina piñakuspay imatapas ruwayta munarqani.

Yachachiwaqniy hinaspa wakin iñiqkunam niwarqaku curakunata ama qaqchaq rinaypaq. Paykunam niwarqaku: “Ñuqanchikpa ruwayninchikqa Jehova Diosmanta runamasinchikkunaman yachachiymi, chaypaqmi Jesusqa qatiqninkunataqa kamachiwarqanchik”, nispa (Mat. 24:14; Luc. 4:43). Kallpanchakurqanitaqmi runamasiykunata ima religionniyuqña kaptinkupas sumaqllata rimapayanaypaq. Bibliapim nin: “Señorpa sirvientenqa manam peleananchu, aswanqa llapallanwanmi allinlla kanan”, nispa (2 Tim. 2:24).

Jehova Diospa testigon kanaypaqmi 1959 watapi hatun huñunakuypi bautizakurqani. Chaypim riqsirurqani Angele sutiyuq iñiqmasinchikta. Payqa sunquytam  suwaruwarqa, chaymi 1960 watapi casarakururqaniku. Warmichayqa sumaq sunquyuqmi (Prov. 19:14).

Watakuna pasasqanman hinam allin yuyayniyuq iñiqmasinchikkunapa rimapayaykuwasqanwan Dios serviyniypi imatapas allinta ruwachkani. Paykunamantam yacharuni Diospa munayninta ruwanapaqqa mana hatun tukuq kayta. Proverbios 15:22 nisqanmi allinta yanapawarqa, chaypim nin: ‘Runapa imapas ruwasqanqa qispinmi achka consejaqkunata tapukusqanrayku’, nispa.

1964 watapim llaqtan-llaqtan watukuq kanaypaq niykuwarqaku, chaymi iñiqmasinchikkunata watukuyta qallaykurqani. Ichaqa 27 watallaypiraqmi karqani, chaymi wakinpiqa imapipas pantaruq kani. Hinaptinmi allin yuyayniyuq iñiqmasinchikkuna rimapayaykuwarqaku, chayqa anchatam yanapawarqa.

Paris llaqtaman watukuq chayllaraq riptiymi huk kaqnin iñiqmasinchik niwarqa: “¿Sapallanchikpi parlaykuchwanchu?” nispa. Ñuqañataqmi “allinmi” nirqani.

Paymi tapuwarqa: “Wasiman doctor chayaruspanqa, ¿pi qawaykuytataq munan?”, nispa.

Hinaptinmi nirqani: “Unquqkunatam”, nispa.

Payñataqmi niwarqa: “Awriki. Qawarqaykim punta apaqkunallawan, allin iñiyniyuqkunallawan astawan kasqaykita. Paykunapaq tiempochakunaykimantaqa astawanqa tiempochakunayki chayllaraq bautizasqakunapaq hinaspa hukmanyasqa iñiqmasinchikkunapaqmi, chaynapi paykunata kallpanchaykunaykipaq”, nispa.

Chay iñiqmasinchikpa niykuwasqanqa anchatam yanapawarqa. Cuentatam qukurqani payqa iñiqmasinchikkunata anchata kuyasqanmanta. Niykuwasqanman hinam ruwarqani. Anchatam Jehova Diosta agradecekuni iñiqmasinchikkunawan chaynata yanapaykachiwasqanmanta.

1969 hinaspa 1973 watapim hatun huñunakuypi mikuykunata ruwachinaypaq niykuwarqaku.  1973 watapim 60.000 runakunapaq mikuyta ruwachinay karqa pichqa punchaw. Chayta imaynata ruwanaypaqmi mana tantiayta atirqanichu, ichaqa Proverbios 15:22 nisqanman hinam allin yuyayniyuq iñiqmasinchikkunata tapukullarqani. Yanapachikurqanim yanukuyta yachaq hinaspa rantipakuyta yachaq iñiqmasinchikkunawan. Paykunapa yanapakuyninwanmi chaychikan runakunapaq mikuyta yanurqaniku.

1973 watapim warmichaypiwan Francia nacionpi betel wasipi yanapakuyta qallaykurqaniku. Chaypim iñiqmasinchikkuna niykuwarqa Camerun nacionman qillqanchikkunata apachinaypaq. Chay nacionpiqa 1970 watamanta 1993 watakamam autoridadkuna michakurqaku Diosmanta willakuyninchikta, chaymi manchapakurqani. Hinaptinmi Franciapi kaq huk kaqnin punta apaq kallpanchawananpaq niwarqa: “Camerun nacionpi iñiqmasinchikkunam qillqanchikkunata suyachkanku. ¡Imallatapas ruwasunyá!”, nispa. Chaymi tukuyta ruwarqaniku iñiqmasinchikkunaman qillqanchikkunata chayachinaykupaq.

Achka kutipim Camerun nacionpi punta apaq iñiqmasinchikkunawan rimanaypaq riq kani chay nacionpa hichpan nacionkunaman. Paykunam niwarqaku iñiqmasinchikkunaman qillqanchikkunata imaynata chayachinaykupaq. 20 wata masninmi Jehova Diospa yanapakuyninwan iñiqmasinchikkunaman huñunakuypaq qillqanchikkunata sapa killa chayachirqaniku.

Riqsinakusqayku tiempomantaraqmi cuentata qukurqani warmichayqa Diosman sunqu kasqanmanta. Chaymi casarakusqayku tutapi niwarqa tukuy sunquykuwan  Diosta servinaykupaq mañakunaypaq, chayna mañakusqaykutam Jehova Diosqa uyariykuwarqaku.

Betel wasipi yanapakunaykupaq niykuwaptinkum ñuqaqa iskayrayarqani, astawanqa gustawarqa llaqtan-llaqtan watukuymi. Warmichayñataqmi niwarqa: “Ñuqanchikqa Jehova Diostam nirqanchik tukuy sunqunchikwan servikunanchikpaq. Diospa llaqtanpi punta apaqkunapa niwasqanchiktaqa kasukunanchikmi”, nispa (Heb. 13:17). Chaymi betel wasipi yanapakuq rirqaniku. Warmichaypa Diosman sunqu chaynataq allin yuyayniyuq kasqanmi casado vidaykupi chaynataq Diosta servikuyniykupi allinta yanapawarqaku.

Kunanqa yuyaqñam kachkaniku. Warmichayqa hinallam yanapawachkan. 75 wataykupiña kachkaspaykum ingles rimaypi yachachikuyta chaskikuyta munarqaniku. Chaymi ingles rimaypi huñunakuq iñiqmasinchikkunawan huñunakuyta qallaykurqaniku. Francia nacionpi betel wasipi huk kaqnin cuentallikuqmi kani, chaywanpas warmichaywanmi tiempochakurqaniku ingles rimayta yachanaykupaq. Hinallam kallpanchakuchkaniku ingles rimaypi chaynataq frances rimaypi qillqanchikkunata ñawinchanaykupaq. Kallpanchakunikutaqmi iñiqmasinchikkunawan huñunakunaykupaq hinaspa ingles rimaypi Diosmanta willakunaykupaqpas.

2017 watapim ingles rimayta yacharusqaykurayku niykuwarqaku Estados Unidospi ingles rimaypi yachachikuyta chaskiq rinaykupaq, chayqa anchatamá kusichiwarqaku.

Jehova Diosmá allin yachachiwaqninchikqa (Is. 30:20). Payqa musu-sipaskunatapas, yuyaqkunatapas sumaqtam yachachiwachkanchik (Deut. 4:5-8). Cuentatam qukuni Jehova Diosta chaynataq allin yuyayniyuq iñiqmasinchikkunata uyariq musu-sipaskunaqa Dios servikuyninkupi allinta tantiakusqankumanta. Chaytam nin Proverbios 9:9: ‘Yachayniyuq runata consejaptikiqa aswan yachayniyuqmi kanqa. Allin ruwaq runata yachachiptikiqa aswan yachayniyuqmi kanqa’, nispa.

Wakin kutipiqa yuyarinim Argelia law urqupi tuta mancharikusqayta, hinaspaymi yuyaymanani Jehova Dios imaynata yanapawasqanpi. Kusisqam warmichaypiwan kawsakuchkaniku Diospa yanapakuyninwan. Ñuqaykuqa hinallam munachkaniku Jehova Diosmanta chaynataq allin yuyayniyuq iñiqmasinchikkunamanta yachayta. Iñiqmasinchikkunamá yachaykachiwarqa.